Read Dimasa 2 THESSALONIKA 3 Bible Online

2 THESSALONIKA 3 - Dimasa bible

2 THESSALONIKA 3

¹Daphlungrao, jamthaoba hade, jinthane khlai hi Madai bi ri lah, Gabra ni grao nisi ni bising ha muima jang raodaothao gublungba lai, bonsi ni bising ha gublung phu mani, ode

²subung hamyayaba ode subung phaphirao ni yao ni phrang sogo jao hi jing dongphu mani khlai hi. Bonsi khrip subung lonya.

³Thikhabo, Gabra de gibiyaba se; bo ning nisi khebo rao ri hi, subung hamyayaba ni phrang nisi khe dimkhao ma se.

⁴Jing grao saniyaba si khe, nisi mani du, ode nisi mani phalang nang thihibo Gabra ha ning jing lon du.

⁵Madai ni hamjaoma ode Krista ni khah laoma ha Gabra nisi ni khah buthu khe langsmai la thing.

⁶Jini daphlungrao, duha jini phrang grao makhao dengyaba khe nisi maiba lai dongya hi, hamsi dongma nangjaoyayaba daphlung dongthai hamyayaba buthu ni phrang degao mani khlai hi, jini Gabra Jisu Krista ni bumu jang jing nisi khe grao ri du.

⁷Nisi jar ning jing khe sling ri mani dara khe nisi tharmai kha, bede thikhade, nisi ni bising ha dara giri lai jing dongya.

⁸Saosi ni makham khebo jing magna jiya, nisi ni bising ha saosibo hamya jaya mani khlai hi, sain hor dukhu khlai hi jing khusi dang du.

⁹Nisi niha jing juruma sain phuyaba niya, nisi jing khe nai hi sling mani khlai hi thi dada, ode nisi jing khe nai hi su mane khlai hi se jing khusi dang ba.

¹⁰Nisi niha jing dongba habo, jing nisi ne grao ri kha, Sere khusi dangya, bo jibabo da ji thing, thi du.

¹¹Nisi ni bising ha sereba sereba sele ja hi dongyarao ni balam ha jing khna ha du; oleiyaba subung buthu de dukhu khlai hi khusi dangma nangjaoya, bonsi haglai se.

¹²Odebani, duha oleiyaba subung buthu khe bonsi ni khusi buthu khe phirik phirik dang hi dong mane ode, bonsi jar dang hi ji mane khlai hi Gabra Jisu Krista ha grao riyaba jang jing sibring du.

¹³Thikhabo, daphlungrao, nisi de hamba khusi dangba khe da haiger lah.

¹⁴Sere ebo laijma ha jing grao thiyaba buthu khe manima nangjaoya, bo subung khe sin ri lah, bede thikhala, bo laji nu mani khlai hi bo jang lugu da ja.

¹⁵Thikhabo sotru lai da nai, daphlung hothaisi lai sibring hi jo lah.

¹⁶Duha shanti ni Madai ning khrip jadi gede asaba bubli habo nisi khe shanti ri la thing. Nisi khrip jang baosi Gabra dongpha thing.

¹⁷Ang Paul jar ning, ebo khlimyaba khe, ang ani yao jang ning reb ba se. Elei ang laijma rebyaba de ani laijma haihayaba si ni sin se. Ebo ani rebthai se.

¹⁸Jini Gabra Jisu Krista ni khasaoma nisi khrip niha dongpha thing.