Read Dimasa NUJAOYABA 22 Bible Online

NUJAOYABA 22 - Dimasa bible

NUJAOYABA 22

¹Odehe, sorgo ni degla, hayu ni dilam riyenyaba dikhong, krustal longthai lai musibo gibringyayaba, Madai jang Melmasa ni singhason ni phrang baigo hi riyenyaba khe bo a ne phnu ri ba,

²bo dikhong de nogor ni khorong daoglap gejer gejer ha ning su phla phai ba. Dikhong ni ejang nar hayu ni bongphang, jadi gibin gibin bathai thai jhigin, dain phorong thaiyaba dong ba; bo bongphang balai buthu khrip jadi ni hamthai se.

³Oraha musibo sarithai dong nang niya kha. Bo nogor ni bising ha Madai jang Melmasa ni singhason hase bo donghi ma, ode boni dangyasarao boni khusi khe bonsi dang nang,

⁴boni mukhang khe nu hi ning dong nang, bonsi ni bathain habo boni bumu khe reb ma se.

⁵Hor ja nang niya kha; thaophari ni jnama ode sain dungyababo dong nang niya kha, Gabra Madai ning bonsi khe naiso lama se, odehe bonsi jug jug Raja jahi dongla ma se.

⁶Sorgo ni degla ning ani ha thi ba, “Ebo grao buthu lonma ni dong, ar grao bo gibi se, Gabra ni gorasalirao ni bese Madai ning thi du, srap sophai ginyaba jinis buthu khe jar ni dangyasarao ne phnu ri mani khlai hi bo sorgo ni deglarao khe haiha ba se.”

⁷Khna lah! ang sangga ning phai ma ja kha. Ebo laisi bajap ha sainthi dayaba grao buthu khe maniyarao ni khophal hambi! thi hi bo a ne sainthi phai ba.

⁸Ang Johan ning ebo jinis buthu khe nuyaba ar khnayaba se. Odehe, ebo jinis buthu khe ang khna ba ode ang nuba jang, a ne phnu riyaba sorgo ni degla ni igah rogong ha khlim mani khlai hi ang blip pha ba;

⁹thikhabo, bo angkhe thi ba, Olei da khlai, ang de ning jang baosi dangyasa, nini daphlung gorasalirao odehe ebo laisi bajap ni grao buthu khe maniyarao dangyasa saosi se. Madai khe se khlim lah, bo odehe ang khe thi ba.

¹⁰Odehe, ani ha thi ba, “Ebo laisi bajap ha sainthi dayaba grao buthu khe hui dada da deng, bo bubli duha sophai ma ja kha.

¹¹Phap khusi dangyaba phap khusi dang hi ning dong la thing, subung regeyaba rege hi ning dong la thing, subung dormo gibi jang ning dongpha lang la thing, subung gathar gathar ja hi ning dong la thing, thi hi bo sainthi ba.

¹²“Khna lah, ang sangga ning phai ma ja kha, khrip subung jar jar khusi dangba lai ning ri mani khlai hi ani yaosandi ani ha dong.

¹³Ang ning Alpha ar Omega, bo sagangthao ar yaohonthao, khitha ar buju se.”

¹⁴Hayu ni bongphang basao ha bonsi hukhum yaowai phu mani ode, derga ha nogor hap phu mani khlai hi bonsi ni gainsari ragao sisi suyarao ni khophal hambi.

¹⁵Hakhli hade sisa buthu, montro ringyarao, sthaibaiyarao, saokhuli khe biyarao, mosol khe haryaba subung, thokhi baiyarao de dong ma se.”

¹⁶Ang Jisu ning, ebo grao khe longjomrao ne khna ri mani khlai hi, ani sorgo ni deglarao khe ang haiha du. David ni buphangma ode boni greng, ang phorong ni sathrai jnadao thaoyaba se.

¹⁷Bese jang damanjik thi du, Phai! Khrip khnayaba buthu Phai! thi la thing. Dih gangyaba si de phai la thing; bo nangjaoyaba si de hayu ni dih khe magna ling la thing.

¹⁸Ebo laisi bajap ha sainthi dayaba khe khnayaba si de mithi pha ri du, asababo ebo grao buthu khe bara ri khade, laisi bajap ha saja reb hi dongyaba buthu khe boni basao ha Madai ning bara ri ma se.

¹⁹Sere ebo laisi bajap ha sainthi dayaba grao buthu ni phrang khma kha de, ebo laisi bajap ha rebyaba nogor gathar jang hayu bongphang ni phantha khe Madaibo bokhe khaikho ma se.

²⁰Ebo jinis mithi riyaba ning, Jadu, ang sangga ning phai ma se, bo odehe thi ba. Amen. Phai la ga, Gabra Jisu.

²¹Gabra Jisu ni khasaoma boni subung gatharrao jang dong thing. Amen.