Read Dimasa NUJAOYABA 1 Bible Online

NUJAOYABA 1 - Dimasa bible

NUJAOYABA 1

¹Jisu Krista ni grao nujaoyaba de srap jinis sophai ginyaba ni balam ha jar ni dangyasarao khe tharmai ri mani Madai ning ri hi, jar ni dangyasa Johan niha degla khe bo haiha hi, bo grao khebo khna riphai ba.

²Johan ning Madai ni grao jang Jisu Krista ni sakhi ri mani khrip bo nuyaba khe bo baikhla ba.

³Ebo grao thidayaba buthu khe phuriyaba jang boni bising ha grao rebyaba buthu khna hi maniyaba de boni khophal hambi; boni bubli sampha kha.

⁴Johan de, Asia raji ni longjom masni buthu niha: dong langyaba ode dongyaba ar dong phaiginyaba ni phrang odehe jar ni Raja ni khamthan sagang ha bese sni dongyarao ni phrang, ode,

⁵sakhi riyaba lonma gnang, subung githi ni bising ni phrang sagangthao baijayaba ode, phirthi ni rajarao ni basao ha bisar khlaiyaba, Jisu Krista ni phrang khasaoma ode shanti nisi niha dongpha thing. Bo jing khe hamjao bani, jar ni thijao jang jini phap buthu ni phrang bo susa hi,

⁶Madai ni raji ne jing khe slam dada, Madai jang bupha ni khusi dang mani Jonthai ne jing khe slam ba, bo ni ha ning muima jang hukhum thaoglao thaoglao dong thing. Amen.

⁷Nai lah, bo de jimi jang baosi phai mani bubli sampha kha; ode khrip ni muthai jang bokhe nu nang. Bo khe iphlayaraobo, ode habsao ni khrip jadibo boni khlai hi dukhu nang hi gra ma se. Olei jasosi ning ja thing. Amen.

⁸Ang de Alpha ar Omega, donglangyaba, dongyaba odehe dong phaiginyaba, khrip dang phuyaba de ang se, Gabra Madai de ode thi du.

⁹Ang Johan, nisi ni daphlung, Jisu ni khlai hi dojaoyaba ha nisi jang baosi khah lao hi dukhu sugu phayaba ode bonsi jang baosi Raja yaowai phalaiyaba, Madai ni grao ni khlai hi ode Jisu ni grao khe tharmai ri mani khlai hi sagor ni hahgojo Patmos thiyaba hathan ha ang dong ba.

¹⁰Gabra ni basain ha bese ha ang dong ba, boha ani yaohon gede ni phrang khurang baksa hi bibul ni khurang lai ang khna ba.

¹¹Khurang de, Ning jinis nuyaba khe laisi ha reb hi, longjom masni: Ephesi ni longjom, Smurna ni longjom, Pergamos ni longjom, Thuatira ni longjom, Sardis ni longjom, Philadelphia ni longjom, ode Laodikei ni longjom buthu niha haiha lah, ode bo thiphai ba.

¹²Boha ang jang sainlaiyaba khurang khna hi ang naiphin ba de gajao ni thao ni thaophari dengthan boitho masni khe ang nu ba,

¹³ar thaophari dengthan hade, Marsi ni Basa lai, subung saosi, yapha sosi sola glao thu hi, khahbao ha gajao ni jengsdu khahi dongyaba khe ang nu ba.

¹⁴Boni bokhro jang khnai de melma bikhim phuba lai ode gidithai lai phu du, boni muthai buthu de wai jingba lai se;

¹⁵boni igah jakha de ser khe dhao saoba ha jaoba lai se; boni khurang jakha de diyungma raoba ha boni sar ho jaba lai se.

¹⁶Boni yaoda gede sathrai masni di du, ode boni bukhuh ni phrang seng bu daothaoyaba baigo phai ba, ode boni mukhang jakha de sain daokhu saiba ha jnaba lai se.

¹⁷Bokhe ang nuba jang githi lai ja hi boni igah rogong ha ang galai kha. Thikhabo, bo ning jar ni yaoda ni yao khe ani basao ha deng hi thi ba, Da khin, ang de sagangthao jang yaohon thaoyaba se.

¹⁸Subung gathang de ang se. Ang thih kha, thikhabo, nai lah, thaoglao thaoglao ni khlai hi ang thangphin kha. Githi jang githi ni raji ni chabi buthubo ang bubra se.

¹⁹Duha ning jinis nuyaba buthu, jinis dongsaiyaba buthu ode eboni yaohon ha jinis sophai ginyaba buthu khe reb lah.

²⁰Ani yaoda gede ni yao ha sathrai masni ode gajao ni thaophari dengthan ning nuyaba buthu de ebo se: sathrai masni buthu de longjom masni ni deglarao se, ode thaophari dengthan masni de longjom masni se.