Read Dimasa JAKOB 1 Bible Online

JAKOB 1 - Dimasa bible

JAKOB 1

¹Madai ar Gabra Jisu Krista ni dangyasa Jakob, jadi jhigin dra dri jayarao khe bo khlim ba.

²Ani daphlungrao, jadi jadi nisi nai naiyaba khe goron khade, khrip khusi ni grao se thihi bao lah,

³nisi lonma ha nai naiyaba goronyaba de nisi niha khah laoma slamba se thihi nisi tharmai lah.

⁴Odehe, musibo baojoya hi nisi phura japhu mani ode, nisi khrao japhu mani khlai hi dukhu khah laoma nisi niha phura khusi ja thing.

⁵Nisi ni bising ha asaba bo buddi gyan baojo kha de, khrip subung niha joya hi ode khaithiya hi riyaba Madai niha sain la thing, odese, mai ma.

⁶Bede thikhade, gijisa bo lonya jaya hi lonma lahi sain la thing, lonsoyayaba de sagor ni dih bar jang sip phra hi dithon baipha ba lai jasosi se.

⁷Lonsingyayaba subung de longthai dih rim ma khayaba, bo khusi dangyaba side gejepyaba ja kha de,

⁸Gabra ni phrang asaba khebo mai nang thi hi da bao la thing.

⁹Daphlung songthan hidao hi dongyaba de sugu jaoba ni bubli ha bonsi khaja la thing.

¹⁰Gnang subung bo jar khe basasa khlai bani bo khaja la thing, bede thikhala, gnang subung sam bubar lai jam ginyaba se.

¹¹Sain de boni dongthai jagabyaba jang baigo du, odehe, sam lai rain hi, boni bubar de grai du, ode boni majangma bo saolang la du. Olei jasosi ning gnang subung bo jama se; boni hayu dukhu jang yaowai bani bo jam ma se.

¹²Naigrik ha dukhu khah laoyaba de boni khophal hambi bao lah. Nai naiyaba khe dukhu khah laokha ning, Madai ning jar hamjaoyarao niha ri mane hanggaiyaba hayu ni khrothu khe bo mai ma se.

¹³Saosibo naigrik goron ba ha, Madai se ang khe naigrik ri ba, thihi da thi thing. Madai khe phap jang naigrik phuma niya, bobo saosi khebo naigrik riya.

¹⁴Thikhabo, khrip subung de jar ni libima jang se naigrik goron ba; bo libima jang se subung khe sikpha hi, bo phainjao re.

¹⁵Odehe, libima ni basa phap khe bonsi hajai ri du; ode phap dephai kha thi kha ning thihyaba ha so ri re.

¹⁶Ani khasaoma ni daphlungrao, thokhi jaohi da dong.

¹⁷Hamba jinis riyaba ode phura jinis riyaba de basao gede ni jnama buthu ni bupha ni phrang akhai buyaba se. Boni ha se gibin jayaba ode sigring lai giding phin hi gibin slai phuyaba musi bo giri.

¹⁸Bo dangma baoyaba phura japhu mani khlai hi, bo slamyaba buthu bathai thai jenyaba ja mani khlai hi, grao gibiyaba jang bo jing khe hajai riba se.

¹⁹Ani khasaoma ni daphlungrao, ebo grao khe ning tharmai lah! Khrip subung grao joba khe selaiya hi, khna mani gede selai lah, thamsi baigoya hi nisi khah lao lah.

²⁰Subung ni thamsi jang de Madai ni dormo khe slam phuya.

²¹Odebani, nisi niha rege rege dongyaba khrip buthu ode hamyayaba baothai gablaiyaba khe gajai khlai hi, nisi ni bese buthu khe sogo phumani raothai gnang dongyaba, grao nisi niha gai hi dongyaba khe basasa jahi mani lah.

²²Bede thikhade, grao khnayaba se ning ja hi, jar khe thokhi laya hi, khusi dang hi grao maniyaba ja lah.

²³Asababo grao khnayaba ja hi, maniyaba jaya khade, derphnai ha jar ni hajai phayaba mukhang khe naiba lai jasosi se.

²⁴Hamsi ning jar khe nai hi, bo thang la re, ode jar ni mukhang khe bede ja kha thihi srap bo blao re.

²⁵Thikhabo, sere phura sadin ni dara khe nai hi, bokhe hamsisi khiyal khlai hi, khna dada bo blao phinyaba jaya hi, mani dada khusi dangyaba de, bo khusi dangyaba ni hamthai mai ma se.

²⁶Sere jar khe dormo subung bao lahi, jar ni slai khe ning mathaoya hi, jar ni khah khe thokhiyaba de, bo subung ni dormo de haglai se.

²⁷Madai jang Bupha ni sagang ha dormo gathar ode phap gaba phayayaba de ebo se: mathisarao, banjikrao bonsi dukhu ni bubli ha naihiyaba ode habsao ni gusu rege dophaya hi jar khe hamsisi naiso layaba se.