Read Dimasa 1 TIMOTHE 6 Bible Online

1 TIMOTHE 6 - Dimasa bible

1 TIMOTHE 6

¹Madai ni bumu jang slingriyaba khe sijiya mani khlai hi, leng ni jowal phayarao si de, jar ni bubra raokhe khrip bakhan mai jare thi hi bao lai la thing.

²Bubra lonma dongyarao de bonsi daphlung se bani, bonsi ni bubrarao khe musibo baoma nangya da bao, hamdao hi se bonsi ne khusi dangdao rima nang ba; bede thikhade, bonsi khusi dangriya khe lonma jang hamjaoma ha bonsi jang nokhor si ni subung ja kha. Ebo grao buthu khe slingri hi sibring lah.

³Asaba subungbo, jini Gabra Jisu Krista ni grao gibi jang Madai ni grao khe badai hi gibin grao gathang khe slingriyaba de,

⁴subung phuthan jang bo musibo mithiyayaba se. Niya laiyaba ode grao bangalaiyaba nam khormu khaikhoyaba gede haryaba subung khah ragaoyayaba se. Bo buthu ni phrang se, libima ja thing, nisi naima mijingyayaba ja thing, nisi sijilaiba ja thing, nisi lon soyayaba phap buthu ja thing,

⁵ode, baothai hamya buthu ode grao gibi khe rem phuyayaba buthu baigo hi, Madai baoyaba khe rang rih lab maiba lai bonsi bao du.

⁶Madai khe maniba ha khah manima dong kha de, gabang lab se.

⁷Habsao ha musi khebo jing labu phuya, ar musi khebo jing langpha phuya.

⁸Odese, ji mani ar phin mani jini ha dongyaba buthu ha ning jing khah mani la nang.

⁹Thikhabo, gnang jama nangjaoyarao de naigrik ja thing, dukhon ha ja thing, gibir ja re, ode hamyayaba gabang libima ha bonsi galaising hi, bo libima buthu ha ning hamya jang jamyaba ha giphip la re.

¹⁰Rang rih harbaoyarao de khrip jadi hamyayaba ni khitha se; bo libima ni khlai hi se gejesi subung de lonma khe gar hi, bonsi jar khe jar gabang khah dukhu jang ripha la re.

¹¹Thikhabo, ning Madai ni subung, ebo khrip jinis buthu khe dangkhlai hi, dormo ja thing, Madai khe maniyaba ja thing, lonma ja thing, hamjaoma ha ja thing, dukhu khah laoma ha ja thing, gasainma ha ja thing, riksai lah,

¹²lonma ni hamba ja kha ning gaba hi, thaoglao ni hayu khe remsong lah, bokhe mai mani khlai hi se ning longjaoyaba se, bokhe sakhi riyaba gabang subung ni sagang ha ning bai kha.

¹³Khrip jadi jinis niha hayu riyaba Madai jang Krista Jisu, Pontia Pilat ni sagang ha jar jayaba grao gibi khe khitha rao hi baiyaba ni sagang ha nisi ne ang grao ri kha.

¹⁴Jini Gabra Jisu Krista nujao phaiphinya si de, bo grao riyaba khe musi thima girisi ode gathar ja hi naiso lah.

¹⁵Bode bakhan rijaoyaba Madai, khrip ni basao ha Raja dedao thaoyaba, raja dedao thaoyarao ni Raja dedao thaoyaba, Rajarao ni Raja de, bo bubli ha se phnu ri ma.

¹⁶Boni ha se ning thaoglao ni thijaoyayaba dong ba, gabasi thang phuyayaba jnayaba ha se bo dong ba, bokhe saosibo nuya, saosibo bokhe nubabo nuphuya. Boni ha ning bakhan jang thaoglao ni Raja jayaba dong thing, Amen.

¹⁷Ebo habsao ha subung gnang jayarao khe phuthan jaya mani khlai hi sling ri lah, lon jayayaba don ha asa da deng, jing yaowai mani khrip jadi bao joyasi jinthane riyaba Madai ni basao hase asa deng mani khlai hi sling ri lah.

¹⁸Bonsi de hamba khusi dang mani ode, hamba khusi dangba bangdao mani khlai hi, nalaibo khaithiya hi gibi subung buthu jang yaowai phalai manebo sibring lah.

¹⁹Olei jasosi ning hayu gibi gibi khe bonsi remsong phuma ni khlai hi, bubli sophai ginyaba ni khlai hide, longthai gaiyaba hamdao thao lai don gabang bojom khlai ba se.

²⁰Hoi Timothe, nini ha deng ri hi dongyaba khe hamsisi naiso lah. Madai khe man khlaiyayaba gede haglai grao thibaiyaba ode gibi niyayaba gyan bonsi thi hi niya dada badaiyaba buthu khe dangkhlai lah.

²¹Bokhe gejesi de mai nai kha bao hi, lonma khe bonsi lama gma kha. Khasaoma ning jang baosi dongpha thing.