Read Dimasa Rom 15 Bible Online

Rom 15 - Dimasa bible

Rom 15

¹Odebani, jing subung raoyarao de jar khajama smaiya hi subung raoyayaba ha juru ma nang du.

²Khrip subungbo jarni nohari khe bamkhu mani khlai hi hamba khusi danghi jing khaja ri lai nang.

³Kristabo jar khe bo khaja rilaya: Ning khe sibringyarao ni sibringma de ani basao ha galai kha, thihi reb ba lai, bo dukhu se khlaidao ba.

⁴Madai ni laisi ni grao ha rebyaba khe bo jinthane sling ri mane se bo reb ba; grao reb ba ni phrang dukhu khah laoma odehe khajama mai bani khlai hi jing asa maiphu mani khlai hi.

⁵Dukhu khah laoma jang santi riyaba Madai ning, Krista Jisu ni grao lai khah masi nisi khe ja ri kha de,

⁶khah masi jahi, milima jang dilam lai, jini Gabra Jisu Krista ni bupha jang Madai khe nisi bakhan khlai phu ma.

⁷Odebani, Krista ning Madai khe muima khlai mane bo nisi khe khajaba lai ning nisibo saosi jang saosi nisi khaja lai lah.

⁸Ang nisi khe thi du, Madai ni lonma gibi khe ragao ri mani khlai hi, greng buthu nihabo grao hanggaiyaba khe phorman khlai mani, Krista de jogai bujuh rasoyaba ni dangyasa jahi bo dong phai ba.

⁹Jentailrao bo khasaoma ni kharon jang Madai khe bonsi bakhan khlai phu mani khlai hi; Odebani, Jentailrao ni bising ha nisi khe ang bakhan khlai nang, odehe nini bumu khe bakhan khlai hi ang rajab ma se, thihi reb ba lai.

¹⁰Odeh, O Jentailrao, boni subung buthu jang baosi khaja lah, odehe bo thi du.

¹¹Odehe, Jentailrao khripbo, Gabra khe bakhan khlai lah, khrip subungbo bokhe bakhan khlai la thing, odehe bo thi ba.

¹²Odehe Isai bo thi du, Jesai ni yaderma baigo phai nang, Jentailrao ni Raja ne khlai hi songkhu phai nang, odehe boni basao ha Jentailrao asa dengma se.

¹³Bese Gathar ni raothai jang asama bang phu mani khlai hi, asama ni Madai thi du, nisi lon bani khlai hi khajama odehe khrip ne santi jang nisi khe gablai ri thing.

¹⁴Ani daphlungrao! Nisi ning ebo khrip ham ma jang nisi gablai hi, khrip jadi gyan jang gablai dada nisi slingriyaba gibi ha ning ang jar ning nisi ni balam ha ani khah ha jajao du.

¹⁵Thikhabo, ang brabai brabai ha nisi khe wainso ri mani khlai hi, nisi niha khitha raohi ang reb ha ba; Jentailrao ni khah bising ha khusi dang mani khlai hi, Madai ning Krista ni khusi, khasaoma ni khlai hi bo jinthane ri bani kharon jang ang reb ha du.

¹⁶Jentailrao khe Bese Gathar ha Madai jang khaja jao gothai, bandai yaopha mani khlai hi, hamba graojma sainthiba de ani jonthai ni khusi se.

¹⁷Odebani, Krista Jisu ha de, Madai ne khlai hi ang khusi dangyaba khe phuthan khlai mani aniha balam dong.

¹⁸Jentailrao khe grao khnayaba ha labu mani, Krista ning grao jang khusi dang hi, ang khe yaowai dada dangyaba buthu khe garhi de musibo grao khebo ang thirao nang niya;

¹⁹Sin buthu odehe gmang thao sisiyaba buthu raothai jang Madai ni Bese ni raothai jang, ang khe yaowai hi bo khusi dang ba. Odebani, Illurikom sosi Krista ni hamba graojma sainthiyaba khusi khe phura ang dang ba;

²⁰Malai longthai gaiyaba ni basao ha ang dangya mani khlai hi, olei jasosi ning Krista ni bumu layayaba hathan ha hamba graojma baiphlung ba khe ang nangdao thao khusi bao du.

²¹Madai ni laisi ha reb ba lai, Boni graojma thiba giriyaba subung buthu bonsi mai nang, khnaba giriyaba subung buthu bo khna nang.

²²Odebani se, nisi niha ang phaiphin ma nang ba.

²³Thikhabo, duha de, ebo haphai hade anthane khlai hi khusi dang mani hathan giri kha; odehe, maithai gabang nisi niha thangma bo ang mijing ba;

²⁴Spain raji ha ang thangba lamai ha nisi khe goron mani ang asa deng du; nisi jang hamsisi sainlai hi jolei hi, ang thangma baoyaba gede thang ba ha nisi ang khe digar nang thihi bo asa khlai du.

²⁵Thikhabo, duhade subung gatharrao ni khlai hi juruyaba khusi khe dang mani Jerusalem ha ang thangma nang du.

²⁶Makedonia ar Akaia raji ni subung buthu de Jerusalem ni subung gatharrao ni bising ha dongyaba dukhisarao ne khlai hi khah khusi jang bonsi khrangphain khrang ba.

²⁷Khah khusi jang bonsi khrang hi, bonsi niha lagai bo dong ba; Jentailrao jang bonsi ni bese ni hamthai buthu jang bonsi yaowai phalai kha de, habsao gede ni jinis buthu ha bonsibo naiso nuso khlai ma ning nang du.

²⁸Odebani, bokhe ang dang blai hi se, khrangphain bojom jayaba buthu khe bonsi ne yaopha blai bani yaohon hase, nisi niha thangba lamai ha se Spain raji ha ang thangpha lang ma.

²⁹Nisi niha ang phaiba ha de, Krista ni hamba graojma ni hamthai khe labu hi phai ma se thihi ang mithi du.

³⁰Daphlungrao, jini Gabra Jisu Krista ni khlai hi odehe Bese ni hamjaoma khasaoma ni khlai hi, anthane khah muh rihi bi ri mane nisi khe ang khainsu du.

³¹Juda rajiha khusi dangyarao ni yao ni phrang ang gophu mani khlai hi odehe, Jerusalem ni subung gatharrao ne khusi dangyaba khusi khe subung gatharrao ne khusi japhu mani ja thing, ode,

³²Madai nangjao khade khusi jang nisi niha ang phaiphu mani odehe, jing saosi khe saosi smao ri lai phu mani a ne bi ri lah.

³³Mili mani Madai de nisi khrip niha dong pha thing, Amen.