Read Dimasa KOLOSSA 3 Bible Online

KOLOSSA 3 - Dimasa bible

KOLOSSA 3

¹Krista jang baosi nisi baijaphin hi dong kha de, basao gede Madai ni yaoda ha khamyaba Krista ni dongthan ha jinis dongyaba buthu khe smai lah.

²Basao gede ni jinis buthu ha ning nisi khah muh ri lah, phirthi ha jinis dongyaba buthu ha nisi khah muh da ri.

³Bede thikhade, nisi thih kha, ode nisi ni hayu de Madai, Krista niha huihi deng ba.

⁴Krista ning nisi ni hayu se, ode bo nujaophai kha ning, nisibo bo jang baosi muima jang nisi nujaopha ma se.

⁵Nisi niha habsao ni jinis dongyaba buthu khe sthai lah. Khah nang baiyaba, rege regeyaba, gaori jabaiyaba, mijing baiyaba phap, harbaoyaba, (ebo buthu de saokhuli khe khlimyaba jang baosi se) ebo buthu khe sthai lah.

⁶Ebo jinis buthu ni khlai hi se, lonyayarao ni basao ha Madai ni thamsi sophai ma se.

⁷Asaba khali ha nisi ning bo jinis buthu ha dong kha, nisi ni hayubo bo buthu ha ning dongba se.

⁸Thikhabo, duha de elei khrip jinis: thamsi raoyaba, simang gnang khah ha jajaoyayaba, siji baiyaba, ode grao gusu nisi ni bukhuh ni phrang da baigo thing.

⁹Saosi jang saosi grao mosol da thi lai, bede thikhade subung gajam ni dongthai khe boni raothai jang nisi khokhla hi,

¹⁰subung gadain khe nisi thu kha; bo subung gadain khe sothar si gyan mai mani khlai hi, jar ni saogari lai jasosi slamyaba gadain slampha lang du.

¹¹Ode, dongthai gadain ha, na Greek, bujuh rasoyaba, Jadi khe naisoyaba, Skuthia subung, leng, leng niyayaba bo musi dong daoya kha; Jisu Krista ha se ning khrip jadi dong ba.

¹²Madai subung saikhoyaba jang baosi subung gathar jahi, mayama, maigru gruyaba, basasa jayaba, grao ni hukhum bakhla ha dongyaba, dukhu suiyaba buthu khe lahi thu lah.

¹³Nisi saosi jang saosi khah laolei lah, asaba subung bo malai ni basao ha khah ha jajaoya hi nisi dongkha de, nisi saosi jang saosi khe map khlai lai lah. Nisi khe Gabra map khlai ba lai ning nisi bo map khlai lai lah.

¹⁴Ebo buthu khrip ni basao ha hamjaoma khapha lah, bo se baothai masi jayaba khe slam hi, khrip jadi khe bo khah jom ma se.

¹⁵Ode, Krista ni shanti de nisi ni khah buthu ha bisar khlai thing, saomang jomsi ja mane nisi long jaoyaba se. Khajama ne bo ring lah.

¹⁶Krista ni grao khe jarni khasu ha thao la thing. Bakhan ni rajabthai, ode Madai ni rajabthai, Bese gede ni rajabthai ni khrip jadi buddi gyan jang slingri hi sibring lai lah, ode khasu ni khajama jang Madai niha rajab lah.

¹⁷Ode, nisi dangyaba si khe, grao thiba ja thing, khusi dangba ja thing, boni gede jahi, Bupha Madai niha khajama ni grao sainthi hi, Gabra Jisu Krista ni bumu jang dang lai lah.

¹⁸Nisi bihihrao, bede Gabra nangjao du olei ning nisi jar jar ni basairao ni bakhla ha dong lah.

¹⁹Nisi basairao, jarni bihihrao khe hamjao hi maya nang lah, bonsi ni basao ha thamsi da phnu.

²⁰Ansarao, nisi khrip ha nisi ni buma bupha ni grao khe mani lah, bokhe se Gabra khaja ba.

²¹Nisi buma-bupharao, nisi ni basathu khe thamsi da baigo ri, ode niyakha de bonsi gmang giji jajao nang.

²²Nisi lengrao, khrip ha nisi ni bubrarao ni grao khe mani lah; subung khe khaja riyaba lai phnu mani khusi dangya hi, Gabra khe khasu ha khin hi se dang lah.

²³Nisi dangyaba si ha subung dangba lai nisi dangya hi, Gabra ni khusi dangba lai se gibi jang khah muh rihi dang lah. Subung ni khlai hi dangba lai niya hi, Gabra ni khlai hi dangba lai se gibi jang khah muh rihi dang lah.

²⁴Yaosandi ni khlai hi Gabra ni phrang nisi don phantha maima se thihi nisi tharmai du; bede thikhade nisi Gabra ni khusi khe se dang ba.

²⁵Gajai khusi dangyaba de bo khusi gajai dangba lai ning bo mai ma se, saosi khe bo naidao naiyadao da ja.