Read Diospa Simin Qelqa GÉNESIS 17 Bible Online

GÉNESIS 17 - Diospa Simin Qelqa bible

GÉNESIS 17

¹Abram isqon chunka isqonniyoq watayoq kashaqtintaq, Señor Diosqa payman rikhurispa, nirqan: — Ñoqan Tukuy-atiyniyoq Diosqa kani, munayniyman hina chaninta kawsay.

²Ñoqan qanwan rimanakusaq, anchatan askhayachisqayki, nispa.

³Hinaqtinmi Abramqa pampakama k'umuykukurqan, Diostaq payta nirqan:

⁴— Kaymi qanwan rimanakuyniy: Askha runaq taytanmi kanki.

⁵Manañan sutiykiqa Abramchu kanqa, aswanpas sutiykiqa Abrahammi[9] kapunqa, askha runaq taytanpaq qanta churasqayrayku.

⁶Anchatan askhayachisqayki, runakunan qanmanta miranqa, hinallataq reykunapas qanmanta paqarinqa.

⁷Ñoqan qanwanpas mirayniykikunawanpas rimanakusqayta wiñaypaq hunt'asaq, ahinapin qanpapas mirayniykikunaqpas Diosniykichis kasaq.

⁸Qanmanwan mirayniykimanwanmi kay tiyashasqaykichis hallp'ata qosqaykichis. Lliw Canaán hallp'an wiñay herenciaykichis kanqa, qankunaq Diosniykichistaq kasaq, nispa.

⁹Diosqa Abrahamta nillarqantaqmi: — Qantaq ichaqa rimanakuyniyta waqaychanki, qanpas mirayniykiq mirayninkunapas.

¹⁰Kaymi ñoqawan qankunawan mirayniykikunawanpas rimanakuyniy kanqa hunt'anaykichispaq: Llapa qharikunan qankunawan tiyaqkuna, qhari-kaynin señalasqa kanqaku.

¹¹Qhari-kayniykichis qarachatan kuchuqakunkichis, ñoqawan qankunawan rimanakusqay señal kananpaq.

¹²Qankunawan kashaq pusaq p'unchayniyoq llapa qhari wawan señalasqa kanqa, wasiykipi naceqpas, mana mirayniyki mayqen karu llaqtayoqmanta rantikusqaykipas.

¹³Wasiykipi naceqpas, rantisqa kaqpas llapankun señalasqa kanqaku, ahinapin wiñaypaq rimanakuyniy señalqa cuerpoykichispi kanqa.

¹⁴Mana señalasqa runaqa ayllun ukhumantan qarqosqa kanqa, rimanakuyniyta p'akisqanrayku, nispa.

¹⁵Diosqa Abrahamta nillarqantaqmi: — Sarai warmiykitaqa amañan “Sarai” ninkiñachu, aswanpas sutinqa kapunqa “Sara”.[10]

¹⁶Ñoqataq payta saminchasaq, paypin churitapas qollasqaykitaq. Arí, paytan saminchasaq, hinan suyukunaq maman kanqa, paymantan runakunaq reynin paqarinqa, nispa.

¹⁷Hinaqtinmi Abrahamqa pampakama k'umuykukuspa asikurqan, sonqonpitaq nirqan: — ¿Pachak watayoq runapaqchu qhari wawa nacenman? ¿Sarapas isqon chunka watayoqñachu wachakunman? nispa.

¹⁸Hinaspanmi Abrahamqa Diosta nirqan: — Allinchá kanman Ismaelqa qanpaq hina kawsanman chayqa, nispa.

¹⁹Hinan Diosqa kutichirqan: — Cheqaqtapunin warmiyki Saraqa wawata qanpaq wachakunqa, sutichankitaq Isaacta.[11] Rimanakuyniytataq paywan wiñaypaq takyachisaq, hinallataq mirayninkunawanpas.

²⁰Ismaelpaqpas uyarillarqaykitaqmi. Paytaqa saminchasaqmi, mirachisaqmi, anchatan askhayachisaqpas. Chunka iskayniyoq kamachikuqkunatan churiyanqa, hatun suyumantaq tukuchisaq.

²¹Rimanakuyniytan ichaqa Isaacwan takyachisaq, paytan Saraqa qanpaq wachakunqa kunan hina tiempo q'aya watapi, nispa.

²²Hinaspan paywan rimayta tukuspa, Diosqa Abrahampa qayllanmanta ripurqan.

²³Abrahamtaq churin Ismaelta hap'ispan, wasinpi llapa naceq kamachikunatapas, llapa rantisqankunatapas, wasinpi kaq llapa qharikunatapas, chay kikin p'unchaypi paykunata qhari kaynin qarachata kuchuqaspa señalarqan, Diospa kamachisqanman hina.

²⁴Abrahamqa señalakushaspa isqon chunka isqonniyoq watayoqmi karqan,

²⁵churin Ismaeltaq chunka kinsayoq watayoq karqan señalashaqtinku.

²⁶Chay kikin p'unchaypin señalasqa karqan Abrahampas churin Ismaelpas,

²⁷hinallataq wasinpi llapa qharikunapas, wasinpi naceq kamachikunapas, karu llaqtayoqkunamanta rantisqakunapas, paywan kuskan señalasqa karqanku.