Read Diospa Simin Qelqa GÉNESIS 13 Bible Online

GÉNESIS 13 - Diospa Simin Qelqa bible

GÉNESIS 13

¹Abrammi Egiptomanta lloqsirqan Neguev hap'iyman, warmintin, lliw kaqninkunantin, hinallataq Lotpas paywan kuska.

²Abramqa qhapaqllañan karqan uywayoq, qolqeyoq, qoriyoq.

³Hinaspan asta-astarikuspa Neguev ch'inneq ladonta Betelkama kutimpurqan, Betelwan Haiwan tupaypi ñawpaq karpan karqan chayneqkama,

⁴chaypi ñawpaqña altarta perqasqanman, hinaspan Abramqa chaypi Señor Diosmanta mañakurqan.

⁵Hinallataq Abramwan puriq Lotpas karqan ovejayoq, cabrayoq, wakayoq, karpakunayoq ima.

⁶Hallp'ataq mana ayparqanchu paykuna kuska tiyanankupaq, askha uywakunayoq kasqankurayku, chaymi huk cheqasllapi kuska tiyayta mana atirqankuchu.

⁷Abrampa uywa michiqninkunan, Lotpa uywa michiqninkunawan ch'aqwarqanku. (Chay tiempopin chayneqpi tiyarqanku Canaán runakuna Ferez runakunapas).

⁸Chaymi Abramqa Lot-ta nirqan: — Ama ch'aqwasunchu ñoqawan qanwan, amallataq uywa michiqninchiskunapas ch'aqwachunchu, wawqentinmi kanchis.

⁹Kay llapan hallp'aqa munayniykipin kashan akllarikunaykipaq. Valekuykin ñoqamanta t'aqarikapunaykita. Lloq'eman qan rinki chayqa, ñoqa pañaman risaq, pañaman qan rinki chaytaq, ñoqa lloq'eman risaq, nispa.

¹⁰Hinaqtinmi Lotqa qhawarirqan, hinaspan rikurqan Jordán pampantinta, llapallan qarpayniyoq Zoarkama kasqanta, Señor Diospa huertanta hina, Egipto hallp'ata hina. (Chay hinan karqan Señor Dios Sodomata Gomorrata manaraq thunishaqtin).

¹¹Chaymi Lotqa paypaq akllakurqan Jordán pampata llapanta, hinaspataq inti lloqsimuy ladoman astakurqan, ahinapin t'aqarinakapurqanku.

¹²Abrammi tiyarqan Canaán hallp'api, Lot-taq tiyarqan pampa llaqtakuna qayllapi, karpankunata asta-astarikuspa Sodomaman chayanankama.

¹³Sodoma runakunan ichaqa millay karqanku, Señor Dios contra sinchi huchasapakuna.

¹⁴Lotpa t'aqarikapusqan qhepatataq, Señor Diosqa Abramta nirqan: — Maypichus kashasqaykimanta allintapuni qhawariy wichayta, urayta, inti lloqsimuyta, inti haykuytawan.

¹⁵Lliw hallp'a rikusqaykitan wiñaypaq qosqayki, hinallataq mirayniykimanpas.

¹⁶Ñut'u hallp'ata hinan mirayniykita askhayachisaq, imaynan ñut'u hallp'aqa mana yupay atina, ahinallataqmi mirayniykipas mana yupay atina kanqa.

¹⁷Hatariy, puriy, hallp'aq wask'antapas, anchontapas, qanmanmi qosqayki, nispa.

¹⁸Abramtaq karpanta astaspa rirqan, hinaspan Hebrón qaylla Mamrepi encina sach'akuna qayllapi tiyakurqan. Chaypin Señor Diospaq altarta perqarqan.