Read Dimasa EPHESI 3 Bible Online

EPHESI 3 - Dimasa bible

EPHESI 3

¹Odebani, ang Paul, nisi Jentailrao ni khlai hi Krista Jisu ha phatho ha dongyaba, Madai niha bi du.

²Nisi ni gede Madai ni khasaoma jang naiso mane khusi a ne riyaba khe nisi sagang ha ning mithinai kha.

³Olei nujaoba ha Krista grao dengkhaoyaba tharmai rijao hi ang dongyaba grao khe sagang ha ning songthe the ang reb kha,

⁴ang raoyaba grao khe nisi alang alang phuri kha de, bo Krista jang sainthijao hi ang tharmaiyaba grao khe nisibo buji nang.

⁵Madai ni Apostol gatharrao ar gorasali gatharrao niha Bese jang duha khna riba lai jasosi, ebo grao thiyaba khe subung buthu niha bo sainthi ba giri.

⁶Bo grao dengkhaoyaba de hamba graojma ni khlai hi Krista Jisu ha de Jentailrao ode Israelrao ebo don phantha ja mani saomang mang si, ode nokhor si jahi dong mane, ode grao hanggaiyaba khe mai mane jini phantha se.

⁷Boni raothai khe yaowai hi Madai ni khasaoma jang bo jinis magna bo jinthane mai rihi, bo hamba graojma ni dangyasa nebo ang khe slam kha.

⁸Ang subung gathar khrip ni bising ha khrip tha khasi daothao ni bising ha khasi daoyaba niha se bo khasaoma khe ri ba: Krista gnang jathai khe thihi thisophuya graojma khe Jentailrao niha sainthi mane ode,

⁹grao deng khaoyaba gada ni phrang khrip jadi sangsaiyaba Madai niha grao hui hi dengyaba khe snadi thihi khrip subung ne khna ri mane,

¹⁰odebani duha longjomrao ni khlai hi, Madai khrip jadi gyan ni hoja jayaba, ode hukhum gnangrao sorgo thani basao ha dongyaba khe nisi khna rihi dongphu ma.

¹¹Jini Gabra Jisu ha bo dang ma baoyaba, boni thaoglao bisar lai ning.

¹²Krista Jisu khe jing lon bani sahos jang boni ha sahos jahi jing hap phu kha.

¹³Odebani, nisi ni khlai hi ang dukhu jayaba buthu ni khlai hi gmang giji jaya mani ang nisi khe khainsu du, bo buthu de nisi ni muima se.

¹⁴Odebani, Bupha ni sagang ha de ang yasgu thuhi gonggalai re.

¹⁵Bo de phirthi jang sorgo ha dongyaba khrip nokhor bumu maiyaba se.

¹⁶Boni muima bang ba lai jasosi ning, boni Bese ni khlai hi subung ni khasu gede ha se raothai ha rao rihi nisi khe dengphu mani ode,

¹⁷Krista khe lon bani khlai hi nisi ni khasu bising ha bo dongphu mani khlai hi, odehe hamjaoma ha jura rempha hi ode, asa deng hi dong dada,

¹⁸Khrip subung gatharrao jang baosi bislei de du, bislei lao du, bislei thu du, bislei ju du, nisi ragao si tharmai phu nang.

¹⁹Krista ni hamjaoma tharmaiyayaba khe ning tharmaiyaba khe mai hi, Madai ni gede khrip jadi sothar si ha gablai dada nisi dong phu mani khlai hi.

²⁰Jini ha dangyaba raothai lai jasosi ning, jing sainyaba ode baoyaba khrip thane bangdao hi dangphuyaba niha ning,

²¹thaoglao jang khrip greng sosi longjom ha ode Krista Jisu ha ning muima dong thing. Amen.