Read Dimasa Dangyasarao 5 Bible Online

Dangyasarao 5 - Dimasa bible

Dangyasarao 5

¹Thikhabo, subung saosi, boni bumu Anania, boni bihih Sapphira jang bonsi dong ba. Anania de hah phain hi, boni bihih bo tharmai hi, boni dam khe gejesi bo dengkhao ba,

²ode, gejesi khe labu hi Apostolrao ni igah rogong ha bokhe deng ba.

³Peter bokhe thi ba, Anania, Bese Gathar khe thokhi mane ode hah ni dam khe gejesi dengkhao mane khlai hi snadi jabani Soithan jang nini khah ha gablai rijao ba?

⁴Bo nini yao ha dongdu si nini ning niya na? Ning phain bani yaohon habo boni dam de nini grao ha dengya na? Snadi jabani eleiyaba grao khe nini khah ha ning bao ba? Subung khe ning thokhiya, Madai khe se ning thokhi ba, ode bo thi ba.

⁵Anania de bo grao khe khna ba jang bo galai hi thih lang la kha; ode, khnayaba si de hamsi ning khinlai hi dong ba.

⁶Nagarao de baija hi, dolei slam dada, bain lang hi bonsi bokhe phip kha.

⁷Bubli gontha tham ni yaohon ha se, musibo mithiya hi boni bihih bo hapsing phai ba.

⁸Peter bokhe sing ba, Hah khe olei jang se ning phain ba? aniha thi sang. Boni bihih thiphin ba, Om, olei jang se ning phain ba.

⁹Odehe, Peter boniha, Snadi jabani Gabra ni Bese Gathar khe nainai mane nisi graosi jaba? Nai lah, nini basai khe phipyarao ni yapha de derga rogong ha sophai kha, ning khebo bonsi bainlang ma se, ode bo thi ba.

¹⁰Boha ning boni igah rogong ha, bo galai hi bobo thih lang la kha. Ode, nagarao hapsing phai hi, bo thih hi dongba khe nuphai hi, bonsi bainlang hi, boni basai ni rogong ha bo khebo phip kha.

¹¹Ode, longjomrao khrip bo ebo grao khe khnayaba si de hamsi ning khinlai ba.

¹²Subung ni bising ha Madai ning Apostolrao ni yao jang sin ode gmang thaosisi gabang khusi dang re. Bonsibo khrip jang khah masi jahi Solomon ni hakhli ni khepsa ha bonsi bojom ja re.

¹³Gibin subung de saosibo bonsi ni bising ha dongpha raoya; thikhabo, bonsi khe nalai bakhan khlai re.

¹⁴Thikhabo, bo gadain lonyarao gabang miyah jang masainjik jang Gabra niha ning bonsi bangdao pha lang re.

¹⁵Odebani, subung limyarao bo derga buthu ha bonsi bainhun hi, thuyam buthu ha, rih khe yenyaba buthu ha, bonsi thu rihi, Peter thangba lamai jang bonsi sigring jangbo gejesi khe thikhabo, sainkhlim phu mani khlai hi bonsi bao ba.

¹⁶Odehe, Jerusalem gabasi ni nolei beren ni phrang subung buthu limyarao bo, sgain gusu jang dukhu rijaoyarao khe labu hi, bonsi bojom japhai ba; bo buthu khebo bonsi ham rithar ba.

¹⁷Odehe, Jonthaima dedao thaoyaba jang boni lugurao, bonsi khrip gaba phai ba, (boni lugurao de Saddukairao ni dol se), hamsi ning bonsi hingsa jahi,

¹⁸Apostolrao khe bonsi remhi, noleikhor ni phatho ha bonsi khe jeb kha.

¹⁹Thikhabo, Gabra ni degla sao jang derga buthu khe khuru phai ba, ode bo khe bajiha lang hi thi ba,

²⁰Thang lah, Madai ni bikhoh ha song hi, khrip subung niha ebo hayu ni grao khe sainthi lah, ode sani ba.

²¹Apostolrao bo grao khe khna hi, nokha naima jaba bubli ha, Madai ni bikhoh ha hap hi, bonsi sling ri ba. Jonthaima dedao thaoyaba jang boni lugurao phai hi, bisardarrao jang Israelrao ni grengrao ni khraorao bonsi khrip longthim lai hi, Apostolrao khe labu mani khlai hi, phatho khoh ha bonsi subung haiha ba.

²²Thikhabo, subung remyarao de sohi dada, bonsi khe maiya, odebani bonsi phaiphin la hi,

²³Phatho ni noh de hamsisi phrao hi, bokhe raokhiyarao bo derga ha songhi dongba khe jing nu ba, ode boni bising ha saosi khebo jing nuya, bonsi ode thi ba.

²⁴Boha, Madaikhoh ni hoja ode Jonthaimarao bo grao khe khna hi, Ebo khe bede ja ba? thihi bonsi ni balam ha hamsi ning khah waimu nang ba.

²⁵Odehe, subung saosi phai hi, bonsini ha sainthi ba, Nai lah, phatho ni noh ha dengjaoyarao Madai ni bikhoh ha songhi subung buthu khe bonsi sling ri du!

²⁶Odebani, hoja de subung remyarao jang bonsi thang hi noharirao khe khin bani bonsi hamsisi labu ba. Ode niyakha de bonsi longthai jang lemjaoma khe bonsi khin ba.

²⁷Bonsi labu hi sophai ba jang bonsi khe bisardarrao ni sagang ha song ri ba. Ode, Jonthai dedao thaoyaba bonsi niha,

²⁸Ebo subung ni bumu jang slingriya mane khlai hi nisi khe jing magna ba, bokhe wainso lah; nisi ni grao khe sling ri hi Jerusalem ha nisi gablai thar ri kha, bo subung sthaiyaba khe jini gorna ha hokhlai ma bao du, thihi jo ba.

²⁹Thikhabo, Peter jang Apostolrao, Subung ni grao thabo Madai ni grao khe jing mani ma nangdao.

³⁰Nisi Jisu khe bondo ha khasi hi sthaiyaba de jini grengrao ni Madai ning bokhe mathang hi baija riphin kha.

³¹Bo jar ning Madai ni Raja jang ode sogoyahsa jahi dong mane khlai hi jarni yaoda gede bokhe sugu kha. Israelrao khe phap ni phrang khah phin rihi sogo mane khlai hi,

³²Bo grao khe sakhi riyarao jing ning ja kha. Bese Gathar Madai ning boni grao maniyarao si niha bo ri kha, boni bo sakhi se, ode thihi bonsi thiphin ba.

³³Bonsi de bo buthu grao khe khna ba jang bonsi ni khah ha jajaoya jahi bonsi sthaima bao kha.

³⁴Thikhabo, bisardarrao ni bising ha de, boni bumu Gamaliel, Pharisai, Dara tharmaiyaba, khrip subung ni bising ha bumu jadao thaoyaba, subung saosi khe bo song rihi, bo buthu khe baigo da ri mane khlai hi bo hukhum ri ba,

³⁵ar bisardarrao niha thi ba, Nisi Israel subung buthu, ebo buthu ni basao ha nisi khusi dangma baoyaba khe girik lah.

³⁶Ebo ni sagang habo Ang subung gedeba se thihi Theoda thiyaba dongphai ba. Bo subung niha gabang subung rjabri lai bo jang baosi gaba lang la kha. Bo de sthaijao kha, boni grao khe maniyaba si de, bonsi khrip bo dra dri jathar hi bonsi musibo jaya kha.

³⁷Boni yaohon ha sainrik hi bumu reb khu ri mani basain ha Galili raji ni Juda bo dongphin phai ba. Boniha gejesi khe bo sikphin ba, thikhabo, bo de thih lang la kha, boni grao khe maniyaba si de, bonsi khrip bo dra dri jathar ba.

³⁸Odebani, ang nisi khe thi du, ebo subung buthu khe da dopha si, bonsi dong la ga thing. Elei bonsi khusi dangma baoyaba ode bonsi khusi dangyaba de subung se dang ba thikhade bonsi jam la ma se.

³⁹Bede thikhade, Madai se dangba thikhade, bonsi khe sajam phu nang niya; ode niyakha de, Madai jang se nisi nanglai ba jama se, bo ode thi ba. Bo grao thiyaba khe bonsi jajao kha.

⁴⁰Odebani, Apostolrao khe bo longhi, bonsi suhi dohi, boni yaohon ha Jisu ni bumu jang grao thiya mane khlai hi magna hi, haiger kha.

⁴¹Bisardarrao ni bising ni phrang bonsi baigo ba ha, boni bumu jang laji maikha bani, hamsi ning bonsi khaja kha.

⁴²Ode, nalaibo Madai ni bikhoh ha ode noh noh ha, Jisu de Krista ning thihi graojma sainthi hi sling ri ba, ode bonsi thiba thaoya kha.