Read Dimasa Dangyasarao 8 Bible Online

Dangyasarao 8 - Dimasa bible

Dangyasarao 8

¹Bo basain ha de, longjom Jerusalem ha dongyaba buthu khe bonsi hamsi ning dukhu ri jenba; odebani, Apostolrao khe garhi de Judai jang Samari raji ni khrip nolei ha, bo ejang ojang khaiphlung thar ba.

²Madai khe maniyarao gejesi, Sephan khe nuhi hamsi ning gra kha, ode bo khe phip kha.

³Thikhabo, Saul de longjomrao khe hamsi ning dukhu rihi, noh noh ha bo hap pha lang ba, masainjikrao, miyahrao khe sikhon hi, phatho ni noh ha bo phraojeb re.

⁴Lonyarao, ejang ojang saidra jaoyarao, khrip hathan ha thang hi, graojma khe bonsi sainthi phalang ba.

⁵Philip de Samari nolei ha thang hi, Krista ni grao khe baipha lang ba.

⁶Subung buthubo bo grao khe khna hi, bo gmang thaosisi khusi dang phnuyaba buthu khe nu dada, Philip grao thiyaba khe khah ri hi bonsi gainsong ba.

⁷Sgain bese gusu jang gabang subung remjaoyarao bonsi ni bising ni phrang khurang bol jang jirik khao hi baigo ba, ar adur jayaba, ode khorarao bo bonsi hamthar ba.

⁸Odebani, bo nogor ni subung buthu hamsi ning khaja lai ba.

⁹Eboni sagang ha, subung saosi, bumu Simon thiyaba dong ba; bo jadu-montro khe yaowai hi Samari nolei ni subung buthu khe gmang ri re, ode bo jar khe subung gedeba thi la re,

¹⁰ar khasiba ni phrang gedeba sosi, khrip subungbo bokhe man khlai hi thi re, Ebo subung niha Madai ni raothai dong, thihi bonsi thiyaba de ebo ning ja kha, thihi boni grao khe bonsi gainsong lai re.

¹¹Bo sagang basain ni phrang bonsi khe, jarni montro ni khusi jang gmang thaosisi khlai hi dang re; odebani bonsi bokhe mani re.

¹²Thikhabo, Madai ni raji ni hamba graojma, Philip sainthiyaba khe lonhi, miyahrao ar masainjikrao bo baptisma la kha.

¹³Boha, Simon bo lon hi baptisma la blai dada, bo Philip jang baosi dongpha ba. Sin jang gede gede raothai ni khusi buthu khe nuhi, bo hamsi ning gmang ba.

¹⁴Apostol Jerusalem ha dongyarao, Samari nolei ni subung buthu, Madai ni grao khe lon kha thihi bonsi khna ba jang, bonsi niha Peter jang Johan khe haiha ba.

¹⁵Bonsi sohiba jang, Bese Gathar khe bonsi maiphu mane khlai hi bonsi ne Madai bi ri ba.

¹⁶Boni sagang ha, bonsi ni bising ha saosi ni basao ha bo Bese galaiya, Raja Jisu ni bumu jang se ning bonsi baptisma jaba kho.

¹⁷Odehe, Peter jang Johan, bonsi ni basao ha yao deng hi, bonsi Bese Gathar khe mai kha.

¹⁸Apostolrao yao deng bani se Bese Gathar khe bonsi riba thihi Simon nu hi,

¹⁹Ebo grao ni raothai khe a nebo ri lah, asaba ni basao habo yao deng kha ning, bonsi Bese Gathar maiphu mane khlai hi, thihi bonsine rang rima bao ba.

²⁰Thikhabo, Peter bo khe thi ba, Nini rang de ning jang baosi jam thing. Bede thikhade ning la Madai riyaba yaosandi khe rang jang baraima se bisar khlai ba.

²¹Ebo grao ha de ning gaba phaya, nini phantha bo giri; bede thikhade, nini khah Madai ni gede belengya.

²²Odebani, ning jarni ebo hamya ni phrang khah phin hi, Gabra niha bi lah, odese, nini khah ha baoyaba khe bo ning khe map khlai ma.

²³Bede thikhade, ning bikhli khayaba jang hamya jang khajao hi galaiyaba hathan ha dong thihi ang tharmai du, ode bo thi ba.

²⁴Simon de Peter jang Johan niha thi ba, Nisi thiyaba de musibo ani basao ha sophaiya mane khlai hi nisi ning Gabra niha a ne bi ri lah.

²⁵Bonsi sakhi rihi Gabra ni grao khe khna riba ni yaohon ha, Jerusalem ha thangphin la kha. Bonsi thangpha laiba ha, Samari raji ni subung buthu ni nolei buthu ha, hamba graojma khe sainthi phalang ba.

²⁶Gabra ni saosi degla, Philip khe thi ba, Baija hi, sain kharthi yaoda gede Jerusalem ni phrang Gaza lailangyaba lama ha ning thang la, bo lama hajengling khe lailang du.

²⁷Odebani, Philip baija hi thang la kha. Ode, oraha Ethiopia raji ni subung saosi, Ethiopia ni Rani Kandaki ni bakhla ha subung phida khaojaoyaba hoja dedaothao, boni somphoti khrip khe naisoyaba, Jerusalem ha Madai bi mani khlai hi bo phai ba.

²⁸Bo phaiphin baha de, bo jarni gorai ni gari ha kham hi gorasali ni laisi khe bo phuri phabu lai ba.

²⁹Boha, Bese Gathar Philip niha thi ba, Gabasi thang hi bo jang ja lah.

³⁰Philip bo subung phidao khaojaoyaba niha khaipha langhi, gorasali Isai ni laisi khe bo phuriba khna hi, Ning phuriyaba ortho khe buji du? thihi bo khe sing ba.

³¹Bo thiphin ba, Saosi bo a ne thiphla riya kha la, ang bede buji phu ma?. Ode, boni ha khamphai mani khlai hi Philip khe bo jama ba.

³²Madai ni laisi phuriyaba de ebo ning ja kha: Melma khe sthai mane langba lai bokhe bonsi lang ba, melmasa boni bikhim khepyaba ni sagang ha, bo phirik phirik dongba lai, bobo boni bukhuh khe khuruya.

³³Bo basasa jaba ni boni bisar de selajao ba, Boni greng buthu ni kharmu khe sere ning thima kho? Bede thikhala, habsao ni phrang boni hayu khe lang la kha, thi du.

³⁴Boha subung phida khaojaoyaba de Philip jang bo sainlai hi, boniha Gorasali eleiyaba grao khe thiba la, sere ni grao khe thi ba, jarni grao na malai ni grao? thihi sing ba.

³⁵Boha Philip grao joba, bo Madai ni laisi ni grao khe khitha ni phrang jenhi, boni ha Jisu ni grao khe thi ba.

³⁶Lama ha thang ba ha sereba dih ni hathan ha bonsi sohi ba, ode, bo phida khaojaoyaba thi ba, Nai lah, eraha dih dong, duha baptisma ne khlai hi sere ang khe mathao ma?

³⁷Boha, Philip bokhe thi ba, Ning khrip khasu ha lon kha de, ning lala phu du. Bo thiphin ba, Ang lon du, Jisu Krista de Madai ni basa ning thihi ang lon du.

³⁸Odehe, gorai gari khe bo songri hi, bonsi gini, Philip ar subung phida khaojaoyaba de dih ha thang kha, ode, Philip bokhe baptisma ri kha.

³⁹Dih ni phrang bonsi baigoba jang, Gabrani Bese Philip khe lang la kha. Phida khaojaoyaba de bokhe nuphinya kha, thikhabo, khajahi bo thang la kha.

⁴⁰Philip khe malai Azota nolei ha nuphin hi kha; ode, bo lailang hi, Kaisari nolei ha soya si de, nolei nolei ha hamba graojma khe bo sainthi phalang ba.