Read Dimasa NUJAOYABA 3 Bible Online

NUJAOYABA 3 - Dimasa bible

NUJAOYABA 3

¹Sardis longjom ni degla nihabo edehe reb lah: Madai ni bese masni maiyarao ode sathrai masni maiyaba de edehe thi du:

²Ning khusi dangyaba buthu khe ang tharmai du, ning gathang de thila du, thikhabo ning githi se. Thuyaba smao hi, nini khusi dangma thaoyaba thididihyarao khe rao ri lah, ning khusi dangyaba buthu khe ani Madai ni muh ha so kha thi hi ang nuya.

³Odebani, ning jinis maiblaiyaba ode ning khnayaba buthu khe wainso song hi, mani dada, khah phin lah. Ning smaoya khade makhao lai ang phai hi, nini ha ang phai mani bubli khe tharmaiya jao nang.

⁴Thikhabo, Sardis nogor ni subung gejesi de bonsi ni gainsari buthu khe rege riya hi bonsi dong; bo buthu de gainsari guphu khe thu hi ang jang baosi daobaima se, bonsi de oleiyaba hase dong ja ba.

⁵Bokhe deyaba si de olei jasosi ning sola glaoyaba guphu khe thu rijao nang, ode hayu ni laisima ni phrang boni bumu khe ang khma nang niya. Ani bupha ni sagang ha ar boni deglarao ni sagang ha boni bumu khe ang da khidao ma se.

⁶“Bese jang longjomrao niha grao thiyaba khe khmao dong khade khna la thing!”

⁷Philadelphia longjom ni sorgo degla nihabo edehe reb lah: Subung gathar, subung gibiyaba, David ni chabi dengyaba, bo khru khade saosibo phrao phuya, bo phrao khade saosibo khru phuya, bo edehe thi du.

⁸Ning khusi dangyaba buthu khe ang tharmai du, nai lah, saosibo khru phuyayaba derga khe nini sagang ha khru hi deng du. Khusi dang phuyaba bol nini ha khaisa dong ba, ning ani grao khebo mani du, ode ani bumu khebo ning dangkhlaiya.

⁹Nai lah! Soithan sunagog ni subung, subung thokhi baiyaba, Juda jadi niya hi ning jarkhe Juda thi layarao khe ang labu hi, nini igah rogong ha ang gonggalai ri nang; ning khe ning ang hamjaoba se thi hi buji la nang.

¹⁰Khitha rao hi phura dukhu ajao mani ninthane ang grao riyaba khe ning khah ha deng bani, phirthi ha dongyaba khrip nai nai mani habsao khonglang ni basao ha nai naiyaba sophai ba ha, angbo ning khe sogo nang.

¹¹Sangga ning ang phaima se, nini Raja ni khrothu khe saosibo nini phrang lala phuya mane, ning jinis maiyaba khe hamsisi naiso lah.

¹²Bo deyaba khe, ani Madai ni bikhoh ha thongjerma ang slam nang, bo hathan khe dangkhlaima nang niya kha. Boni ha ning ani Madai ni bumu khe ang reb nang, ode ani Madai ni nogorma ni bumu Jerusalem gadain, sorgo ni ani Madai ni phrang galai phaiyaba bumu jang, bumu gadain khe ang rebbabo reb ma se.

¹³Bese jang longjomrao niha bo thiyaba khe khmao dongkha de khna la thing, thi du.

¹⁴Laodikei longjom ni sorgo degla nihabo edehe reb lah: Amen, grao phlayaba lonma gnang jang sakhi gibiyaba, Madai jinis sangsai jenyaba ha edehe bo thi du:

¹⁵Ning khusi dangyaba buthu khe ang tharmai du, ning magainya, dungbo dungya. Ning magain khade magain so lah, dung khade dungso lah, bokhe ang nangjao du.

¹⁶Magainbo magain soya, dungbo dung soya, dungbru bru se bani, ning khe ang ani khuh ni phrang thukhla ma se.

¹⁷Ning thibai la du, ang de gnang se, somphothi bang bi, musibo soya jaya ning, thikhabo ning dukhi se, khasao sisi suliya, muthai gana, langtha, khongja se thihi jar khe tharmai laya.

¹⁸Odebani ning gnang japhu mani khlai hi wai ha gajao malang hi saginyaba khe ani phrang barai mani khlai hi ning khe ang sibring du. Ning langtha lasisiyaba khe phung mani khlai hi, gainsari guphu khe barai hi, ode ning nuphu mani khlai hi muthai ha hu mani muthai saya bani muli khebo barai lah.

¹⁹Ang hamjaoyarao khede ang johi sibring re. Odebani gibi jang dong dada khah phin lah.

²⁰Nai lah! derga kholei ha song hi ang derga dho du; sere ani khurang khe khna hi derga khru khade boni ha ang hapsing hi, bo jang baosi ang hor ni makham ji nang, bobo ang jang baosi ji ma se.

²¹Bo deyaba si khe ani khamthan ha ang jang baosi ang kham ri ma se. Angbo de dada ani bupha ni khamthan ha ang khamba lai ning.

²²Bese jang longjomrao niha grao thiyaba khe khmao dong khade khna la thing.