Read Dimasa HEBRAIRAO 9 Bible Online

HEBRAIRAO 9 - Dimasa bible

HEBRAIRAO 9

¹Sagang ha grao khayaba habo, Madai khe khlim bani dara buthu ode phirthi gede habo hathan gathar dong ba.

²Bonsi Thambu masi dang ba, sagangthao ni hathan hade thaophari dengthan basang, masi basang, hon ni dengthan dong ba, bokhe bonsi hathan gathar thi du.

³Rih dimsoyaba phin gin ni yaohon hase, bonsi hathan gathar daoyaba thiyaba de dong ba.

⁴Oraha se bahai midim saoyaba gajao ni khapra ode, grao khayaba ni bokhoh, gajao jang luphayaba khe deng du; bo grao khayaba bokhoh ni bising hade bonsi manna dengyaba gajao ni mudik, Aron ni goda ridimyaba, ode grao khayaba longthai bakhlap buthu bo dong.

⁵Grao khayaba bokhoh ni basao hade muima ni Cherubrao dong ba, bo buthu khe khasaoma ni khamthan khe bonsi ni bagrang buthu jang bonsi saikhlim khlai ba. Ebo jinis buthu khe duha de bising bohor jing thiphu nang niya.

⁶Olei jamthar si salai blai hi se, Jonthairao de Thambu sagangthao ni khutha ha, dara-disa ni khusi buthu khe dang hi nalaibo bonsi bising ha hapsing re.

⁷Thikhabo, khutha maginyaba hade Jonthai dedao thaoyaba se ning, maithai si ha phin si, jar ni khlai hi ode subung buthu mithiya hi bonsi dang gajaiyaba buthu khe bandai yaopha mani khlai hi thijao lang hi bo hapsing re.

⁸Eraha, Bese Gathar jang edehe phnu du; Thambu ni ronda ha song hi dongdu si de, hathan gathar jadao thaoyaba de khuru nang niya thi du.

⁹Ebo de dini dakhna ni bubli khe nisi ne phnu riyaba daogari se. Ebo bisar ni dara hase, jinis riyaba buthu ode bandai buthu khe yaopha ba, bo buthu jang de hamba hamya khe phura mithi thar phuya.

¹⁰Ebo khrip jima-lingma ja thing, dugurthai gibin gibin ja thing, saomang gede ni jinis ni dara buthu ning se. Bo buthu khe gadain slamyaba bubli sophaiya si yaowai mani nephaya ba se.

¹¹Thikhabo, Krista de hamba jinis sophaiyaba buthu ni Jonthai dedaothao bo japhai kha; bo khusi dangyaba Thambu, subung ni yao jang dangyaba niya, (boni ortho de jinis sangsaiyaba bo niya), boni muima jang gibi jatharyaba se.

¹²Burunsa buthu jang mususa buthu ni bithi jang niya hi, jar ni bithi khe lang hi ning hathan gathar jadao thaoyaba ha phin si jang blai thar mani khlai hi bo hapsing hi, olei se thaoglao khoyaba khe bo slam ba.

¹³Burun buthu jang musu jla buthu ni bithi jang musu jikkhla ni thaphla jang, gusu subung buthu khe saikhru hi, bonsi ni basao gathar jama ni khlai hi, bonsi khe bo gathar khlai phu kha la,

¹⁴Krista, thaoglao Bese ni dara jang, Madai niha mukhang phinya hi bithi yaophayaba la, thang hi dongyaba Madai ni khusi dang mani khlai hi, jing hamba hamya tharmaiyaba khe khusi dangyaba githi ni phrang bo bislei jing khe gathar khlai dao nang!

¹⁵Odebani, dara jang bode grao khayaba gadain ni graodiyahsa jaba se; sagang grao khayaba ni bakhla ha gajai khlaiyaba buthu ni phrang sogo mani khlai hi, thihyaba ha khajao kha bani, longjao hi dongyarao de thaoglao hanggai hi dengyaba khe bonsi mai phu ma.

¹⁶Bede thikhade, braha grao khayaba dong, oraha grao khayaba ni thiyaba khebo buji ma nang du.

¹⁷Grao khayababo bokhe khayaba thang hi dongdu si de grao musibo niya, bo thihba ni yaohon hase bo khe yaowai ma.

¹⁸Odebani, sagang grao khayababo thijao jang niya hi de rao phuya.

¹⁹Dara ni grao riyaba khrip jadi Moses khrip subung buthu niha bo sainthi bani yaohon ha, musu jla buthu ni ode burun buthu ni bithi khe la hi dih jang migur gajao jnayaba ode hussop khe bo lang hi, Dara ni laisi basao ha ar khrip subung buthu khebo saiphra ba.

²⁰Ebo ning Madai nisi ne saikho riyaba grao khayaba ni thijao se, thihi bonsi thi pha lang ba.

²¹Olei jasosi ning thijao jang Thambu jang Madai ni bikhoh ha yaodi dongyaba khrip khebo bo saiphra ba.

²²Gibi de ebo se, dara ni bakhla hade khrip jadi khe ebo thijao jang ning gathar khlai re, thijao baigo riya thikhade phap buthu ni map maiya.

²³Odebani, sorgo ni jinis jang baosi jayaba buthu ning, olei gathar jama nang du thikhade, sorgo ni jinis gibi gibiyaba la bonthanebo bandai hamdao hi gathar khlai mani grao ning.

²⁴Yao jang dangyaba, hathan gathar bo gibi gibiyaba laiyaba hade Krista de hapsingya, duha de Madai ni sagang ha jini baslai ha song mani khlai hi, sorgo ha bo hapsing kha.

²⁵Jonthai dedao thaoyaba maithai phorong jar ni thijao niya hi, mih ni thijao khe lang hi, hathan gathar ha bo hapba lai, bo de jarkhe yaopha mani khlai hi bo hapya.

²⁶Niyakha la, habsao sangsai jenba ni phrang la hi, alang alang dukhu suguma nang kha mu. Thikhabo, duha ni bubli jamthao ba ha, bo jar ning bandai ha kho hi, phap khe gajain khlai mani khlai hi, phinsi jang jamthar ri hi bo nujao kha.

²⁷Ode, subung ni khlai hi phin si thih ma nang kha, boni yaohon ha se bisar ja ma.

²⁸Olei jasosi ning Krista gabang subung ni phap buthu khe horkhu lang mani khlai hi phin si bandai ha bo yaopha la kha. Ode, sere subung sogoma mai mani khlai hi bokhe jonyarao niha de phin gin habo nujao phaiphin ma se.