Read Diospa Simin Qelqa GÉNESIS 23 Bible Online

GÉNESIS 23 - Diospa Simin Qelqa bible

GÉNESIS 23

¹Saran kawsarqan pachak iskay chunka qanchisniyoq watata,

²hinaspan Saraqa Quiriat-arbapi wañukapurqan (chaymi Hebrón), Canaán suyupi. Abrahamqa Saramanta llakikuspa waqaqmi rirqan.

³Hinaspataq wañuqnin qayllamanta hatarispa Het runakunata nirqan:

⁴— Karu llaqtayoqmi purikuqmi qankuna ukhupi kani, aya p'ampana hallp'ata qowaychis, wañuqniyta p'ampakapunaypaq, nispa.

⁵Hinan Het runakunaqa nirqanku:

⁶— Wiraqocháy, uyariwayku, ancha atiyniyoqmi ñoqayku ukhupi kanki, allinkaq aya p'ampanaykupi wañuqniykitaqa p'ampakuy, manan mayqenniykupas aya p'ampanataqa hark'asqaykikuchu, nispa.

⁷Chaymi Abrahamqa sayarispa Het runakunaman k'umuykukurqan,

⁸hinaspan paykunata nirqan: — Wañuqniyta p'ampaykapunayta munankichis chayqa, uyariykuwaychis, Zoharpa churin Efronta valeykapuwaychis,

⁹chakranpa k'uchunpi Macpela qaqa wasita qowananpaq. Chanin preciotan chaymanta qopusaq, ahinapin qankuna ukhupi aya p'ampanay kanqa, nispa.

¹⁰Efronqa Het runakunawan kuskan kasharqan, paymi Abrahamman kutichirqan, Het runakunaq uyarinanpaq, llaqta punkuta llapa haykuqkunaqpas uyarinanpaqwan:

¹¹— Manan, wiraqocháy, uyariway, qosqaykin chakrata, qollasqaykitaqmi chaypi kaq qaqa wasitapas, llaqtamasiykunaq qayllanpi chayta qosqayki, wañuqniykita p'ampanaykipaq, nispa.

¹²Hinaqtinmi Abrahamqa Het runakunaq ñawpaqenpi k'umuykukurqan,

¹³hinan llapanku uyarinanpaq Efronman kutichirqan: — Uyariykullaway, qosqaykin chakraq precionta, chaskillaway, hinan wañuqniyta chaypi p'ampasaq, nispa.

¹⁴Efrontaq Abrahamman kutichirqan:

¹⁵— Wiraqocháy, uyariway. Hallp'aqa valen tawa pachak qolqen. ¿Manachu chanillan qanpaqpas ñoqapaqpas? P'ampakullay wañuqniykitaqa, nispa.

¹⁶Hinaqtinmi Abrahamqa Efronwan rimanakuspa, mañakusqanman hina qolqeta Efronman pesarqan, Het runakunaq uyarishasqan vendenakuy precio tawa pachak qolqeta.

¹⁷Ahinapin, Efronpa Mamre chimpa Macpelapi kaq chakranqa qaqa wasipas, lliw sach'akunapas, lliw qorpa muyuriqpi kaqkunapiwan,

¹⁸Abrahampa kaqnin kapurqan, Het runakunaq rikusqan, llaqta punkuta llapa haykuqkunaqpas rikusqan.

¹⁹Chay qhepatataq Abrahamqa warmin Sarata p'amparqan Mamre chimpa Macpelapi kaq qaqa wasipi, Canaán suyupi.

²⁰Chakrapas chaypi kaq qaqa wasipas Abrahampan kapurqan, aya p'ampanapaq Het runakunamanta rantisqa.