Read Dimasa 2 KORINTH 1 Bible Online

2 KORINTH 1 - Dimasa bible

2 KORINTH 1

¹Madai nangjaoyaba lai Krista Jisu ni haijaoyasa, Paul jang jini daphlung Timothe de, Korinth raji ha Madai ni longjom ode Akaia raji bubim ha khrip subung gatharrao niha:

²Jini bupha Madai ode Gabra Jisu Krista ni phrang khasaoma jang santi nisi niha dong pha thing.

³Khasaoma buthu ni bupha jang khrip santi ni Madai, jini Gabra Jisu Krista ni bupha Madai de bakhan ja thing.

⁴Madai jing khe boni santi jang ning, khrip jadi dukhu khlaiyarao khe jing santi ri phu mani khlai hi, jar ning bo khrip dukhu khlaiyaba khrip habo jing khe santi ri re.

⁵Bede thikhade Krista dukhu khlaiyaba ha masi jaba lai ning, Krista ni khlai hi, santi habo jing masi se.

⁶Ang dukhu khlaiyaba de, nisi ne santi ode nisi khe sogo mani khlai hi se; ode santi mai kha de, ebo santi de nisi ni khlai hi se; bo santi de jing dukhu khlaiyaba buthu lai khah lao hi nisi bo dukhu buthu khe nisibo phantha mai ba se.

⁷Jini dukhu buthu ha nisi jing jang baosi dukhu khlai pha bani, jini santibo nisi jang masi jama se thihi jing tharmai bani, nisi niha jing asa dengyababo mao nang niya.

⁸Daphlungrao, Asia raji ha jing dongba ha, jini basao ha dukhu sophaiyaba buthu khe nisi tharmaiya mane ang nangjaoya. Olei dukhu ajao phuya bubain risi jang bo ang khe baosep hi, thang nang thihibo jing asa ning khlaiya kha.

⁹Gibi jang ning, jing de thima ning nangma ja kha thihi jing bao ba. Thikhabo, bo jinis khe, jini gede asa dengya hi, githi khe mathangyaba Madai niha jing asa dengdao ma nang du.

¹⁰Thi laphuyaba khinthao thaoyaba ni phrang bo ning jing khe sogo kha, bo jing khe sogo phin nang, bo jing khe sogo phin pha lang ma se thihi jing asa deng du,

¹¹nisi Madai biyaba buthu ha asaba dara jang juru lah, odese, khrip subung biyaba buthu ni khlai hi hamthai jing mai bani; gabang subung jini baslai ha khajama ni grao thiphu ma.

¹²Jini asa de ebo se: Phirthi gede ni girikma jang niya hi, Madai ni khasaoma ni khlai hi se ning, habsao ha jini dongthai, Madai ni phrang leng ni dongthai gathar gibi gibiyaba khe lahi jing dong re; bokhe nisi ni bising ha ar jadao kho thihi jini hamba hamya tharmaiyaba habo jing khe mithi pha du.

¹³Nisi phuri phu mani nisi buji phuyaba ni gibin jinis musi khebo nisine khlai hi jing reb haya; jamtharsi nisi buji mani ang asa khlai du.

¹⁴Elei sosi nisi ang khe mithiyaba ha de, Gabra Jisu ni basain ha jing buthu khe sangga phu nang, jing khebo nisi sangga phu nang thihi ang asa deng du.

¹⁵Ebo jinis hade ang ragao sisi se bani khasaoma alang gin nisi maiphu mani khlai hi nisi niha ang sagang thang da ma bao ba.

¹⁶Makedonia raji ha thang ba lamai jang nisi niha phai ba, Makedonia raji ni phrang ang phaiphin ba ha nisi niha ang phaiphin nang thihi bao du. Oraha ni phrang de Juda raji gede ang thang ba ha nisi ang khe digar jaoma bo ang nangjao ba.

¹⁷Ebo jinis khe ang bisar khlai ba ha khah ha ang ragaoya na? Ang jinis baoyaba de habsao ni subung buthu lai bo hatho ha, jadu jadu thihi, ode bakhali de jaya jaya thihi ang haglai thi ba na?

¹⁸Madai ni grao gibiyaba de gabang ragao ba lai ning, nisi ne khlai hi jini grao bo, bakhali ha jadu thihi ode bakhali ba jaya thiba lai de niya.

¹⁹Sila jang Timothe odehe ang nisi niha jing bai phayaba Madai ni basa Jisu Krista de jadu jang jaya dopha laiya; boni hade Jadu thihi se ning dong ba.

²⁰Madai grao hanggaiyaba khrip bo boni ha de jamthar si, jadu gaja se. Odebani, jini bising ha Madai ni muima ni khlai hi, Jisu Krista ni khlai hi jing Amen thihi thi ba.

²¹Krista ha nisi jang jing khe rao riyaba thao huyaba de Madai se.

²²Boni ha jing khe sin riyaba Bese Gathar riyababo bo ning.

²³Thikhabo, jing khe sakhi ri mani khlai hi ang Madai khe long du; nisi khe mathao mane Korinth nogor ha ang thangyaba se.

²⁴Nisi ni lonma ni basao ha raja jama ang baoya; lonma ha nisi rao hi song bani khlai hi nisi khajama ni khlai hi nisi jang baosi ang khusi dangyaba se.