Read Dimasa NUJAOYABA 20 Bible Online

NUJAOYABA 20 - Dimasa bible

NUJAOYABA 20

¹Odehe, sorgo ni phrang sorgo ni degla saosi akhai phaiba khe ang nu ba, bo ning hakhor khithu giriyaba ni chabi jang sikhol gedeba khe labu ba.

²Bo ning dragon, jbu grasa, sgain sogo, soithan khe rem hi, maithai jang rjing si ni khlai hi bokhe kha ba.

³Maithai jang rjing si soyasi jadi buthu khe thokhi phin phuya mani khlai hi, hakhor khithu giriyaba ha dangsing hi bokhe phrao jeb hi lep phung kha.

⁴Boha singhason khe ang nu ba, oraha khamyarao khrip bo bisar khlai mane hukhum rijaoyarao se. Jisu ni grao khe bonsi mithipha ri bani khlai hi, ode bonsi Madai ni grao ni khlai hi bokhro dainso jaoyarao ni bese buthu khebo ang nu ba. Bu buthu mih rege jang boni saokhuli khe khlimyaba niya, bonsi ni bathain buthu ha, bonsi ni yao buthu habo mih rege ni sin laya. Bonsi thangphin hi Krista jang baosi maithai jang rjing si bonsi sason khlai ba.

⁵Maithai jang rjing si soya si de, gibin subung githirao baija phinya. Bo se sagangthao baija phin ba se.

⁶Sagangthao baija phinyaba ha dongphayarao ni khophal hambi. Bonsi ni basao hade thih maginyaba ni hukhum khe bonsi mai nang niya kha. Odehe Madai jang Krista ni jonthairao jahi, bo jang baosi maithai jang rjing si bonsi sason khlai ma.

⁷Maithai jang rjing si ni yaohon hade, soithan khe jebyaba ni phrang bonsi haiger kha.

⁸Odehe, phirthi grongbri ni khrip jadi, Gog ar Magog rao khe thokhi hi, jbah nanglai mani khlai hi bojom khlai ma se; bonsi bangba jakha de sagor ni dergong ha hajeng bangba lai ja du.

⁹Odehe, bonsi de phirthi grongbri ha dongyarao khe naiding hi gatharrao ni khorongma jang nogor hamdao thaoyaba khe bonsi gajeb ba. Thikhabo sorgo ni phrang wai galai phai hi, bonsi khamthar kha.

¹⁰Boha bonsi khe thokhiyaba Soithan, mih rege jang mosol gorasali dongyaba waithai jinghi dongyaba wai ni kharnai ha bonsi khe dangkhla kha, oraha sain hor jug jug saja rijao hi bonsi dukhu rijao ma se.

¹¹Odehe, singhason jnama dedao thaoyaba odehe boni basao ha khamyaba khe ang nu ba. Boni sagang ni phrang phirthi jang nokhasao khaithar ba, ode bonsi ni khlai hi hathan giri kha.

¹²Subung githirao, gede, khasi, singhason ni sagang ha kham hi laisi khu hi dongba khe ang nu ba. Odehe laisi bajab gibin, hayu ni laisi bajab khebo khu ba. Subung githirao laisi bajab buthu ha khusi dang ba lai ning bonsi ni balam ha bisar khlaijao kha.

¹³Sagor de boni bising ha subung githi dongyarao khebo haiger kha. Thihyaba ode subung githi ni noleibo, subung githi dengyaba buthu khebo bonsi haiger hi, khusi dangba lai ning bonsi bisar khlaijao kha.

¹⁴Odehe, thihyaba jang subung githi ni nolei khe bonsi wai ni kharnai ha dang sing ba. Ebo wai ni kharnai de thih maginyaba se.

¹⁵Sere hayu ni laisi bajap ha bumu giri bokhe wai ni kharnai ha bonsi dang sing ba.