Read Dimasa 1 JOHN 2 Bible Online

1 JOHN 2 - Dimasa bible

1 JOHN 2

¹Ani basathu, nisi hamya khusi dangya mani khlai hi ebo grao buthu khe nisi niha ang reb ha du. Bede thikhade, asababo phap khusi dangkha de, bupha niha jing khe thipha riyaba, dormo subung, Jisu Krista khe jing mai kha.

²Bode jini phap buthu khe map khlaiyaba se, jini phap khe se ning niya hi, habsao ni khrip subung ni phap khebo map khlaiyaba se.

³Bo grao riyaba buthu khe jing mani khade, bokhe jing mithi du thi hi mithi la du.

⁴Bo grao riyaba buthu khe maniya hi bokhe ang mithi du thiyaba de subung thokhiyaba se, boni hade grao gibi bo giri.

⁵Asababo boni grao khe mani khade, Madai ni hamjaoma khe boni ha phura deng kha. Boni ha ning jing dong thi hi ragao sisi mithiyaba ebo se:

⁶Boni ha ning jing dong thikha de, bo dongba lai ning jing dong ma nang du.

⁷Hamjao daothaoyaba, grao riyaba gadain ang nisine rebya; bede thikhade, grao riyaba gajam, bo jenba ni phrang nisi mai kha, bokhe ning ang reb ba se; grao riyaba gajam de bo graokhe nisi tharmai blaiyaba khe se thi ba.

⁸Thikhabo, grao riyaba gadain khe nisi ne ang reb du, bo ning boni ha ode nisi niha gibi jang nujao hi, andar khe sjam sai du; bede thikhade gibi gibi jnama jang jnaphai kha bani.

⁹Jar ni daphlung khe jajaoya hi ning, Jnama ha ang dong thikhade, duhabo andar ha ningbo dong kho.

¹⁰Jar ni daphlung khe hamjaoyaba de jnama ha dong, bonthane khlai hi khuda hi galai mani musibo giri.

¹¹Thikhabo, jar ni daphlung khe jajaoyayaba de andar ha ning dong kho, bonsi andar ha daoding bai hi, andar jang boni muthai khe gana khlai kha bani thang manebo mithiya kha.

¹²Basathu, boni bumu ni khlai hi nisi ni phap buthu gibi jang map jakha bani, nisi niha ebo khe ang reb du.

¹³Bupha thu, jenba ni phrang nisi dongsong ba khe tharmai kha bani nisi niha ang reb haba se. Lugu gadainrao, subung phaphi khe nisi dekha bani nisi niha ang reb haba se.

¹⁴Basathu, bupha khe nisi tharmai kha bani nisi niha ang reb ha du, Bupha thu, bo jenba ni phrang dongba khe nisi tharmai kha bani nisi niha ang reb du. Lugu gadainrao, nisi raohi, Madai ni grao nisi niha ning dengsong hi; odehe subung phaphi khe nisi de kha bani nisi niha ang reb ha du.

¹⁵Habsao khe da hamjao lah, habsao ha jinis dongyaba buthu khebo da hamjao lah. Sere habsao khe hamjao du, bo bupha khe hamjaoya.

¹⁶Habsao ha khrip jinis dongyaba, saomang ni nangjaoma, muthai ni nangjaoma, thang hi dongba ni bising ha subung phuthan jayaba si de, bupha ni phrang baigoyaba niya, habsao ni phrang baigoyaba se.

¹⁷Habsao boni libima jang jamsai du, thikhabo Madai nangjaoba lai dangyaba maithai galao thang hi ning dong ma se.

¹⁸Ani basathu, bubli jamthao ma japhai kha, Krista jang nanglaiyaba baigo phai ma ja kha thihi nisi khnaba lai ning, duha Krista jang nanglaiyaba gabang baigo phai kha. Odebani bubli jamthaoma ja kha thihi nisi tharmai lah.

¹⁹Bonsi de jini bising ni phrang baigo hi, bonsi jini subung gibi gibibo niya, niyakhade bonsi jini bising ha ning dongma mu. Thikhabo, bonsi jamthar si jini subung jatharya thihi ragao sisi tharmai mani khlai hi bonsi baigo ba se.

²⁰Thikhabo, nisi de subung gathar ning nisi khe thao do ri kha, nisi jamthar si bo bujima maiyaba gaja se.

²¹Grao gibi khe nisi mithiya bani nisi niha ang reb ba niya; nisi mithi kha bani ode, grao gibi ni phrang mosol grao baigoya kha bani khlai hi se ang reb ba.

²²Jisu khe Krista se thihi maniyayaba thane subung thokhiyaba sere dong? Bupha jang Basa khe maniyayaba, Krista jang nanglai ba se.

²³Sere Basa khe maniyayaba de bo Bupha khebo maniyayaba se. Basa khe maniyaba de Bupha khebo bo maniyaba se.

²⁴Nisi de jenba ni phrang nisi khnayaba khe nisi niha ning dengsong lah. Bo jenba ni phrang nisi khnayaba khe nisi niha ning dengsong khade, nisibo Basa niha ar Bupha niha ning nisi dong ma se.

²⁵Bo jar ning jini ha bo hanggaiyaba ebo se: Bode thaoglao ni hayu se.

²⁶Nisi khe dikhaoma baoyarao ni balam ni grao khe nisi niha ang reb du.

²⁷Thikhabo, nisi ni grao hade bo nisi khe thao do riyaba de nisi niha ning dong, odebani saosi jang slingri jaomabo nisi nangya. Nisi khebo thao do riyaba ning khrip jadi bonsi khe slingri du, ebo ning gibi se, mosolbo niya. Odebani, bonsi nisi khe slingri balai jasosi ning boni ha ning dong lah.

²⁸Odehe, duha basathu, bo nujao phaiba ha khah rao mane ode jing lajiya hi dongphu mani khlai hi boni ha ning dong lah.

²⁹Bo dormo subung se thi hi nisi mithi khade, gibi jang dangyaba si de boni ha hajai kha thi hi nisi tharmai lah.