Read Dimasa Rom 1 Bible Online

Rom 1 - Dimasa bible

Rom 1

¹Paul, Jisu Krista ni leng jahi haijaoyasa ne khlai hi longjaoyaba, Madai ni hamba graojma khe sainthi mani khlai hi gibin dengjaoyaba ni phrang.

²Bo hamba graojma khe, sagang ha Madai ning jarni gorasalirao khe yaowai hi boni laisi gathar ha bo hanggai kha.

³Boni basa, jini Gabra Jisu ni grao, saomang gede ha nai kha de David ni greng ha hajai kha,

⁴Thikhabo gathar ni Bese gede ha de githi ni bising ni phrang baija phinyaba Madai ni basa ning thi hi bai kha;

⁵Boni dara jang se, Madai ning khrip jadi ni bising ha subung buthu khe lonma ha mani ri mani khlai hi khasaoma jang haijaoyasa ni khusi khe jing main kha.

⁶Nisibo olei jasosi ning Krista ni subung ja mani khlai hi nisi longjaoyaba se.

⁷Madai ning bo jamjaoyarao jang boni subung gathar ja manibo longyarao, Rom nogor ni subung buthu niha: Jini bupha Madai, odehe Gabra Jisu Krista ni phrang khasaoma jang santi dong thing.

⁸Bo sagang thao ha, nisi ni lonthai ni grao khe habsao ni khrip ha gublung thar bani, nisi khrip ni khlai hi, Jisu Krista ni dara jang ani Madai niha khajama ni grao khe ang thi du.

⁹Ang biyaba buthu ha thaoyasi nisi khe ang wainso du, boni basa ni hamba graojma khe baiyaba ani bese habo khusi dangyaba Madai de ang khe mithi phayaba se.

¹⁰Madai nangjaoba lai asaba dara jang duha de, nisi niha ang thangphu mani, bokhe bi dada sain hi ning dong.

¹¹Nisi khe rao ri mani bese gede jinis riyaba asaba khe nisi ne labu rima hamsi ning ang nangjao du;

¹²Bokhe, lonma ha ang jang nisi jing saosi jang saosi nailai hi, juru lai phnu mani khlai hi ang thi du.

¹³Daphlungrao, Jentail gibin buthu ni bising ha ang bathai khao jiba lai ning, nisi ni bising habo bathai gejer godo khaosi phu mani khlai hi nisi niha hamsi ning phai ma nangjaoba se, elei sosi ang mathao jao hi dongba se thihi nisi jang tharmai jaoma ang nangjao du.

¹⁴Greek sarao odehe jadi khe khrangyarao, subung buddi gnang odehe subung sidarao niha ang lagai dong.

¹⁵Odebani se, nisi Rom ha dongyarao niha bo hamba graojma khe hamsi ning ang thima nangjao ba.

¹⁶Hamba graojma ni khlai hi ang lajiya, asababo bokhe lonyarao khe sogo mani khlai hi Madai ni raothai se. Sagang ha Judarao ni khlai hi, boni yaohon ha Jentailrao ni khlai hibo bo japhin ba.

¹⁷Hamba graojma ha de Madai ni dormo ragao sisi nujaophai ba, bo jenba ni phrang jamthaoba sosi lonma ni khlai hi se ning. Lonma ni khlai hi subung dormo thanghi dongma se, thihi reb ba lai.

¹⁸Subung buthu, Madai khe bera khlaiyaba odehe bonsi ni khrip hamyayaba ni khlai hi bonsi hamyayaba ha gibi grao jang nanglairao ni basao ha Madai ni thamsi sorgo ni phrang phnu hi dong.

¹⁹Madai ni balam ha tharmai ginyaba khe, bonsi ni khlai hi tharmai phuma se, Madai ning bonsi tharmai phu mane phnu kha bani.

²⁰Boni gun khe muthai jang nu phuya, boni thaoglao odehe boni Madai jathai khe habsao sangsai jenba ni phrang bo jinis sangsaiyaba buthu ha ragao sisi nuphuyaba odehe khnaphuyaba bonsi phnu ri bani, asaba subungbo thisingthan giri.

²¹Madai khe tharmai hibo, bokhe Madai lai bonsi man khlaiya, boni ha khajama ni grao khebo bonsi thiya; bonsi haglai baohi, bonsi ni khah baothai gibin de andar jathar kha.

²²Girikbi baolayaba de gibir se jathar kha.

²³Thithaoyayaba ni muima khe, thiphuyaba subung, dao buthu, mih igah gongbriyaba buthu hang gnang hah ha sorbaiyaba buthu, saokhuli buthu jang bonsi slaijao kha.

²⁴Odebani bonsi ni saomang buthu de lasisi slam lai lama ne khlai hi bonsi khah ha nangjaoba lai regethai ha dong bani bonsi khe Madai dangkhlai kha.

²⁵Madai ni balam ha gibi grao khe mosol jang bonsi slai hi, sangsaiyaba khe khlim ba thane, jinis slamyaba khe se khlim hi boni khusi khe se bonsi dang ba. Bokhe slamyaba thaoglao bakhan khlai jayaba se! Amen.

²⁶Bo bubli ha ning, bonsi ni nangjaoma jinis lasisi jadao thaoyaba buthu khe dang mani khlai hi Madai ning bonsi khe dangkhlai kha. Bonsi ni masainjik buthubo, miyah masainjik hamjaothai khe basai-bihih ni hamjaothai nalai lai niya hi bonsi slai ba.

²⁷Olei jasosi ning miyahraobo, jarni bihihthu jang bonsi ni yaowaithai khe dangkhlai hi, mijingma jang saosi khe saosi bonsi libi lai ba. Miyah jang miyah bo majangya daothaobo dong ba, bonsi ni phap bathai khe bonsi jar ning dukhu ja la kha.

²⁸Bokhe garhi, Madai khe bonsi tharmai ma nangjaoya bani, baothai yaowai jaya mani odehe dongthai majangya mani khlai hi Madai ning bonsi khe riba se.

²⁹Bonsi de khrip hamyayaba khe dang hi, khrip jadi phap, khrip jadi libima, odehe khrip jadi jajaoyayaba jang bonsi de gablai du. Bonsi de musaba, sthaibaiyaba, thokhiyaba ha bonsi ni khah ha gablai du, sijima yaowaiyaba buthu,

³⁰gibi niya hi subung buthu khe sijiyaba, Madai khe jajaoyayarao, jar khe blaijao layarao, phuthan sanggama jang ning phap gadain bonsi baigo rihi, buma bupha ni grao khe bonsi khnaya,

³¹subung gibir, subung balam giriyaba, malai ni basao ha khasaoma giriyaba, odehe maya giriyaba se.

³²Madai bisar khlaiba lai ning olei khusi dangyarao de thi jare thihi bonsi tharmai hibo, bonsi dangyaba khe garhibo, olei dangyaba subung gibin buthu khebo bonsi khaja du.