Read Dimasa PHILIPPI 4 Bible Online

PHILIPPI 4 - Dimasa bible

PHILIPPI 4

¹Odebani, ani hamdaothao ode ang gabang wainsoyaba lugurao, ani khajama ode ani khrothurao, ani hamdao thaoyarao, olei jasosi ning Gabra niha raohi song lah.

²Gabra niha ning khathai masi ja mani khlai hi Eudia jang Suntuki khe ang bujai du.

³Ningbo ani jowal pha hi dukhu khlaiphaya ba, ning khebo ang khainsu du, bo masainjik rao khe juru lah; bonsi de Klemen jang ani khusi dang ba dukhu khlaiphayaba, hayu ni laisi ha bumu gakhuyarao jang baosi, hamba graojma khe baiphlungba ha bonsi ang jang hamsi ning lengpha kha.

⁴Gabra niha nisi nalaibo khaja lah, ang thiphin du kho, khaja lah.

⁵Nisi ni khahlaoma khe khrip subung nu thing. Gabra de gabasi ning dong;

⁶asaba habo khah waimu da nang, asaba khe bo Madai bi dada ode sain hi nisi jinis nangyaba buthu khe, khajama ni grao thi dada, Madai niha khna ri la thing.

⁷Odese, Madai ni shanti, khasu ha thiso phuya si nisi ni khah ha ode nisi ni baothai buthu khe Krista Jisu ha nisi khe bo raokhi hi deng ma se.

⁸Odebani daphlungrao, yaohonthao ha, asaba grao gibi ja thing, ode man gnang ja thing, ode hamba ja thing, ode majangyaba ja thing, guju baojaoyaba ja thing, ode grao hamba sainlaiyaba ja thing, asaba majangyaba ja thing, asaba khebo bakhan khlai hi dongyaba, bo jinis buthu khe khah ha deng lah.

⁹Ani phrang nisi slingyaba buthu ode nisi ajaoyaba buthu, khnayaba buthu ode nisi nuyaba buthu khe dangso pha lang lah, odese shanti ni Madai nisi jang baosi dongpha ma.

¹⁰Ang Gabra niha hamsi ning khaja du, duha elei basain ni yaohon ha, ani balam ha nisi phin wainso ba. Gibi jang nisi jenba ni phrang bo eboni bisar dong ba, thikhabo nisi hajora maiya.

¹¹Ang baojo bani grao khe thidao ba niya, ang de esalai dong lakha bo khah ha jajao mani dongthai khe ring kha.

¹²Dukhisa ni dongthai khebo ang ring kha, gnang ni dongthai khebo ang ring kha, khrip jadi jinis ode, khrip jinis ha khusi ode hukhri jaoba ni dongthai, gnang jang baojoyaba ni dongthai ni grao dengkhaoyaba khe ang ring kha.

¹³Bo ang khe rao riyaba Krista ni khasaoma jang khrip ang dangphu kha.

¹⁴Thikhabo, ani khah waimu ha nisi ang khe wainso phayaba de nisi gabang khlai kha.

¹⁵Nisi Philippi ni subung buthu, hamba graojma khe baiphlung jenba ha Makedonia ni phrang ang baigo lang khali, nisi khe garhi saosi ni longjom bo riba baoba ni balam ha ang jang baosi gabaya thihi nisi tharmai du.

¹⁶Thessalonika ha ang dongba habo, ang juru jaoma nangba ha, phin si se ning niya hi, phin gin juruma nisi anthane haiha ba.

¹⁷Jinis riyaba khe ang smaiyaba de niya, nisi ni gede bese ha bathai thai mane se ang smai ba.

¹⁸Khrip jinis riyaba buthu khe ang mai ba bang kha, Epaphrodita ni yao ha nisi jinis rihi haihayaba khe ang mai hi, phura ja kha. Ebo buthu de bahai midim Madai khe khaja riyaba bandai se.

¹⁹Ode, ani Madai ning Krista Jisu ha boni muima bang ba lai ning nisi khrip jadi nangyaba khe nisi ne bo ri nang.

²⁰Jini Madai ode jini Bupha ni muima thaoglao thaoglao jang dong thing. Amen.

²¹Krista Jisu ha subung gatharrao khrip niha khlimyaba khe so ri lah. Ang jang baosi daphlung dongyarao nisi khe khlim ha du.

²²Subung gatharrao khripbo nisi khe khlim ha du, boni bising ha Kaisar ni nokhor ni subung buthubo nisi khe khlim du.

²³Gabra Jisu Krista ni khasaoma nisi ni bese niha dongpha thing.