Read Dimasa NUJAOYABA 9 Bible Online

NUJAOYABA 9 - Dimasa bible

NUJAOYABA 9

¹Sorgo ni degla bowayaba boni bibul khe dam ba jang, nokhasao ni phrang phirthi ha sathrai graiblaiyaba khe ang nu ba; boniha hakhor khithu giriyaba ni chabi khe bo yaopha ba.

²Bo ning hakhor khithu giriyaba khe bo khru ba jang, hakhor ni phrang saohi dih khlaiyaba hagab gedeba baigo phaiba lai waikhudi hamsi ning lung lung baigo phai ba, bo waikhudi jang sain jang barbo andar jathar ba.

³Bo waikhudi ni phrang de guyung buthu baigo phai dada phirthi ha galai hi, phirthi ha yung khangkhrai ni raothai lai bonsi ne raothai ri ba.

⁴Bonsi ni bathain ha Madai sin riyaba subung buthu khe garhi de, phirthi ni samphang gathang ja thing, bonlai ja thing, bongphang musi khebo hamya khlaiya mane bonsi khe thi ba.

⁵Sin riyayaba buthu khede bonsi sthaima riya hi, nokha dain bowa se ning dukhu ri mane bo grao ri ba, bonsi ni dukhu rithai de yung khangkhrai basla dikba lai se.

⁶Oleiyaba basain buthu hade subung buthu jar thih lama ne smai nang, thikhabo bonsi mai nang niya; thih lama nangjao nang, thikhabo thihyaba de bonsi khe dangkhlai hi khai ma se.

⁷Guyung buthu ni hajaithai de, jbah ne khlai hi gorai salaiba lai se. Bonsi gajao ni raja ni krothu lai thu ba, bonsi ni mukhangbo subung ni mukhang lai se.

⁸Bonsi masainjik lai khnai deng du, bonsi ni hathai buthubo misiraigonma ni hathai buthu lai se.

⁹Ser ni phi lai jasosi phi bonsi niha dong, bonsi ni bagrang jabyaba khurang de gorai ni roth gabang jbah ne khaiyaba sar lai se.

¹⁰Bonsi ni bermaibo dong, yung khangkhrai ni bis lai bonsi ni raothai dong, bonsi ni bermai dain bowa sosi subung khe dukhu ri phure.

¹¹Hakhor khithu giriyaba ni degla se bonsi ni basao ha raja gedeba jahi bo dong ba, Hebrai grao jang boni bumu khe Abaddon thi du. Greek grao jang de Apolluon thi du.

¹²Sagangthao ni bubain risiyaba lailang kha; odebani bubain risi gibin phinginyaba sophai ma ja kha.

¹³Sorgo ni degla dohyaba boni bibul khe dam ba jang; ode Madai ni sagang ha gajao ni khapra bogrong mabri ni phrang khurang baigo phai ba khe ang khna ba.

¹⁴Bo khurang de bibul diyaba sorgo ni degla, doh niha Euphrates dikhongma ha sorgo ni degla bri khajao hi dongyarao khe haiger lah, ode bo thi ba.

¹⁵Odebani, bo maithai jang badain, bo basain ode, bo gontha ha subung phantha tham saikhao hi phantha si khe sthai mane bonsi salai hi, sorgo ni degla bri salai blai hi, remthao jao hi dongyarao khe bonsi haiger kha.

¹⁶Siphaiya gorai basao ha gayarao bangba jakha de bonsi rjing jang bisatham subung ja du, thi hi bonsi thi ba khe ang khna ba.

¹⁷Odehe, nujaoyaba ha gorai buthu ode bonsi ni basao ha gayarao ani muthai hade elei ja du: Gorai buthu ni basao ha gayarao de wai lai jao du, sapphir longthai lai gisim thaphla ode waithai lai gurmu phi buthu khe pha hi, gorai buthu ni bokhro buthu de misiraigonma ni bokhro lai se, bonsi ni bukhuh ni phrang wai jang waikhudi ode waithai buthu baigo phai ba.

¹⁸Bonsi ni bukhuh ni phrang baigo hi, saja matham wai jang waikhudi ode waithai buthu ning subung khe phantha tham saikhao hi phantha si khe sthai kha.

¹⁹Gorai buthu ni raothai bonsi ni bukhuh buthu ni phrang ode bonsi ni bermai buthu hase dong ba; bonsi ni bermai de jbu lai se, bonsi ni bokhro bo dong, bo jang se subung buthu khe sari re.

²⁰Olei saja habo sthaiya hi thaoyaba khrip gibin subung buthu bonsi ni yao ha baigoyaba buthu bonsi ni biyaba ni phrang bonsi khah phindaoya, sgain sogo khe biyaba ode, gajao ja thing, rangkhrao ja thing, gangthing ja thing, longthai ja thing, bongphang ja thing, saokhuli slamyaba, nu phuyayaba, khnayayaba odehe hamphuyayaba khe ja thing, biba khe bonsi thao daoya.

²¹Bonsi ni sthai baiyaba buthu, bonsi ni montro buthu, bonsi ni mijingma odehe khao jibaiyaba khebo bonsi ni khah ha phindaoya.