Read Diospa Simin Qelqa GÉNESIS 16 Bible Online

GÉNESIS 16 - Diospa Simin Qelqa bible

GÉNESIS 16

¹Abrampa warmin Saraiqa mana wachakuqmi karqan, ichaqa Saraipan karqan Egipto warmi kamachin, Agar sutiyoq.

²Chaymi Saraiqa Abramta nirqan: — Qanqa yachankin Señor Diosqa mana wachakuqman tukuchiwasqanta, valekuykin kamachiywan tiyanaykipaq, ichapas paypi wawaykuna kanman, nispa. Hinan Abramqa Saraita kasurqan.

³Chaymi Saraiqa Egipto warmi kamachin Agarta qosan Abramman warmin kananpaq qorqan, chunka wataña Abramqa Canaán suyupi kashaqtin.

⁴Hinan Abramqa Agarwan puñurqan, paytaq wiksallikurqan. Wiksallikuspataq patronanta pisichayta qallarirqan.

⁵Hinaqtinmi Saraiqa Abramta nirqan: — ¡Qanmi kaypaqqa huchayoq kanki! Ñoqan kamachiytaqa warmiyki kananpaq qorqayki, wiksallikuspañataq pisichashawan. ¡Señor Diosña mayqenninchistapas huchachawasun! nispa.

⁶Abramtaq Saraita nirqan: — Kayqa kamachiykiqa makiykipin kashan, ima munasqaykita payta ruway, nispa. Sarai sinchita muchuchiqtintaq Agarqa ayqekapurqan.

⁷Señor Diospa angelninmi ichaqa Agarta tarirqan ch'inneqpi Shur ñanpi kaq unu pukyu patapi.

⁸Hinaspan payta nirqan: — Agar, Saraipa kamachin, ¿maymantan hamushanki, maytataq rishanki? nispa. Paytaq kutichirqan: — Patronay Saraimantan ayqekushani, nispa.

⁹Chaymi Señor Diospa angelninqa payta nirqan: — Patronaykiman kutipuy, hinaspa payman k'umuykuy.

¹⁰Mirayniykitan sinchita askhayachisaq, mana yupay atiymi kanqa askha kasqanrayku.

¹¹Ñan wiksallikunkiña, qhari wawatan wachakunki, hinaspan Ismael[8] sutita churanki, waqasqaykita Señor Diospa uyarisqanrayku.

¹²Paymi salqa asno hina kanqa, llapawanmi maqanakunqa, llapataq pay contra maqanakunqa, llapa wawqenkuna hark'akushaqtintaq tiyanqa, nispa.

¹³Hinan Agarqa rimaykuqnin Señor Diosta suticharqan: Qanmi “Rikuqniy Dios kanki”, nispa. Payqa nirqanmi: — Diosmi rikuwan, kawsashaniraqtaq, nispa.

¹⁴Chaymi chay pukyuqa “Rikuwaqniy kawsaq-pukyu” nisqa kapurqan. Cadespa Beredpa chawpinpin kashan.

¹⁵Agarqa Abrampaqmi huk qhari wawata wachakurqan, Abramtaq chay churinta suticharqan Ismaelta.

¹⁶Agarmi Ismaelta wachakurqan Abram pusaq chunka soqtayoq watayoq kashaqtin.