Read Dimasa EPHESI 1 Bible Online

EPHESI 1 - Dimasa bible

EPHESI 1

¹Paul, Madai ni nangjaoma ha Krista Jisu ni haijaoyasa jahi subung gathar Ephesi ha dongyaba, Krista Jisu ha subung lonma gnangrao niha thi du:

²Madai, jini bupha jang Gabra Jisu Krista ni phrang khasaoma jang shanti nisi niha dongpha thing.

³Jini Gabra Jisu Krista ni Madai jang Bupha de bakhan jahi ning dong thing. Bo ning sorgo ni hathan buthu ha Bese ni gede khrip jadi hamthai riyaba jang Krista habo jinthane hamthai ri kha.

⁴Hamjaoma ha ode gajai giri hi boni sagang ha jing gathar dongphu mani khlai hi phirthi sangsai mani sagang ha ning Krista ha bo jing khe saikho kha.

⁵Boni khasaoma jang Krista Jisu ni khlai hi, Madai jing khe boni basa-bisik slam ma bao ba, ebo ning boni khajathai ar baothai.

⁶Boni khasaoma muima jathai ni khlai hi, ar boni maya ni Basa ha jinthane bo riyaba yaosandi ni khlai hi, dei jing Madai khe bakhan khlai nang!

⁷Bede thikhade, Krista ni thijao ni khlai hi boni ha jing khoyaba khe mai kha, boni khasaoma bangthai lai ning, jini gajai buthu khe bo map khlai du.

⁸Bo khasaoma khe bo jar ning girikma jang ode bujima jang bo jini basao ha ri kha.

⁹Boni nangjaothai grao dengkhaoyaba, bo khah ha nangjao daothao boni ha bo dang ma baoyaba khe jini ha tharmai ri hi,

¹⁰sothar ba bubli ha khrip jadi sorgo ha dongyaba buthu ar phirthi ha jinis dongyaba buthubo Krista ha, bo jar ning khajom mani khlai hi se.

¹¹Madai ni bisar ni baothai ode nangjaothai lai khrip jadi dangma baoba lai saikho da jaoyaba jablai hi, ja mani khlai hi jing don slam jaoyaba se.

¹²Jing Krista ha sagang ni phrang asa dengdayarao boni muima khe bakhan khlai ginyaba jing ning ja kha.

¹³Boni ha ning nisi bo grao gibi, sogolam ni hamba graojma khe nisi khna hi, lonbabo nisi lon bani yaohon ha, nisi boni ja kha thihi Bese Gathar grao hanggaiyaba ni sin khe nisi ni basao ha ri kha.

¹⁴Bo Bese, Madai ni muima jathai khe bakhan khlai mane khlai hi, boni ning jayaba buthu khe khoba ha jini don phantha ja mane hanggaiyaba se.

¹⁵Odebani, Gabra Jisu ni lonma nisi niha dongyaba ode, khrip subung gatharrao ni basao ha nisi ne phnu riyaba hamjaoma khe angbo khna hi,

¹⁶nisi ni khlai hi khajama ni grao sainthiba khe ang haigerya, ode ang jar biba buthu habo nisi khe wainso pha ha du;

¹⁷bede thikhade, jini Gabra Jisu Krista ni Madai, muima ni Bupha de, bo jar tharmaiyaba balam ha gyan jang jna mani Bese khe bo ri thing.

¹⁸Nisi ni khah ni muthai buthu jna rijao hi ebo buthu khe nisi tharmai phu ma;

¹⁹bo longyaba khe asa jayaba, subung gathar buthu ha boni don phantha de besi de du, boni bol raothai jang dangba lai, jing bo khe lonyarao ni gede bo khusi dangphuyaba raothai khe bo dang phuyayaba khe Krista ni basao habo dang ba.

²⁰Bo raothai jang Krista khe subung githi ni gejer ni phrang bo baija riba ha, sorgo hathan buthu ha boni yaoda ha bokhe kham ri ba.

²¹Raja jayaba buthu, hukhum buthu, raothai buthu, khrip bisar khlaiyaba buthu ni basao ha, ode dini, dakhna, ode bubli sophai ginyaba habo khrip jadi bumu ni basao ha bokhe hoja deng kha.

²²Khrip jadi jinis buthu khe boni igah bakhla ha bo deng hi, jamthar si khrip ni basao ha bokhro ja mani khlai hi longjomrao niha bokhe ri ba.

²³Longjom de Krista ni saomang se, khrip ha sothar si gablaiyaba bo ning.