Read Diospa Simin Qelqa GÉNESIS 24 Bible Online

GÉNESIS 24 - Diospa Simin Qelqa bible

GÉNESIS 24

¹Abrahamqa yuyaqñan kapurqan, askha watayoq runaña, Señor Diosmi Abrahamtaqa tukuypi samincharqan.

²Abrahammi aswan machukaq kamachin mayordomota waqyaspa nirqan: — Kunanqa makiykita phakay ukhuman churaykuy,

³hinaspa jurapuway hanaq pacha kay pacha Señor Diospa sutinpi, Canaán warmikunamantaqa amapuni churiypaq warmita pusamunaykipaq, paykuna ukhupin ñoqa tiyani.

⁴Aswanpas rinki hallp'ayta aylluypata, hinaspan churiy Isaacpaq warmita pusamunki, nispa.

⁵Kamachitaq payman kutichirqan: — Warmiqa manapaschá kayman pusachikamuyta munanqachu. ¿Kutichipusaqchu churiykita lloqsimusqayki hallp'aman? nispa.

⁶Hinan Abrahamqa payta nirqan: — ¡Amapunin churiytaqa haqayman pusankichu!

⁷Hanaq pacha Señor Diosmi taytaypa wasinmanta aylluypa hallp'anmantapas pusamuwarqan, hinaspa juramentowan prometewarqan: Mirayniykimanmi kay hallp'ata qosaq, nispa. Paymi ñawpaqeykita angelninta kachanqa, churiypaq warmita haqaymanta pusamunaykipaq.

⁸Warmitaqchus kayman mana pusachikamuyta munanqa chayqa, manan huchaykiñachu kanqa jurapuwasqaykimanta, churillayta amaqa haqayman pusaychu, nispa.

⁹Hinaqtinmi kamachiqa patronnin Abrahampa phakan ukhuman makinta churaykuspa, chayta hunt'ananpaq jurarqan.

¹⁰Hinaspataq kamachiqa patronninpa camellonkunamanta chunka camellota akllarqan, patronninpa may sumaq kaqninkunata aparikuspataq puririrqan. Chaymantataq Mesopotamiapi kaq Nacorpa llaqtanman chayarqan.

¹¹Camellokunatan samaykachirqan llaqta hawapi, unu p'uytu qayllapi, warmikunaq unuman lloqsimunan rasphiyaykuy horasta.

¹²Hinaspan mañakurqan: — Señor Diosnilláy, patronniy Abrahampa Diosnin, rogakuykin kunan allinta tupaykuchiway, patronniy Abrahamta khuyapayay.

¹³Kayqa unu p'uytu patapin kashani, kay llaqta sipaskunataq unuman lloqsimunqaku.

¹⁴Kay hinayá kachun, mayqen sipastachus ñoqa nisaq: Ama hinachu kay, p'uyñuykita uraykachikuy ukyaykunaypaq, nispa, hinataq pay niwanqa: — Ukyaykuy, camelloykikunamanpas ukyachillasaqtaq, nispa chayqa, chay sipas kachun kamachiyki Isaacpaq akllapusqayki. Ahinapin yachasaq patronniyta khuyapayasqaykita, nispa.

¹⁵Pay manaraq rimayta tukushaqtintaq Rebecaqa rikhurimurqan, payqa Abrahampa wawqen Nacorpa warmin Milcaq churin Betuelpa ususinmi karqan, paymi lloqsimurqan rikran patapi p'uyñuntin.

¹⁶Sipasqa ancha sumaq rikch'ayniyoq doncellan karqan, manaraq qhariwan puñuq. Paymi p'uytuman uraykamurqan, hinaspan p'uyñuman hunt'aykachispa kutipusharqan.

¹⁷Hinan kamachiqa phawarispa ayparqan, nirqantaq: — Valekuykin as chhikallanta p'uyñuykimanta unuta ukyarichiway, nispa.

¹⁸Chaymi sipasqa kutichirqan: — Ukyaykuy, wiraqocha, nispa. Hinaspan p'uyñunta usqhaylla uraykachikuspa payman ukyachirqan.

¹⁹Payta ukyachisqanmantataq, nirqan: — Unuta wisillasaqtaq camelloykikunapaqpas, saksanankukama ukyanankupaq, nispa.

²⁰Hinaspanmi usqhaylla p'uyñumanta uywa ukyanaman hich'aykurqan, phawarillarqantaq huktawan p'uytuman unuta wisimunanpaq, hinaspan llapa camellokunapaq wisimurqan.

²¹Chay qharitaq ch'inlla payta qhawasharqan. Señor Diosqa purimuyninpi yanapasqachus icha manachus chayta yachananpaq.

²²Camellokuna ukyayta tukuqtintaq, qhariqa sipasman qorqan senqanpaq ancha chaniyoq qori argollata, makinkunapaqtaq phatu iskay qori brazaletetawan.

²³Hinaspanmi nirqan: — Willaykuway, ¿piqpa ususintaq kanki? ¿Taytaykiq wasinpi kanmanchu campo qorpachakunaykupaq? nispa.

²⁴Paytaq kutichirqan: — Milcaq churin Betuelpa ususinmi kani, paytan Milcaqa Nacorpaq wachakurqan.

²⁵Kashanmi wasiykupi pajapas askha q'achupas, qorpachakunapaq campopas, nispa.

²⁶Hinaqtinmi chay qhariqa k'umuykurqan, hinaspa Señor Diosta yupaychaspa

²⁷nirqan: — Patronniy Abrahampa Diosnin Señor saminchasqa kachun, patronniytan khuyapayarqanki, hunt'aq kayniykitapas reqsichirqanki, patronniypa wawqenkunaq wasinmanmi cheqanta pusamuwanki, nispa.

²⁸Hinan sipasqa phawaspa chaykunata mamanpa wasinpi willakurqan.

²⁹Rebecaqqa karqanmi huk turan Labán sutiyoq, paymi pananpa senqanpi argollata makinkunapitaq brazaletekunata rikuspa, hinallataq: “Chay hinatan chay qhari rimapayawan”, nispa niqta uyarispa, chay qhariman phawarirqan p'uytu qayllata. Payta camellokunaq kasqanpi p'uytu qayllapi sayashaqta rikuspataq

³⁰

³¹nirqan: — Hamuy, Señor Diospa saminchasqan, ¿imanaqtintaq hawapi kashanki? Wasitapas allichamuniñan, hinallataq camellokunapaq kanchatapas, nispa.

³²Hinan chay qhariqa wasiman haykurqan, Labantaq camellokunaq carganta paskaspa pajata q'achuta qararqan, hinallataq unutapas payman hamuysiq runakunamanwan qorqan chakinkuta mayllikunankupaq.

³³Hinamantataq mikhunata payman haywarqanku, paytaq ichaqa nirqan: — Manan mikhuymanraqchu imamanchus hamusqayta ninaykama, nispa. Labantaq payta nirqan: — Chay hinaqa, willawayku, nispa.

³⁴Hinaqtinmi nirqan: — Ñoqaqa Abrahampa kamachinmi kani.

³⁵Patronniytan Señor Diosqa anchatapuni saminchan, chaymi payqa hatunchasqa. Paymanmi qon ovejakunata, wakakunata, qolqeta, qorita, qhari kamachikunata, warmi kamachikunata, camellokunata, asnokunata ima.

³⁶Patronniypa warmin Saran yuyaq-kayninpiña huk qhari wawata patronniypaq wachakurqan, chay churinmanmi qopun llapan kaqninta.

³⁷Patronniytaq jurachiwarqan: Aman churiypaqqa warmita pusamunkichu Canaán warmikunamanta, paykunaq hallp'anpiña tiyani chaypas.

³⁸Aswanpas rinki taytaypa wasintan, aylluypata churiypaq warmita pusamunaykipaq, nispa.

³⁹Ñoqataq nirqani: Manapaschá warmiqa pusachikamuwanqachu, nispa.

⁴⁰Hinaqtinmi payqa niwarqan: Señor Diospa munayninman hinan kawsarqani, paymi angelninwan pusachisunki, purisqaykipipas yanapasunki. Hinaspan churiypaq warmita pusamunki aylluymanta taytaypa wasinmanta,

⁴¹hinan jurapuwasqaykimanta mana huchayoqñachu kanki. Aylluyman chayaqtiykitaqchus warmita mana qomusunkiku chayqa, manan huchayoqñachu kanki jurapuwasqaykimanta, nispa.

⁴²Kunanmi p'uytuman chayamuspa mañakurqani: Señor, patronniy Abrahampa Diosnin, kunan purimusqaypi qan yanapashawanki chayqa,

⁴³kay hinayá kachun, kunanqa kay unu p'uytu patapin kashani, mayqen sipaschus unuman lloqsimunqa, paytan nisaq: Ama hinachu kay, p'uyñuykimanta as chhikallanta unuta ukyarichiway, nispa.

⁴⁴Hinataq pay niwanqa: Ukyaykuy, camelloykikunapaqpas unuta wisisaq, nispa chayqa, chay kachun patronniypa churinpaq akllapusqayki warmi, nispa.

⁴⁵Hinan sonqoypi rimayta manaraq tukushaqtiy, Rebecaqa rikran patapi unu p'uyñuntin lloqsimurqan, hinaspan p'uytuman uraykuspa unuta wisimurqan, chaymi payta nirqani: Valekuykin, unuta ukyarichiway, nispa.

⁴⁶Hinaqtinmi p'uyñunta rikran patamanta uraykachikuspa niwarqan: Ukyaykuy, camelloykikunatapas ukyachillasaqtaq, nispa. Chaymi ukyarqani, camelloykunamanpas ukyachillarqantaq.

⁴⁷Hinan payta tapurqani: ¿Piqpa ususintaq kanki? nispa. Chaymi payqa kutichiwarqan: Nacorpa churin Betuelpa ususinmi kani, Nacorpaqmi Milca wachakurqan, nispa. Hinaqtinmi senqanman huk argollata churarqani, brazaletekunatapas makinkunaman.

⁴⁸Hinaspan k'umuykukuspa Señor Diosta yupaycharqani, samincharqani patronniy Abrahampa Diosnin Señorta, cheqanta pusamuwasqanmanta patronniypa wawqenpa ususinta churinpaq pusanaypaq.

⁴⁹Kunanqa, patronniyta khuyapayankichis chayqa, hunt'aqtaq kankichispas chayqa, sut'inchawaychis, mana hina kaqtinpas, sut'inchawaychis. Hinan ima ruwaytapas yachasaq, nispa.

⁵⁰Hinaqtinmi Labanpas Betuelpas kutichirqanku: — Señor Diospa munayninmi kayqa, manan ima nispapas niykikumanchu.

⁵¹Kayqa ñawpaqeykipin Rebeca kashan, pusarikuy, patronniykiq churinpa warmintaq kachun, Señor Diospa nisqanman hina, nispa.

⁵²Chaymi Abrahampa kamachinqa siminkunata uyarispa hina, Señor Diosman pampakama k'umuykukurqan.

⁵³Hinaspanmi horqomurqan qori qolqe illakunata,[14] p'achakunata ima, hinaspan Rebecaman qorqan. Turanmanpas mamanmanpas qollarqantaq ancha chaniyoqkunata.

⁵⁴Chaymantan paypas paywan hamuq qharikunapas mikhurqanku, ukyarqanku, puñurqanku. Tutamanta hatarispataq, nirqan: — Patronniyman kachapuwaychis, nispa.

⁵⁵Hinaqtinmi turanpas mamanpas kutichirqan: — Sipasqa chunka p'unchayllapas ñoqaykuwan karichunraq, chaymantaqa rinqan, nispa.

⁵⁶Chaymi paykunata nirqan: — Ama hark'awaychischu, Señor Diosmi riki allinta pusamuwan, kachapuwaychis patronniyman ripunaypaq, nispa.

⁵⁷Hinan paykunaqa kutichirqanku: — Waqyasaqku sipasta, hinaspa tapusaqku, nispa.

⁵⁸Hinaspan Rebecata waqyaspa nirqanku: — ¿Riwaqchu kay qhariwan? nispa. Paytaq kutichirqan: — Arí, risaqmi, nispa.

⁵⁹Chaymi mana hark'arqankuchu pananku Rebecaq rinanta, uywaqenpa, Abrahampa kamachinpa, runankunaq rinankutapas.

⁶⁰Hinaspan Rebecata samincharqanku: Panayku, waranqa-waranqaq maman kay, mirayniykitaq awqankunata atipachun, nispa.

⁶¹Chaymantan Rebecaqa sipasninkunantin sayarispa camellokunaman sillakurqanku, hinaspan chay runaq qhepanta rirqanku. Chay hinatan kamachiqa Rebecata pusarikuspa kutipurqan.

⁶²Isaactaq hamurqan “Rikuwaqniy Kawsaq-P'uytu” nisqa qayllaman, payqa Neguev ch'inneqpin tiyarqan.

⁶³Isaacmi tardeyaykuyta campota lloqsisqa purikuq, qhawarispataq rikurqan camellokuna hamushaqta.

⁶⁴Rebecapas qhawarillarqantaq, hinan rikurqan Isaacta, hinaspan camellomanta uraykuspa

⁶⁵kamachita tapurqan: — ¿Pitaq haqay qhari ñoqanchiswan tupaq hamuqri? nispa. Kamachitaq nirqan: — Paymi patronniy, nispa. Hinaqtinmi Rebecaqa uma qatanata hap'ispa uyanta qataykukurqan.

⁶⁶Kamachitaq Isaacman willarqan lliw ima hayk'a ruwasqanta.

⁶⁷Isaactaq Rebecata pusaykurqan maman Saraq karpanman, hinaspan Rebecawan casarakurqan. Isaacmi Rebecata munakurqan, hinaspan sonqochakurqan mamanpa wañukapusqan qhepata.