Read Dimasa Rom 5 Bible Online

Rom 5 - Dimasa bible

Rom 5

¹Odebani, lonma ni khlai hi sainpha jao kha bani, jini Gabra Jisu Krista ni balam jang jing mili kha.

²Boni balam jang ning, duha jing songyaba khasaoma ha ning lonma jang jing hapsing kha; Madai khe asa khlai hi jing khaja du.

³Bo se ning niya hi, jing dukhu hadi jayaba buthu habo jing khaja hi, dukhu hadi jayaba de dukhu khah laoma habo slam hi,

⁴dukhu khah laoma jang dongthai hamba slam hi, dongthai hamba jang asama bo slam du thihi jing tharmai du.

⁵Odehe asama jingkhe gmang giji khlaiya, bo jinthane Bese Gathar riyaba khe yaowai hi jini khasu ha Madai ning boni hamjaoma khasaoma khe lupha kha bani.

⁶Bede thikhade, jing musibo dang phuya hi dongba ha, bo gibi bubli ha ning Krista de subung phaphirao ni khlai hi thih ba.

⁷Subung dormo ni khlai hi thihraoyaba isi bang nang niya, thikhabo, subung hamba ni khlai hi thihjaoyaba de dong la phu re.

⁸Thikhabo, Madai ning jarni hamjaoma gibi khe jinthane phnu ridu, jing phaphi jahi dong ba ha ning Krista jinthane khlai hi thihphai ba.

⁹Odebani boni thijao jang jing gibi ja rijao bani yaohon hade, Madai ni thamsi ni phrang bo jingkhe sogo ma se.

¹⁰Jing boni sotru jahi dongba ha ning, boni thihyaba ni balam ha Madai jang jing mili khade, boni hayu ni balam ha jing hamsi ning sogoma asaba dara jang jing mai nang!

¹¹Olei se ning niya hi, miliphinyaba duha jinthane mai riyaba, jini Gabra Jisu ni dara ni khlai hi Madai ha jing khaja du.

¹²Odebani, subung saosi ni khlai hi habsao ha phap hapsing phai hi, phap ni khlai hi thihyababo hapsing phai kha. Odebani, khrip subung phapi ja thar kha bani, thihyaba de khrip subung ni basao ha sothar kha.

¹³Dara dong mani sagang ha ning habsao ha bo dong kha; thikhabo, dara giri khade, phap khe bao nang niya.

¹⁴Thikhabo, Adam ni phrang Moses sosi, Adam lai phapi jayayarao bo thihyaba de bisar ja kha. Adam de phaiginyaba ni sigring se.

¹⁵Thikhabo, jinis magna riyaba de gajai jang baosi niya. Subung saosi ni phap gajai ni khlai hi gabang subung thih kha de, Madai ni khasaoma jang subung saosi Jisu Krista ni khasaoma jang jinis magna riyaba khe gabang subung bonsi maidao nang thihi janai du.

¹⁶Odehe, jinis magna riyaba de subung saosi ni phap khusi ni bathai jang de gijisa bo baosi jaya. Subung saosi gajai khlaiba ni yaohonha se bisar de gajai ja riyaba sophai ri ba, thikhabo gabang gajai buthu ni yaohon ha jinis magna riyaba de gajai jayayaba khe bo sophai ri du.

¹⁷Subung saosi gajai khlai bani khlai hi, subung saosi ni khlai hi ning, thihyaba ni bisar ja kha de, subung saosi ni khlai hibo Jisu Krista ni khlai hi ning gabang khasaoma jang bo jinis magna riyaba dormo khlaiyaba khe maiyarao de, hayu maiyaba jang hamsi ning bonsi ar bisar khlaidao ma se.

¹⁸Olei ning, subung saosi gajai khlai bani khlai hi, khrip subung gajai ja ri jaoba se. Olei jasosi ning, subung saosi gibi khusi dangyaba jang dormo ja rijao hi odehe khrip subung ni khlai hi hayu khe bonsi ne so rima se.

¹⁹Subung saosi grao maniya bani khlai hi gabang subung khe subung phapi ja rihi bonsi phapi jaba lai ning, subung saosi ni grao khe mani bani khlai hi gabang subung khe dormo subung ja rima se.

²⁰Gajai baradao mani khlai hi dara hapsing phai ba; thikhabo, phap barayaba si ha khasaomabo bara phalang du.

²¹Odebani, phap de thiyaba jang bisar khlai hi, jini Gabra Jisu Krista ni khlai hi thaoglao ni hayu khe jing maiphu mani khasaoma de dormo ja ri jaoyaba jang bo bisar khlai kha.