Read Diospa Simin Qelqa GÉNESIS 11 Bible Online

GÉNESIS 11 - Diospa Simin Qelqa bible

GÉNESIS 11

¹Kay pachapiqa ch'ulla rimayllan karqan, kaq simikunallataq.

²Inti lloqsimuy ladomanta runakuna puririspataq, Sinar hallp'api pampata tarirqanku, chaypin tiyarqanku.

³Hinaspan ninakurqanku: — Hamuychis, ladrillota ruwasunchis, hinaspa ninapi kanasunchis, nispa. Ladrillon ruminku karqan, breataq t'urunku karqan.

⁴Ninakullarqankutaq: — Kunanqa, huk llaqtata perqasunchis, hanaq pachakama aypaq torretawan. Allin mentasqa runataq kasunchis, amataq kay pachantinmanpas ch'eqesunchu, nispanku.

⁵Chaymi Señor Diosqa uraykamurqan runakunaq perqasqan llaqtata torretawan rikunanpaq.

⁶Hinaspan Señor Diosqa nirqan: — Kay runakunaqa ch'ullallan, llapankutaq huk rimaynillayoq kanku. Ruwaytan qallarinkuña, paykunataqa manan imapas hark'ayta atinqachu ruway yuyaykusqankuta.

⁷Kunanqa uraykusunchis, hinaspa paykunaq rimayninkuta t'ikrarqarisunchis, ama rimasqankuta entiendenakunankupaq, nispa.

⁸Ahinatan Señor Diosqa chaymantapacha kay pachantinman paykunata ch'eqechirqan, chay hinapitaq llaqta perqayta qollupurqanku.

⁹Chayraykun chaypa sutinqa “Babel”[7] nisqa kapurqan, Señor Diospa chaypi kay pachantin rimayta t'ikrarqarisqanrayku. Chaymantapachan Señor Diosqa runakunata kay pachantinman ch'eqeykachirqan.

¹⁰Kaykunan Sempa mirayninkuna. Millp'uq para unu iskay wataña pasaqtinmi, Semqa pachak watayoq kashaspa Arfaxadta churiyarqan.

¹¹Arfaxadta churiyasqan qhepatataq Semqa kawsarqan phisqa pachak watatawanraq. Churiyallarqantaqmi qhari wawakunatapas warmi wawakunatapas.

¹²Arfaxadmi kinsa chunka phisqayoq watayoq kashaspa churiyarqan Salata.

¹³Salata churiyasqan qhepatataq Arfaxadqa kawsarqan tawa pachak kinsayoq watatawanraq. Churiyallarqantaqmi qhari wawakunatapas warmi wawakunatapas.

¹⁴Salaqa kinsa chunka watayoq kashaspan churiyarqan Heberta.

¹⁵Heberta churiyasqan qhepatataq Salaqa kawsarqan tawa pachak kinsayoq watatawanraq. Churiyallarqantaqmi qhari wawakunatapas warmi wawakunatapas.

¹⁶Hebermi kinsa chunka tawayoq watayoq kashaspa churiyarqan Pelegta.

¹⁷Pelegta churiyasqan qhepatataq Heberqa kawsarqan tawa pachak kinsa chunka watatawanraq. Churiyallarqantaqmi qhari wawakunatapas warmi wawakunatapas.

¹⁸Pelegmi kinsa chunka watayoq kashaspa churiyarqan Reuta.

¹⁹Reuta churiyasqan qhepatataq Pelegqa kawsarqan iskay pachak isqonniyoq watatawanraq. Churiyallarqantaqmi qhari wawakunatapas warmi wawakunatapas.

²⁰Reuqa kinsa chunka iskayniyoq watayoq kashaspan churiyarqan Serugta.

²¹Serugta churiyasqan qhepatataq Reuqa kawsarqan iskay pachak qanchisniyoq watatawanraq. Churiyallarqantaqmi qhari wawakunatapas warmi wawakunatapas.

²²Serugmi kinsa chunka watayoq kashaspa churiyarqan Nacorta.

²³Nacorta churiyasqan qhepatataq Serugqa kawsarqan iskay pachak watatawanraq. Churiyallarqantaqmi qhari wawakunatapas warmi wawakunatapas.

²⁴Nacormi iskay chunka isqonniyoq watayoq kashaspa churiyarqan Tareta.

²⁵Tareta churiyasqan qhepatataq Nacorqa kawsarqan pachak isqonniyoq watatawanraq. Churiyallarqantaqmi qhari wawakunatapas warmi wawakunatapas.

²⁶Tareqa qanchis chunka watayoq kashaspan churiyarqan Abramta, Nacorta, Harantawan.

²⁷Kaymi Tarepa mirayninkuna. Tareqa churiyarqan Abramta, Nacorta, Harantawan. Harantaq churiyarqan Lot-ta.

²⁸Haranqa nacesqan Caldea suyu Ur llaqtapin wañukapurqan, taytan Taré kawsashaqtinraq.

²⁹Abrammi casarakurqan Saraiwan, Nacortaq casarakurqan Haranpa ususin Iscaq ñañan Milcawan.

³⁰Saraiqa mana wachakuqmi karqan, manataq wawan karqanchu.

³¹Tareqa Abram churinta, nieton Lot-ta, Abrampa warmin Saraitawanmi pusarikurqan, hinaspan paykunawan lloqsipurqan Caldea suyu Ur llaqtamanta, Canaán suyuman ripunanpaq, ichaqa Harán llaqtaman chayaspankun chaypi tiyapurqanku.

³²Tareqa iskay pachak phisqayoq watayoq kashaspanmi Haranpi wañukapurqan.