Read Dimasa GALATIA 2 Bible Online

GALATIA 2 - Dimasa bible

GALATIA 2

¹Nokha maithai jhi bri ni yaohon ha, Tita khe bo langpha hi, Barnaba jang baosi Jerusalem ha ang thangphin ba.

²Odehe, tharmai riyaba dong bani ang daokhu lang hi, Jentailrao ni bising ha hamba graojma baipha lang hi bonsi khe ang thi ba. Thikhabo, subung dedaoyarao khe bo gibin khlai hi bujai ba, ode niyakha de, bo haglai ang khai ba ja ma se. Niyakha la, ang haglai khai ba jajao nang.

³Thikhabo, Tita ang jang baosi dongyaba bo Greek jadi ja lakha bo jogai bujuh raso mane bo riya kha,

⁴Mosol daphlung, ebo subung buthu jini bising ha hap hi, Krista ni phrang jing maiyaba sadhin khe nainai mane bonsi jing khe leng slam ma bao ba.

⁵Thikhabo, hamba graojma gibi ja mani grao khe nisi niha dongsong phu mani khlai hi gontha si jahi bo bonsi ni bakhla ha hap hi bonsi ni grao khe ang maniya.

⁶Odehe, subung dedaoyarao ni bising ha bonsi bujai jaoyaba bo (bonsi esa lai subung ja la khabo ani khlai hi gibin jaya, Madai saosi khebo gibin naiya) bonsi subung dedao hi bujai jaoyarao bo ang khe musi dibinya.

⁷Ebo buthu thane jogai bujuh rasoyarao ni hamba graojma Peter niha deng riba lai, jogai bujuh rasoyayarao ni hamba graojma ani ha deng riyaba dong thihi bonsi mithi du.

⁸Jogai bujuh rasoyaba ni dangyasa ja mane Peter ne khlai hi deng riyaba jar ning Jentailrao ni haijaoyasa ja mane ani khlai hi bo deng ri du.

⁹Khasaoma a ne riyaba khe bonsi tharmai hi Jakob thu, Kipha thu, Johan thu, longjom ni thong bonsi dengjaoyarao, jing Jentailrao ni bising ha thang mane, ode bonsi khripbo jogai bujuh rasoyarao niha thang mane, ang jang Barnaba khe lugu khah mani yaoda ni yao jang jinthane bo yaopha kha.

¹⁰Bonsi ni bising ha dukhi sarao khe nalai bo wainso song mani khlai hi bo jinthane grao galang ba, bokhe ning ang dang ma bao ba se.

¹¹Thikhabo, Kipha khe Antiokei ha phaiba ha, siji dada bo dong bani boni mukhang ha ning ang bokhe jo ba.

¹²Bede thikhala, sereba subung buthu Jakob ni phrang phaiya saniha de bo Jentailrao ni bising ha ji re ling re; thikhabo, bonsi sophai ba jang jogai bujuh rasoyaba subung buthu khe khin bani yaohon druphin hi, bonsi baigo ma bao ba.

¹³Juda gibin buthu bo giriklai thar kha; odebani Barnaba sosi bo bonsi ni giriklaima jang sikphajao lang la kha.

¹⁴Thikhabo, hamba graojma grao gibi lai bonsi hamsi dongya thihi ang tharmai dada, Kipha khe bonsi jamthar si ni sagang ha, Ning Juda jadi jahi, Juda lai dongya hi, Jentailrao lai ning dong ba. Snadi jabani Jentailrao khe Judarao lai ning bol jang dong ri ba? ode ang thi ba.

¹⁵Jing de Jentail subung hamyayarao niya hi, Juda jadi ha ning hajaiyaba se.

¹⁶Thikhabo, Dara jang khusi dang bani subung gibi jaya, Jisu Krista khe lon kha se ning gibi ja ba thihi jing tharmai du. Jingbo Dara ni khusi jang niya hi Krista khe lon bani gibi jahi jing dongphu mani khlai hi, Krista Jisu khe jing lon du; Dara ni khusi jang saosi bo gibi jahi dong nang niya.

¹⁷Krista ha gibi jahi jing dong mani chesta khlaiyaba, jing ning jar khebo phapi baola kha de, Krista de phap khusi dangyaba ja nang niya?

¹⁸Braha jama, ang jinis ruyaba buthu khe ang dangphin kha de, hamya khlaiyaba ang ning ja kha thihi tharmai riyaba ja ma se.

¹⁹Madai ni gede ang thanghi dong phumane khlai hi ang Dara ni khlai hi Dara ni gede ang thih kha.

²⁰Krista niha ang dikpha jao kha. Thikhabo ang thang hi ning dong. Duha thanghi dongyaba ang niya kha, Krista se aniha thanghi dong ba. Ode, duha saomangbo ang thanghi dongba de, lonma ha se ang thanghi dong ba. Madai ni basa, ang khe khasaoyaba, ani baslai ha jar khe riyaba, boni lonma ha.

²¹Madai ni khasaoma khe ang haigerya. Dara ni khlai hi dormo jakha de, Krista thihba de haglai ja ma se.