Read Dimasa 1 JOHN 4 Bible Online

1 JOHN 4 - Dimasa bible

1 JOHN 4

¹Hamjao daothaoyarao, khrip bese khe da lon lah, mosol gorasali gabang baigo phai kha bani bese buthu khe Madai ni phrang baigoyaba na baigoyayaba bo khe nai lah.

²Ebo khe Madai ni bese jang nisi tharmai phu nang; Jisu Krista saomang ha phaiba thihi maniyaba Bese maiyaba de Madai ni phrang baigoyaba se.

³Odehe, Jisu khe maniyayaba bese de Madai ni phrang baigoyaba niya. Bode Krista jang nanglaiyaba bese phai mani grao khe nisi khnayaba se; duhabo habsao ha dong phaisai kha.

⁴Ansarao, nisi Madai ni phrang se, bonsi khe nisi de kha; nisi niha dongyaba habsao ha dongyaba thanebo dedaoyaba se.

⁵Bonsi habsao ni subung se, habsao ni subung lai bonsi grao sainthi du, ode habsao ni subung bonsi ni grao khe gainsong re.

⁶Madai ni phrang baigoyaba jing se, Madai tharmaiyaba si de jini grao khe bonsi khna re, Madai ni phrang baigoyayaba de jini grao khebo bonsi khna ma nangjaoya re. Eraha ning bese gibi jang bese gibi niyayaba khe jing tharmai du.

⁷Hamjao daothaoyarao, jing saosi jang saosi hamjao lai nang, hamjaoma Madai ni phrang baigoyaba se; hamjaoma khe maiyaba side bo Madai niha hajai kha. Bo Madai khebo tharmai du.

⁸Thikhabo, sere niha hamjaoma-mayama giri, bode Madai khe tharmaiya. Madai de hamjaoma se.

⁹Madai ni hamjaoma-mayama jini bising ha nujao phai kha; boni khlai hi jing thang hi dongphu mani Madai ning jar ni basa saosi mang mangyaba khe habsao ha haiha ba.

¹⁰Hamjaoma-mayama ebo se: Jing Madai khe khasao ba niya hi, bo jing khe hamjao bani, jini phap buthu khe map khlai mane khlai hi bo jar ni basa khe haiha ba.

¹¹Hamjao daothaoyarao, Madai ning olei jing khe hamjao khade, jingbo saosi jang saosi jing hamjao laima khasao laima nang du.

¹²Saosibo Madai khe nuthaoya; thikhabo jing saosi jang saosi hamjao lai khade khasao lai khade jini ha Madai dong hi, boni hamjaoma khe jini ha ning phura khlaima se.

¹³Boniha jing dongyaba ode jini ha bo dong thihi jing tharmaiyaba de, boni bese ning jinthane riyaba ha ning bo tharmai du.

¹⁴Odehe Bupha ning jar ni basa khe habsao sogoyahba ja mani khlai hi bo haihayaba khe jing nu kha, ode sakhibo jing ri kha.

¹⁵Sere Jisu khe Madai ni basa se thihi mani du, boniha Madai dongpha hi, bobo Madai niha dongsong du.

¹⁶Odebani, Madai ning jini gede bo jing khe hamjao hi khasaoyaba khe jing tharmai kha, ar lonbabo jing lon kha. Madai de hamjaoma-mayama se. Hamjaoma-mayama ha ning dongyaba de Madai niha ning dong hi, Madaibo boni ha ning dongsong ma se.

¹⁷Bisar ni basain ha jing khinya hi dongphu mani khlai hi, hamjaoma khe jini bising ha phura jing khlaijao kha, ebo habsao habo bo lai ning jing dong kha.

¹⁸Hamjaoma hade khin mani musibo giri, hamjaoma phura jaba ha khinma khebo rik khlai re. Khinyaba ha saja dongpha bani, khinma gnang jayaba ha hamjaoma phura jaya kha.

¹⁹Bo jing khe hamjao da bani jing hamjao du.

²⁰Asaba subung, Madai khe ang hamjao du thi hi jar ni daphlung khe jajaoya jakha de, subung grao mosol thi ba se. Boni daphlung jar nuyaba khe ning bo hamjaoya kha la, Madai nuyayaba khe la bo bedehe hamjao phu ma?

²¹Bo ni phrang grao jing maiyaba ebo se: sere Madai khe hamjao du, bo jar ni daphlung khebo hamjao ma nang du, thiyaba se.