Read Dimasa 2 JOHN 1 Bible Online

2 JOHN 1 - Dimasa bible

2 JOHN 1

¹Khrao de- Masainjik man gnang, saikho jaoyaba ode boni basathu khe, grao gibi ha ang hamjaoyarao, ang khe se ning niya hi, grao gibi khe mithiyaba khrip gibinbo bonsi khe khasaoyarao niha;

²grao gibi jini ha dongyaba ode jug jug jini ha bo dong bani,

³Grao gibi jang hamjaoma de, Bupha Madai jang Bupha ni basa Krista ni phrang, khasaoma, khah laoma ode santi de jing jang baosi dongpha ma se.

⁴Bupha jinthane grao riba lai jasosi nini basathu gejesi gibi grao ha bonsi dong ba khe ang nu bani hamsi ning ang khaja du.

⁵Thikhabo, duha de hamba masainjik, grao gadain riba lai niya hi, bokhe jenba ni phrang jing maiyaba khe nisi ne sainthi mani ang reb du. Jing hamjao lai nang thi hi ang nisi khe khainsu du.

⁶Odehe, ebo ning hamjaoma ja kha, bo grao riyaba buthu lai jing dongba de. Ebo ning grao riyaba, bo jenba ni phrang nisi khnayaba ning ja kha. Hamjaoma ha ning nisi dong song ma nang du, thi hi bo thi du.

⁷Gabang thokhiyaba Jisu Krista khe saomang la hi bo phai ba thi hi maniyayaba ebo habsao ha gabang baigo phai kha; oleiyaba subung buthu thokhi baiyaba ode Krista jang nanglaiyaba se.

⁸Jing dang hi maiyaba buthu khe phantha gmaya hi, sothar si yaosandi khe nisi maiphu mani khlai hi hamsisi naiso lah.

⁹Sere Krista slingriyaba ha dongya hi, slingriyaba khe lailang hi, bo thang kha de, Madai khe bo maiya kho. Sere bo slingriyaba grao ha dongsong du, Bupha jang Basa khe bo maipha lai du.

¹⁰Bo slingriyaba khe labuya hi nisi niha phaiyaba khede, saosi khebo nisi ni noh ha nohma da thao ri, ode grao hamba jangbo da sainlai lah.

¹¹Grao hamba jang sainlaiyaba de, boni hamya khusi ha gabayaba se.

¹²Nisi niha grao sainthi mani gabang dong lakha bo, laisi ha khali jang ang reb ma nangjaoya; jini khajama phura japhu mani khlai hi, ang jar ning nisi niha phai hi, nisi ni sagang ha sainlai mane ang asa khlai du.

¹³Nini bahandao, saikho jaoyaba ni basathu ning khe bonsi khlim ha du.