Read Dimasa 1 KORINTH 9 Bible Online

1 KORINTH 9 - Dimasa bible

1 KORINTH 9

¹Ang sadin jaya kho? Ang haijaoyasa niya na somo? Jini Gabra Jisu Krista khe ang nuya kho na somo? Nisi de Gabra ha ang khusi dangyaba ni bathai buthu niya na somo?

²Subung gibin buthu ni khlai hi ang haijaoyasa niya la khabo nisi ni khlai hi de ang ning. Gabra ha ang khusi dangya bani sin de nisi ning ja kha.

³Bo ang khe sijiyarao niha ang grao thiphinyaba de ebo ning ja kha.

⁴Jing jiba lingba ni balam ha de jing phantha mai nang niya na somo?

⁵Haijaoyasa gibin buthu, Gabra ha daphlungrao, odehe Kipha thu lai, lonyaba masainjik jing langpha phuya na somo?

⁶Niyakha la, ang jang Barnaba se ning khusi dang hi ji mani hukhum maiyaba na somo?

⁷Jar khe khrang hi siphaiya ha sere dong re? Boni bathai khe jiya hi sere grep ni bari khe slam re? Niyakha la, boni gakher khe jiya hi sere mih buthu khe naiso re?

⁸Ebo grao khe subung ni baothai jang ang thiba na somo? Dara ni grao habo elei ning thiya na somo?

⁹Moses ni dara ha de, Musu jla sam waiba ha boni bukhuh khe da kha, thihi reb du. Madai musu jla khe gibi jang bao ba?

¹⁰Jinthane khlai ni ning bo thiya na somo? Ja du dou, jinthane khlai hi ning reb ba se. Bede thikhade haijaoyaba de asa khlai hi jao la thing, mai naoyaba bo phantha mai mani asa khlai hi nao la thing.

¹¹Jing nisi ni bising ha bese gede ni jinis buthu khe gai hi, saomang buthu ni jinis buthu khe nisi ni phrang ra lakha bo, jing hamsi ning lab ja nang?

¹²Subung gibin buthu jang nisi ni phrang oleiyaba jinis khe bonsi khemotha ja kha de, jing la ar khemotha ja dao nang niya? Thikhabo, bo hukhum khe jing yaowaiya, khemotha jaba thane jing Krista ni hamba graojma thaoya mani khlai hi, khrip ha jing dukhu khlai re.

¹³Bokhoh ha khusi dangyarao ning malai ni jinis ji hi, khapra ha khusi dangyarao de khapra ha bandai ni jinis yaophayaba buthu khe bonsi jibai re thihi nisi mithiya na somo?

¹⁴Olei jasosi ning, hamba graojma khe sainthiyarao ji mani Gabra ning salai du.

¹⁵Thikhabo ang de asaba phantha bo masi jahibo ang khusi ha phnangya, odehe eleiyaba jinis khe nisi dang mani ebo grao khe ang rebya. Ang sagangyaba khe musibo niyahi nisi ang khe slam ba thane de, thiba khebo ang nangjaodao.

¹⁶Hamba graojma khe ang sainthi la khabo, anthane khlai hi sangga mani musibo giri, dangya hi jaya ani basao ha se bonsi asa deng ba. Hamba graojma khe ang sainthiya khade ani bubain hamsi ning risi ma se.

¹⁷Jarni khusi jang grao thikha de, yaosandi bo ang mai ma se; jarni khusi jang grao sainthiyaba ang niyakha de, hamba graojma naisoyaba khusi khe nisi ne deng riyaba asaba dara jang ang ning ja kha.

¹⁸Thikhala, ani yaosandi la snadi ja nang? Hamba graojma khe khna riba ni maiginyaba khebo ani hok khe maiya hi, magna ni hamba graojma khe ang sainthi phuyaba ning ani yaosandi ja kha.

¹⁹Asaba ni leng ang jaya la khabo, gabang subung laphu mani khlai hi, khrip subung ni leng ha ang jar khe jar slam la kha.

²⁰Judarao khe ang labu phu mani khlai hi Judarao ni bising ha Juda jadi lai ang dong ba; Dara ni grao ni bakhla ha ang dongya la khabo, Dara ni bakhla ha dongyarao khe ang labu phu mani khlai hi, Dara ni bakhla ha dongba lai ang yaowai re.

²¹Olei jasosi ning, Dara giriyarao khe ang labu phu mani khlai hi, Dara giriyarao ne khlai hi Dara giriyarao lai ang dong re (Madai ni dara khe maniya jaya hi, Krista ni dara khe mani hi ning).

²²Subung raoyayarao khe labu phu mani khlai hi, bonsi ni bising ha raoyayarao lai ang dong re. Olei jasosi ning, asaba lama gede smai hi, gejesi subung khe ang sogo phu mani khlai hi khrip jadi ni bising ha gibin gibin dongthai jang ang dong re.

²³Hamba graojma ni khlai hi bo khusi buthu khrip khe ang dang re, bonsi jang baosi hamba graojma ni hamthai buthu khe ang maipha phu mani khlai hi.

²⁴Khaiba baidai laiyarao de bonsi khripbo khailai du; thikhabo saosi se ning yaosandi mai re thihi nisi tharmaiya na somo? Olei ning yaosandi mai mani khlai hi khai lah.

²⁵Khaiba badai lai ba ha gabayarao de khrip jadi ha jar khe sao dung ri re; bonsi de Raja ni khrothu hamya ja phuyaba khe mai mani khlai hi bonsi dang re, thikhabo jing de Raja ni khrothu hamya jathaoyayaba khe mai mani khlai hi se jing dang ba.

²⁶Odebani, angbo thang mani lama khe hamsisi tharmai hi ang khai du, bar khe doba lai haglai ang doya;

²⁷Ani saomang khe ang bol jang dohi dohi, ang leng ne jar khe slam re; ode niyakha de, gibin subung buthu niha grao khe bai bani yaohon ha, ang jarbo dangkhlai jao ma se.