Read Dimasa 2 PETER 2 Bible Online

2 PETER 2 - Dimasa bible

2 PETER 2

¹Subung buthu ni bising ha mosol gorasaliraobo baigophai kha. Olei jasosi ning, nisi ni bising habo gajai slingriyaba baigo phai ma se, subung khe hamya khlai phuyaba grao gathang gajai buthu khe phirik phirik labu nang; ode bonsi khe khoyaba khe ning bonsi nangjaoya jama, ode bonsi jar ni basao ha ning hamya khe so ri la ma se.

²Olei jasosi ning, gabang subung de jar nangjao mani jinis buthu khe bonsi yaowai nang, ode bonsi ni khlai hi grao gibi ni lama khe hamya khlai ma se.

³Odehe, bonsi de, rang rih harbaoba ni, grao slam singyaba buthu khe yaowai hi nisi khe bephar khlai mani yaowai ma se; thikhabo, bonsi ni balam ha bisar khlaiyaba ha gajai jayaba de budu glao jakhabo, saja bangdaoya jaya, bonsi khe hamya khlaiyababo mudri thangya.

⁴Sorgo ni deglarao phap khusi dangyaba khe ning, Madai de haigerya hi, saja thani ha dangsing hi, bisar ni basain khe jon mani khlai hi andar ni hakhor ha khahi bo deng du.

⁵Gda ni habsao khebo bo haigerya hi, habsao hamya daothao ni basao ha, dih jang khublib ri khali dormo ni grao khe baiyaba, Noah jang gibin subung sni khe se ning bo sogo ba.

⁶Sodom jang Gomorra nogor buthu khe bo, Madai khe khiyal khlaiyayarao dongphai ginyarao khe nisi daogari phnu ri mani khlai hi bokhe yaowai dada, thaphla gajai ja ri hi, bo sjam ba se.

⁷Lot, dormo subung, subung phaphirao ni dongthai gabang rege jaoyaba khe de bo sogo ba,

⁸bo dormo subung jadao thaoyaba bonsi ni gejer ha bo dongpha lai re, ode bonsi phap khusi dangyaba buthu khe nalaibo nuyaba khnayaba buthu khe bo hamsi ning khasa re.

⁹Gabra de bokhe khiyal khlaiyarao khe dukhu hadi ni phrang sogo mani ode subung dormo niyayaba buthu khe bisar ni basain sosi saja ri hi ning deng mani bo mithi du.

¹⁰Bonsi ni saomang libima rege daothao yaowaiyarao ode Madai ni hukhum khe naijiyayarao de, bonsi gibir se, bonsi ni sanggama jang, sorgo ni subung ni muima buthu khebo sijiba khinya.

¹¹Sorgo ni deglarao ni raoma ode khusi dangphuyaba raothai ha muima gnangrao ning, Gabra ni sagang ha eleiyaba subung mai mani balam ha bisar khlai hi bonsi sijiya.

¹²Thikhabo, eleiyaba subung buthu de, buddima giriyaba, hagra ni mih khe, remhi sthai jao mani hajaiyarao lai jasosi se, ode bonsi tharmaiyayaba khe ning bonsi siji hi, hagra ni mih lai ning bonsi sjam jao ma se.

¹³Bonsi phap khusi dangyaba ni dam de bonsi dukhu mai ma se. Bonsi suk smaiyaba de, sain jnama ha khokhlai ba sosi se. Subung rege daothao ode rege rege nisi ni bising ha dongphai hi, nisi mel phaidyaba ha bonsi phai hi nisi khe thokhi ma se.

¹⁴Bonsi ni muthai de gaori jang gablai hi phap khusi dangya hi bonsi dongphuya, ode bonsi ni dongthai raoyayarao khe bonsi phuslai re. Bonsi ni harbaoma libi ri ma khe bonsi baisi ja kha. Bonsi de ansarao khe sariyaba se.

¹⁵Lama gibi khe bonsi dangkhlai hi, bonsi lama gma kha. Bosor ni basa Balaam, phap khusi dang hi yaosandi nangjaoyaba ni lama ha hem hi bonsi degao lang la kha.

¹⁶Thikhabo, bode boni hamya khlaiyaba ha ning bo jo jaoba; mih leng grao jophuya khe subung grao joba lai johi gorasali gibir khe bo sjam thaori kha.

¹⁷Eleiyaba subung buthu de dihkhor, dihmu rainyaba ode jimi baryungma jang sipding jaoyaba lai jasosi se; andar maojrim de olei dong mani ning bo saikho jaoba se.

¹⁸Oleiyaba subung buthu de haglai grao khe bonsi hamsi thibai hi, habsao dongthai mosol buthu dangkhlaiyarao khe saomang nangjaoma phap buthu khe yaowai hi bonsi phuslai re.

¹⁹Bonsi sadin ri nang thihi hanggai re; thikhabo, bonsi jar ning hamya leng ni leng jahi ning dong du, duhabo bokhe deyaba ni leng ha bonsi sagai du.

²⁰Jini Gabra jang sogoyahba Jisu Krista khe mithi bani khlai hi habsao gusu ni phrang sogo jao bani yaohon hade, oraha ning sagai phin hi, bonsi deya kha de, bo jenba ha bonsi ni dongthai thane, yaohon ni dongthai hamyadao ja re.

²¹Dormo ni lama khe bonsi mithi bani yaohon ha, bonsi niha grao riyaba gathar deng riyaba khe dangkhlai ba thane de, dormo ni lama khe mithiyaba se, bonthane khlai hi hamdao nang mu.

²²Bonsi ni dongthai ni phrang se, ebo gyan ni grao gibi de bonsi niha sophai ba. Sisa de jar ni gabadih ha ning thangphin re, thidu ode Hono khe dugur ri bani yaohon ha didap ha ning thangphin hi lodai re, thi du.