Read Dimasa NUJAOYABA 5 Bible Online

NUJAOYABA 5 - Dimasa bible

NUJAOYABA 5

¹Boha singhason ni yaoda gede ha, laisi thonyaba, boni bising ar baji gede ha reb hi, sin masni phayaba khe ang nu ba.

²Sorgo ni degla raodaothaoyaba khebo ang nu ba, bode khurang bol jang, Sere ebo laisi thonyaba khe khru hi, bonsi ni sin buthu khe khruginyaba dong nang? thi hi baikhlaba khe ang nu ba.

³Laisi bajab thonyaba khe khruhi boni bising ha naiphuyaba sorgoha saosi bo giri. Phirthi ha ode phirthi ni bakhla habo bonsi giri.

⁴Laisi bajab thonyaba khe khruhi boni bising ha nai jayaba saosibo giri bani khah bai hi ang gra ba.

⁵Boha, khraorao ni bising ha saosi aniha thi ba, Ning da gra. Nai lah! Juda jadi ni misiraigonma, David ni greng ning sin masni buthu khe khru mane ode, laisi bajab thonyaba khe khu mani khlai hi bo de kha, bo ode thiphai ba.

⁶Odehe, hang gnang mih mabri buthu ode khraorao khamdingyaba, boni gejer gejer ni singhason hade, Melmasa sthai jaoyaba lai songba khe ang nu ba. Melmasa ni muthai masni, bogrong masni dong, bo buthu de phirthi ni khrip hathan ha Madai haihayaba bese masniyaba buthu se.

⁷Bo se phai hi, singhason ha khamyaba ni yaoda gede ni laisi bajab khe laha ba.

⁸Bo lahaba jang ning, hang gnang mih mabri buthu ode khraorao khonbri buthu Melmasa ni sagang ha blip pha ha ba. Bonsi de seranda jang gajao ni khaojeb bahai midimyaba ha gablaiyarao bonsi dilai ba, bo bahai midimyaba buthu de subung gatharrao biyaba se.

⁹Bonsi rajabthai gadain khe rajab ba: Ning, laisi bajab thonyaba khe lahi, boni sin khe khru jayaba ning se! Ning sthaijao hi, nini bithi jang khrip jadi, khrip grao, khrip subung ode khrip greng ni phrang, Madai ne khlai hi subung buthu khe barai kha.

¹⁰Jini Madai ne khlai hi, bonsi khe raji jang Jonthaima buthu ha slam kha; Bonsi se ebo phirthi sao ha bisar khlai ma, ode thi hi bonsi thi ba.

¹¹Ode, ang phin naiha ba de, singhason odehe hang gnang mih mabri buthu ar khraorao ni sersi giding sorgo degla ni gabang khurang khe ang khna ba. Bonsi bangba jakha de rjing rjing ode lakh lakh bonsi gabang bang bi,

¹²bo buthu de, khurang bol jang edehe rajab ba: Melmasa sthai jaoyaba de, raothai ja thing, gnang ja thing, gyan ja thing, bol raoma ja thing, bakhan ja thing, bo mai ginyaba ning! thi ba.

¹³Odehe, khrip jadi hang gnang mih sorgo ni ja thing, phirthi ni ja thing, phirthi ni bakhla ni ja thing, sagor ar boni bising ha dongyaba khrip bo jirik khaoyaba khurang khebo ang khna ba: Singhason ha khamyaba niha, ode Melmasa niha, suguba ja thing, bakhan ja thing, muima ja thing, raothai ja thing, thaoglao thaoglao jang dong thing! thi hi bonsi rajab ba.

¹⁴Boha hang gnang mih mabri de, Amen thi ba. Khraorao bo blip pha hi bonsi khlim ba.