Read Dimasa HEBRAIRAO 8 Bible Online

HEBRAIRAO 8 - Dimasa bible

HEBRAIRAO 8

¹Jing grao thima nangjaoyaba de ebo se; olei Jonthai dedaothao sorgo ha muima ni Raja khamthan ni yaoda ha khamhiyaba khe jing mai kha.

²Hathan gathar ode thambu gibi gibi, subung dangyaba niya, Gabra songkhuyaba ni dangyaba se.

³Jonthai Dedaothao jayarao de jinis yaophayaba ode bandai buthu khe yaopha mane saikhu jaoyaba se; odebani, ebo jonthaibo asaba jinis khe yaopha mane dongma nang du.

⁴Duha bode phirthi ha dongba se thikhade, bo jonthai ja nang niya, dara ha lai jinis riyaba khe yaopha ginyarao dong thi.

⁵Bonsi de sorgo ni jinis buthu ni saokhuli jang sigring ni khusi khe se ning bonsi dang ba, Moses thambu dang mani sagang ha, “hading ha boni saokhuli khe ninthane phnu riba lai jasosi, jamthar si, khrip jadi mani ma nang ma, thi hi bao lah”, Madai thiba lai.

⁶Thikhabo, duha de, dangyasa Krista maiyaba de, bonsi dangyaba thanebo gabang dedao; bede thikhala graodiyahsa ja hi dangyaba grao khayaba de hamdao hi grao hanggaiyaba raodao bani, dara gajam ni grao khayaba thanebo bo dedaoyaba se.

⁷“Sagang ni grao khayaba musi thima giri khade, bo gibin ne khlai hi smai ma nangya kha mu.

⁸Bonsi siji bani se bo ebo grao khe thi ba, nai lah, bo basain buthu de sophai ma ja kha,” ode Gabra thi du, “Israel noh khor jang Juda noh khor baosi grao gadain ang khah nang;

⁹Egypt ni phrang lang mani bonsi ni yao ha ang rem khali, Bonsi ni greng buthu ne grao khayaba khe slam riba lai de ja nang niya, Bede thikhade bonsi ang grao khayaba ha dongsongya, Odebani bonsi khe ang khiyal khlaiya.”

¹⁰“Bo basain buthu ni yaohon ha Israel noh khor niha ang grao khaginyaba de ebo se,” Gabra thi du, “Bonsi ni baothai buthu ha ani dara buthu khe ang deng nang, Bonsi ni khasu habo ang reb ma se Ang bonsi ni Madai ja nang Bonsi de ani subung buthu jama se.

¹¹Gabra khe tharmai lah thi hi bonsi jar ni noharirao khe thilaima nangya kha, Bonsi khasi daothao ni phrang dedaothao sosi, Ang khe bonsi mithi thar ma se.

¹²Bede thikhade, bonsi ni hamya ni balam ha Ang map khlai nang, Bonsi ni phap buthu khebo wainso nang niya kha.”

¹³Grao khayaba gadain thi hi sainthi bani, bo sagang ni grao khe yaowaiba jaya kha. Ode gajam jinis jang raba ni yaohon hade srap jam ma se.