Read Dimasa 1 KORINTH 15 Bible Online

1 KORINTH 15 - Dimasa bible

1 KORINTH 15

¹Daphlungrao, duha nisi niha hamba graojma ang thi phaiyaba khe nisi mai kha, odehe lonma ha nisi songyaba khe nisi ne khna ri phin ma ang nangjao du.

²Bo hamba graojma nisi ne ang khna riba khe nisi gejeb thi thi rempha kha de nisi sogojao ma se. Thikhabo nisi gejeb thi thi remphaya kha de, nisi ni lonma haglai ja ma se.

³Grao nangdaothao ang maiyaba khe nisi ne ang thi du: Krista de Madai ni laisi ni grao lai ning jing phaphirao ni khlai hi bo thih hi,

⁴bo phipjao dada, Madai ni laisi ha dong ba lai ning bo de saintham ha baijaphin hi,

⁵Kipha niha bo nujao hi, jhigin buthu nihabo bo nujao ba.

⁶Boni yaohon ha se phinsi ha daphlung rja bowa thane bangdaoyaba buthu niha bo nujao hi, bo buthu ni bising ha bangdao hi hamhi ning dong, thikhabo gejesi de thu lang la kha.

⁷Odehe Jakob niha nujao hi, boni yaohon ha se khrip haijaoyasarao niha bo nujaophin ba.

⁸Bo yaohonthao hade, boni bubli soya hi hajaiba lai ani habo bo nujaophai ba.

⁹Ang de dangyasarao ni bising ha khasidao thaoyaba, Madai ni longjom khe ang dukhu ri bani dangyasa jama nebo ang gathaya.

¹⁰Thikhabo, ang asaba ja khabo Madai ni khasaoma jang se ang ja ba, ani gede boni khasaoma haglai niya, thikhabo ang bonsi khrip thanebo dukhubo khlai kha, thikhabo ani ha dongyaba Madai se dang ba.

¹¹Odebani, angbo, bonsibo olei ning jing thi re, nisi bo olei ning lon la kha.

¹²Krista de githi ni phrang baijaphin kha thihi nisi thikha de, nisi ni bising ha gejesi bedehe githi baija phinyaba giri thihi nisi thiphu ba?

¹³Githi baija phinyaba giri thikhala Kristabo thangphin nang niya;

¹⁴Odehe Krista thang phinya kha de, ang grao thiyaba de musi niya jama se, nisi ni lonma bo musi niya ja ma se.

¹⁵Subung githirao baija phinya thiyaba grao gibi se thikha de, Madai ning Krista khe baija ri phin nang niya, Madai ning bokhe thangphin ri kha thihi jing sakhi rikha bani, Madai jayaba khe gibi niya thiyaba jing ja ma se.

¹⁶Subung githirao khe mathang phinya kha la, Krista khe mathang phin nang niya thi.

¹⁷Krista thangphinya kha de, nisi ni lonma de haglai ja hi, nisi ni phap buthu ha ning nisi dong la ma se.

¹⁸Ode thikhade, Krista ha thuyarao bo, bonsi jamyaba ja ma se.

¹⁹Krista ha jing asa dengyaba khe dini dakhna ha thang hi dong mani se ning thikha de, khrip subung ni bising ha khasao sisi jadao thaoyaba jing ja ma se.

²⁰Thikhabo, Krista de githi ni bising ni phrang gibi jang thangphin kha bani, githirao baija phinyaba ni hoja se.

²¹Subung saosi ni khlai hi thilam sophai ba, subung saosi ni khlai hi ning subung githi baija phinyababo sophai ba se.

²²Adam ha khrip subung thiba lai ning, Krista ha khrip subung mathang riphin jao ma se.

²³Thikhabo, khrip subung jar jarni bubli ha ja ma se; sagangthao ha Krista baija phinyaba ni hoja, boni yaohon ha se, bo phaiba ha boni subung jayarao baija ma.

²⁴Ebo ni yaohon ha se jamthaoyaba de sophai ma. Bisar khlaiyaba buthu, grao ni hukhum buthu odehe khrip khusi ni raothai sjam kha se, Bupha Madai niha Raja ni raji khe bo yaopha ma.

²⁵Boni sotrurao khrip khe jarni igah bakhla ha deng tharya si de, Krista de bisar khlaiginyaba se.

²⁶Yaohonthao ni sotru sjam jaoginyaba de thilam se.

²⁷Madai ning khrip jadi khe jarni igah ni bakhla ha bo deng kha, thihi Madai ni laisi thi du. Khrip jadi thiyaba grao ni bising ha Madai de dongphaya thihi ragao sisi nujao du.

²⁸Boni bakhla ha khrip jadi dong riba ni yaohon ha de, boni basa khe ning boni bakhla ha khrip jadi khe dengyaba Madai ni bakhla ha deng jaoyaba ja ma, Madai de khrip ha khrip jadi se.

²⁹Niyakha la, baija phinyaba giri kha la, githi ni baslai ha baptisma la riba la snadi ortho ja ma? Githirao baija phinyaba giri thikha la, snadi jabani subung buthu githirao ni baslai ha bonsi baptisma la ba?

³⁰Sumjabani jingbo ebo gontha gontha ha gablaoyaba ha jing dongsong ba?

³¹Daphlungrao, jini Gabra Krista Jisu ha nisi khe ang hamsi ning sangga bani, sainmidi ang thih re odehe ang thi du.

³²Subung ni baothai lai haglai biglai Ephesi nolei ha hagra ni mih rege buthu jang nanglai kha la, anthane khlai hi snadi lab ja ma? Githirao thangphinyaba giri kha de, Phai, jing jilai nang, linglai nang, bede thikhade dakhna jing thih lang lama se.

³³Da thokhi jao lah. Hamya lugu jang dongthai hamba khe hamya khlai re.

³⁴Smao hi baija lah, ode phap da khlai. Nisi ni bising ha gejesi de Madai khe mithiya, ebo khe nisi laji mani ang thi du.

³⁵Thikhabo, sereba, Githirao de bede thanghi baija phin ma? Ode, snadi saomang lahi bo phai ma? thihi sing la phu re.

³⁶Ning gibir subung! Ning asaba khe gai du, bo thiya khade mathang phin jaoya.

³⁷Odehe, ning gaiyaba de saomang ha dongphai mane ning gaiya, boni bumuh ni bogrong khe se ning gai ba. Maimu ja thing, maigrong buthubo ja la phu re.

³⁸Thikhabo, Madai se bede nangjao du olei se bo sao hain ri ba; odebani, jadi gibin gibin buthu khe bonsi ni saomang ne bo ri ba.

³⁹Saomang khrip de baosi jatharya, thikhabo subung ni khlai hi saomang jadi si dong, mih ni saomang gibin, dao ni bumang gibin, nah ni bumang gibin se.

⁴⁰Sorgo ni saomang buthu dong, phirthi ni saomang buthubo dong; thikhabo sorgo ni saomang ni muima de jadi masi se, sathrai ni muima bo baosi jaya.

⁴¹Sain ni muima de jadi si se, dain ni muima de jadi gibin se; ode sathrai buthu ni muima de gibin ja kha, sathrai ni muima bo baosi jaya.

⁴²Githi baijaphinba bo olei jasosi ning, gai hi dongyaba de sao phudu, thikhabo mathang phinyaba de sao phuya kha.

⁴³Bakhan khlaiyajao hi bo gaijao ba, muima jang bo thanghi baija ba.

⁴⁴Subung ni saomang ha bo gaijao ba, bese ni saomang ha bo thang hi baija ba; subung ni saomang ha bo dong khade, bese ni saomang habo bo dongma se.

⁴⁵Olei jasosi ning, sagangthao ni subung Adam de subung gathang japhai ba thihi reb du. Yaohon ni Adam khe hayu riyaba de bese se.

⁴⁶Thikhabo, sagang dong dayaba de bese gede ni niya, saomang gede ja phaiyaba se, ebo ni yaohon ha se bese gede bo dongphai ba.

⁴⁷Sagangthao ni subung de phirthi ni subung, hah jang se bo slam ba; subung maginyaba de sorgo ni se.

⁴⁸Hah jang slamyaba subung buthu de hah jang slamyaba sagang ni subung lai ning, sorgo ni subung buthu de bonsi sagang ni sorgo ni subung lai ning.

⁴⁹Hah jang slamyaba subung de saogari baosi jini miliba lai ning, sorgo ni subung lai jing ja ma se.

⁵⁰Daphlungrao, saomang jang thijao de Madai ni Raji khe maiphu nang niya, sao phuyaba de sao phuyayaba khe la la phu nang niya, thihi nisi khe ang thi du.

⁵¹Nai lah, grao makhao nisi khe ang thi du. Jing khrip de thu thar nang niya,

⁵²thikhabo, yaohonthao ni bibul dam kha ning, srap khlai hi, muphrip gasi ha jing slai jaothar ma se. Bibul khe bonsi dam ma ning; boha se githirao khe sao phuyayaba thang hi baija nang, jingbo slaijao hi jing gibin dong ma.

⁵³Ebo saomang sao phuyaba de sao phuyayaba khe phin hi, ebo saomang thih phuyaba bo thih thaoyayaba khe asaba dara jang phin ma se.

⁵⁴Ebo sao phuyaba sao phuyayaba khe phin hi, ebo thih phuyaba thih thaoyayaba khe phin kha ning, Madai ni laisi bajap ni grao, Deyaba jang thihyaba khe phura molo thar kha thiyaba phura ja nang!

⁵⁵O Githi, ning deyaba braha dong? O Githi, nini bis la braha dong? thihi rebyaba sophai kha.

⁵⁶Thiyaba bis de phap se, phap ni raothai de dara se.

⁵⁷Thikhabo, jini Gabra Jisu Krista ni khlai hi deyaba khe jinthane riyaba Madai niha ning khajama ni grao dong thing!

⁵⁸Odebani, ani daphlung hamdao thaoyarao, raothe the jahi smao phuya si, Gabra ni khusi khe khah muh rihi dang lai lah, bede thikhade, nisi dukhu jayaba de Gabra ha haglai jaya thihi nisi tharmai du.