Read Dimasa EPHESI 6 Bible Online

EPHESI 6 - Dimasa bible

EPHESI 6

¹Ansarao, Gabra ha ning nini buma bupha ni grao khe mani lah, bede thikhade ebo grao gibi se.

²Nini buma bupha khe bakhan khlai lah, ebo ning sagangthao dara riyaba se:

³Odese, ninthane khlai hi ham nang, phirthi ha bo gabang basain thang hi dong ma, thi du.

⁴Nisi buma-bupharao, nisi ni basathu khe thamsi da baigo ri lah, Gabra slingriyaba ode sibringyaba ha ning naiso lah.

⁵Lengrao, Krista ni grao khe nisi maniba lai, khinhi the the mao hi, khah gibi ja dada, nisi ni bubrarao ni grao khe mani lah.

⁶Subung khe khaja rima baoyaba buthu lai bonsi nuba ha se ning, khusi dangya hi, Krista ni leng lai khah jang muh jang Madai nangjao ba lai dang lah.

⁷Subung ni khusi dang ba lai niya hi, Madai ni khusi dangba lai jadao hi khajama jang khusi dang lah.

⁸Leng ja la khabo, jaya la khabo, khrip subung hamba dangyaba buthu khe Gabra ni phrang olei ning maiphin ma se thi hi wainso lah.

⁹Nisi hojarao, nisi ni lengrao ni basao ha, olei jasosi ning dang lah. Bonsi ni ar nisi ni hoja de sorgo ha dong thihi ode, bo de subung nangjaodao nangjaoyadao bo jaya thihi tharmai hi da jothai lah.

¹⁰Yaohonthao ha de, Gabra niha ode boni raothai ni bol ha ning rao hi dong lah.

¹¹Soithan phuslaiyaba buthu khe de mani khlai hi Madai ni yaodi khe phura sothar si khapha lah.

¹²Jing soleiyaba buthu thijao ode saomang niya, gedebarao ode hukhum gnangrao ode, dini dakhna ni andar ni basao ha habsao bisar khlaiyarao, nokhasao hathan buthu ha bese hamya dongyaba buthu jang se nanglai ba.

¹³Odebani, sain hamya sophai ba ha nisi gaso phu mani ode, nisi gaso phu bani yaohon habo nisi song hi dongphu mani khlai hi Madai ni yaodi khe phura sothar si thu lah.

¹⁴Odebani, nisi ni jengkhong ha grao gibi khe khapha hi dormo ni phi khe pha hi,

¹⁵milima ni hamba graojma salaiyaba khe nisi ni igah ha gain hi song lah.

¹⁶Ebo buthu khrip jang baosi, lonma ni phi khe la dada, odese subung hamyayarao ni bla waikham phuyaba khrip khe nisi sthaiphu ma.

¹⁷Ode, sogoma ni khrothu jang bese ni seng, Madai ni grao khe, la dada,

¹⁸bi dada ode khrip jadi sain hi, asaba bubli ha bo bese jang bi hi, boni balam ha ning subung gatharrao khrip ne khlai hi khah jang muh jang sain hi, smao dada dong lah.

¹⁹Hamba graojma grao makhao khe khitha rao hi bai mani ani khuh khe ang khru hi ang grao sainthi phuma ni khlai hi ani khlai hibo nisi sainpha ri lah.

²⁰Bo hamba graojma ni khlai hi sikhol gainyaba ang se. Boni balam ha ang thima nangjaoba lai khitha raoma jang ang thiphu mani khlai hi anthane sain ri lah.

²¹Ani yaowaithai jang ang khusi dangyaba buthu khe nisi tharmai phu mane khlai hi, Gabra niha daphlung hamdaothao dangyasa lonma gnang Tukik ning jamthar si nisi khe thi nang.

²²Olei bani ning bokhe nisi niha ang haiha ba se. Bede thikhade, jini balam ha nisine sainthi mane ode, nisi ni khah buthu khe shanti ri mani khlai hi ang haiha ba se.

²³Bupha Madai jang Gabra Jisu Krista ni phrang shanti jang lonma dongyaba hamjaoma de daphlungrao niha ning dong thing.

²⁴Jini Gabra Jisu Krista khe thaoya si hamjaoyarao khrip ni basao ha khasaoma dong pha lang thing.