Read Dimasa 1 THESSALONIKA 5 Bible Online

1 THESSALONIKA 5 - Dimasa bible

1 THESSALONIKA 5

¹Daphlungrao, bo bubli jang basain ni balam khe de nisi ne reb ridao ma nang daoya.

²Bede thikhade, Gabra ni basain de hor ha makhao lai se bo phai ma thi hi nisi jar ning hamsisi tharmai la du.

³Subung buthu, Khaja sisi musi khebo khin mane giri thi hi bonsi thisaiba ha ning masainjik sao goba ha saba lai, bonsi ni basao ha jamyaba de srap sophai nang, ode bo bubli khe saosi bo laiphu nang niya.

⁴Thikhabo, daphlungrao, nisi de bo basain ha makhao lai nisi ni basao ha phai mane da gmang, bede thikhade nisi andar ha dongya.

⁵Nisi khrip bo jnayaba ni basathu se, nisi jamthar si sain ni basathu gaja se; odebani, jing hor ni subung niya kha, ode andar ni subungbo niya kha.

⁶Odebani, gibin subung buthu lai thu hi da dong si, jing smao hi salai hi dong lai nang.

⁷Bede thikhade, thuyarao bo hor ha se thu ba, ju baola jayaraobo hor ha se ju baola ja ba.

⁸Thikhabo, jing de sain ni subung se bani, lonma jang hamjaoma ni phi khe pha hi, sogoma ni asa khe khrothu yaowai hi salai dada jing dong la nang.

⁹Thamsi jang dukhu ri mani khlai hi, bo jing khe saikhoya, jini Gabra Jisu Krista ni gede ja hi sogoma mai mane se bo jing khe saikho ba.

¹⁰Jing smao lakhabo, thu lakhabo, bo jang baosi jing thang hi dongphu mani khlai hi, bo jar ning jing thima ni baslai ha jar thih kha.

¹¹Odebani, nisi nalai dangba lai ning saosi jang saosi khe shanti ri lai hi, nisi rao ri lai lah.

¹²Daphlungrao, nisi khe ang khainsu du, nisi ni bising ha dukhu jang khusi dang hi, Gabra ha nisi ni gedebarao ja hi nisi ne slingriyaba khe man khlai lah.

¹³Bonsi khusi dang bani hamjaoma jang hamsi ning guju bao hi nisi mililai hi dong lah.

¹⁴Daphlungrao, nisi khe jing khainsu du, selerao khe ran lah, khah ha raoyayarao khe sibring lah, leng jaoyarao khe juru lah, ebo buthu khrip ni basao ha khah lao hi dong lah.

¹⁵Saosi khebo hamyayaba khe hamyayaba jang suphinya mani khlai hi girik lah, hamba khusi khe dang ri mane nisi smai lah, khrip niha hamba khusi dang mane chesta khlai lah.

¹⁶Nalai bo khaja lah,

¹⁷thaoya si Madai bi lah,

¹⁸khrip ha khajama ni grao khe sainthi lah, ebo khe nisi ni khlai hi Krista Jisu hade Madai ni nangjaothai se.

¹⁹Bese khe da sthai,

²⁰grao sainthiyarao khe mujiya da ja bai,

²¹Khrip grao khe nai nai hi, beleiyaba hamdao bokhe remsong lah.

²²Khrip jadi hamya ni phrang go hi dong lah.

²³Shanti ni Madai jar ning nisi khe phura gathar khlai thing; jini Gabra Jisu Krista phaiphin ba bubli sosi, nisi ni bese jang nisi ni khasu ode nisi ni saomang khe musibo gajai giri hi phura raokhi la thing.

²⁴Nisi khe longyaba de lonma gnang se, ode dangbabo olei ning dang ma se.

²⁵Daphlungrao, anthane khlai hi Madai bi ri lah.

²⁶Khrip subung khe gathar khudimthai jang khlim lah.

²⁷Ebo laijma khe khrip khna hi phuri mani khlai hi Gabra ni bumu jang ang nisi khe khainsu du.

²⁸Jini Gabra Jisu Krista ni khasaoma nisi niha dongpha thing.