Read Dimasa 2 TIMOTHE 4 Bible Online

2 TIMOTHE 4 - Dimasa bible

2 TIMOTHE 4

¹Madai ni sagang ha ode Krista Jisu khe sakhi khlai hi, subung thang hi dongyaba ode subung githirao ni basao ha bisar khlaiginyaba ni sagang ha, bo nujao phin mane ode boni raji khe bumu la hi ang ning khe grao ri du.

²Grao khe sainthi lah, bubli habo, bubli niyaba habo sainthi phalang lah; khah laoma jang slingri hi, bonsi ni gajai khe phnu hi bujai lah.

³Subung buthu slingriyaba grao gibi khe bonsi khna ma nangyayaba bublibo sophai ma se. Bokhe garhibo bonsi ni khmao buthu sisi migrim jao hi, jar khna ma mijingyarao sainthi mani khlai hi slingriyarao gabang bonsi bojom khlai nang,

⁴ode, gibi grao gede bonsi ni khmao nathong ja nang, ode gda ni kharmu gede bonsi giphin lang lama se.

⁵Thikhabo, ning de khrip jadi grao buthu ha baothai hamba khe la hi, lonma jang dukhu sugu lah, ode haijaoyaba ni khusi dang hi, nini khusi khe sothar si phura khlai lah.

⁶Ang de angkhe yaopha mani bubli sophai kha, ang thang la mani bubli sophai kha.

⁷Hamba jbah nanglaiyaba khe ang jbah nanglai blai kha, khaiba badaiyaba khe ang phura khlai kha, ode lonma khe ang raokhi song la kha.

⁸Duha de anthane khlai hi dormo ni khrothu khe deng ri kha, bokhe bisar gibi khlaiyaba, Gabra ning bo basain ha anthane ri ma se, a ne se ning niya hi, bo nujao phaiginyaba khe jonyarao khrip nebo bo rima se.

⁹Ani ha ning srap phaiphu mani khlai hi blaiba lai ri pha lah.

¹⁰Dema de ebo duha ni habsao khe wainso bani, bo ang khe haiger hi, Thessalonika gede thang la kha; ode Kresen de Galatia raji gede thang kha, Titabo Dalmatia raji gede thang kha.

¹¹Ani ha dongyaba de Luka se ning dongsi ba. Mark khe long hi labu smai lah, bode ang khusi dangba ha, gabang khusi ni subung se.

¹²Tukik khe de Ephesi ha ang haiha kha.

¹³Ning phaiba ha Troas ha Karpa niha sola galao ang dangkhlai buyaba khe labu pha lah, ode ani laisi jang ani migur ni laisi thonyaba khe ning asaba dara jang labu pha.

¹⁴Gangthing slamyaba Aleksandar de hamsi ning ang khe hamya khlai kha; Gabra ning bokhe boni khusi buthu ni khlai hi baslai ri ma se.

¹⁵Ningbo bo ni phrang girik hi dong lah, bede thikhade bo jini grao khe hamsi ning badaiyaba se.

¹⁶Ang ani gibi grao khe sagangthao sainthi ba bubli ha ang jang saosi bo gabaya, bonsi ang khe dangkhlai hise khaithar ba. Ebo ni daitho khe da la thing.

¹⁷Thikhabo Gabra de ani gede gaba hi, ode Jentailrao khrip bo khna mani ode, grao khe phura sotharsi haiyasa ja phu mani khlai hi raothaibo anthane bo ri ba. Olei ning ang misiraigonma ni bukhuh ni phrang sogojao hi ang dong ba.

¹⁸Gabra ning ang khe khrip hamya khusi ni phrang sogo nang, ode jar ni sorgo raji ne khlai hi ang khe dimkhao hi so ri ma se. Boni ha ning thaoglao thaoglao ni muima dong thing, Amen.

¹⁹Priska jang Akuila thu khe, Onesiphora thu ni nokhor jang baosi, ang khlimhayaba khe bonsi niha sori ha.

²⁰Erasta de Korinth ha ning dong song kha, thikhabo Trophim khe de Mileti ha bo limba ni ang garbu kha.

²¹Maising sophai mani sagang ha ning phai mani khlai hi blaiba lai ri pha lah. Eubul ning khe khlim ha du, Puden, Lina, Klaudia ode boni daphlungrao khrip bo bonsi ning khe khlim ha du.

²²Gabra nini bese jang baosi dongpha thing. Khasaoma nisi jang baosi dongpha thing.