Read Diospa Simin Qelqa GÉNESIS 22 Bible Online

GÉNESIS 22 - Diospa Simin Qelqa bible

GÉNESIS 22

¹Chaykuna qhepatan Diosqa Abrahamta probarqan, nirqantaq: — Abraham, nispa. Paytaq kutichirqan: — Kaypin kashani, nispa.

²Hinan Diosqa nirqan: — Kunanqa munasqayki sapallan churiyki Isaacta pusay, hinaspa Moriah hap'iyman riy, chaypin payta ruphachina sacrificiota haywamuwanki, ñoqa nisqayki chay huknin orqo patapi, nispa.

³Hinaqtinmi Abrahamqa tutallamanta sayarispa asnonta caronarqan, iskay kamachinta churin Isaactawantaq waqyarqan. Llant'atapas ruphachina sacrificiopaq llant'arqan, hinaspanmi puririrqanku Diospa nisqan cheqasman.

⁴Kinsakaq p'unchaypitaq Abrahamqa qhawarirqan, hinaspa karumanta chay cheqasta rikurqan.

⁵Chaymi Abrahamqa kamachinkunata nirqan: — Kaypi asnontin suyashawayku, ñoqawan churiypiwantaq haqaykama rispa Diosta yupaychamusaqku, hinaspataq kutimusaqku, nispa.

⁶Hinan Abrahamqa ruphachina sacrificiopaq llant'ata hoqarispa churin Isaacman q'epichirqan, paytaq ninata cuchillotawan makinpi aparikurqan, iskayninkutaq kuska rirqanku.

⁷Isaacqa taytan Abrahamtan nirqan: — Taytáy, nispa. Paytaq kutichirqan: — ¿Ima ninkin, churíy? nispa. Isaactaq nirqan: — Kayqa ninapas llant'apas, ¿maytaq borregori ruphachina sacrificiopaq? nispa.

⁸Chaymi Abrahamqa kutichirqan: — Churíy, kikin Diosmi ruphachina sacrificiopaq borregotaqa churamunqa, nispa. Iskayninkutaq risharqanku.

⁹Diospa nisqan cheqasman chayaspankutaq, Abrahamqa altarta perqaspa llant'ata chayman tawqaykurqan. Churin Isaacta mayt'uykuspataq altar pata llant'aman churaykurqan.

¹⁰Hinaspan Abrahamqa cuchillota hoqarirqan churinta nak'ananpaq,

¹¹chayllamanmi Señor Diospa angelninqa hanaq pachamanta waqyamuspa nirqan: — ¡Abraham, Abraham! nispa. Paytaq kutichirqan: — Kaypin kashani, nispa.

¹²Hinan nimurqan: — Ama waynachata nak'aychu, amataq imanaypaschu, yachaniñan Diosta manchakuq kasqaykita, manan sapan churiyki qoytapas hark'akuwarqankichu, nispa.

¹³Hinan Abrahamqa qhepanta qhawarikuspa huk anejota rikurqan waqranmanta huk ch'aphra-ch'aphraqpi chakaykusqata. Hinaspan payqa asuykuspa anejota hap'irqan, churinpa rantinpitaq ruphachina sacrificiota haywarqan.

¹⁴Chaymi Abrahamqa chay cheqasta suticharqan “Señor Diosmi churamunqa”, nispa. Chaytan kunankama ninku: “Señor Diospa orqonpin churamusqa kanqa”, nispa.

¹⁵Señor Diospa angelnintaq hanaq pachamanta iskaykaq kutita Abrahamta waqyamuspa

¹⁶nirqan: — Señor Diosmi nin, kayta ruwasqaykiraykun, manataq sapan churiykita qoytapas hark'awasqaykiraykun ñoqaqa sutiypi jurani anchatapuni qanta saminchanaypaq.

¹⁷Anchatapunin mirayniykita askhayachisaq hanaq pacha ch'askakunata hina, lamar-qocha patapi aqota hina. Mirayniykin awqaykikunata atipanqa,

¹⁸simiyta kasukusqaykiraykun kay llapan ayllukunapaqpas samincha kanqaku, nispa.

¹⁹Chaymantataq Abrahamqa kamachinkunaman kutimpurqan, hinaspan Beersebaman kuska ripurqanku. Beersebapin Abrahamqa tiyarqan.

²⁰Chaykuna qhepatataq Abrahamman willarqanku: Milcan wawqeyki Nacorpaq wachakun

²¹phiwin Uzta, wawqen Buzta, Aranpa taytan Quemuelta,

²²Quesedta, Hazota, Pildasta, Jidlafta, Betueltawan, nispa.

²³Betuelqa Rebecaq taytanmi karqan. Chay pusaq wawakunatan Milca wachakurqan Abrahampa wawqen Nacorpaq.

²⁴Nacorpa tiyaqmasin Reumpas wachakullarqantaq Tebata, Gahamta, Tahasta, Maacatawan.