Read Diospa Simin Qelqa GÉNESIS 25 Bible Online

GÉNESIS 25 - Diospa Simin Qelqa bible

GÉNESIS 25

¹Abrahammi wak warmiwan casarakurqan, paypa sutinmi karqan Cetura,

²paymi Abrahampaq wachakurqan Zimramta, Jocsanta, Medanta, Madianta, Isbacta, Shuatawan.

³Jocsanmi churiyarqan Sebata Dedantawan. Dedanpa churinkunataq karqan Asur runakuna, Letus runakuna, Leum runakunapiwan.

⁴Madianpa churinkunataq: Efra, Efer, Hanoc, Abida, Eldapiwan. Llapan chaykunan karqan Ceturaq wawankuna.

⁵Abrahammi Isaacman qorqan lliw kapuqninta.

⁶Ichaqa tiyaq-masinkunaq wawanmantaq qorqan regalokunata, hinaspan pay kawsashasparaq Isaac churinpa qayllanmanta karuman paykunata kachapurqan inti lloqsimuy hallp'aman.

⁷Abrahammi kawsarqan pachak qanchis chunka phisqayoq watata,

⁸hinaspan sinchi yuyaqña wañukapurqan, ñawpa taytankunamantaq huñukapurqan.

⁹Hinan churin Isaacwan Ismaelwan p'amparqanku Macpela qaqa wasipi, Het runa Zoharpa churin Efronpa chakranpi, Mamre chimpapi kashan chaypi.

¹⁰Chay chakratan Abraham rantirqan Het runakunamanta. Chaypin Abrahamqa p'ampasqa karqan, warmin Saraq p'ampasqa kasqanpi.

¹¹Abrahampa wañukapusqan qhepatataq Diosqa churin Isaacta samincharqan, Isaacqa “Rikuwaqniy Kawsaq-P'uytu” nisqa qayllapin tiyarqan.

¹²Kaykunan Abrahampa churin Ismaelpa mirayninkuna, paytan wachakurqan Saraq kamachin Egipto warmi Agar.

¹³Kaykunan Ismaelpa churinkunaq sutin, nacesqanman hina sutichasqa: Nebaiot, Cedar, Adbeel, Mibsam.

¹⁴Misma, Duma, Massa,

¹⁵Hadad, Tema, Jetur, Nafis, Cedemapiwan.

¹⁶Chaykunan Ismaelpa chunka iskayniyoq churinkunaq sutin, chay sutikunallawantaqmi reqsikurqan tiyanankupas karpa-karpankupas. Sapankan ayllunkupi kamachikuq karqanku.

¹⁷Ismaelmi pachak kinsa chunka qanchisniyoq watayoq kashaspa wañukapurqan, ñawpa taytankunamantaq huñukapurqan.

¹⁸Ismaelpa mirayninkunan Havilamanta Shurkama tiyarqan, chayqa kashan Asiriaman rina Egiptoq inti lloqsimuyninpin. Paykunaqa llapa wawqenku hark'akushaqtinmi tiyarqanku.

¹⁹Kaykunan Abrahampa churin Isaacmanta willakuykuna.

²⁰Isaacqa tawa chunka watayoqmi karqan Rebecawan casarakushaspa, Rebecan karqan Padam-arammanta Aram runa Betuelpa ususin, Aram runa Labanpa panan.

²¹Isaacmi Señor Diosmanta warminpaq mañapurqan mana wachakuq kaqtin. Señor Diostaq payta uyarirqan, hinan warmin Rebecaqa wiksallikurqan.

²²Wawakunataq wiksan ukhupi maqanakurqan, hinan Rebecaqa nirqan: — ¿Imanaqtintaq kay hina kawan? nispa. Señor Diosta tapukurqan.

²³Señor Diostaq payta nirqan: — Iskay suyun wiksaykipi kashan, iskay llaqtataqmi paqarisqankumantapacha t'aqasqa kanqa. Huknin llaqtan aswan kallpayoq kanqa hukkaq llaqtamantaqa, kurakkaqmi sullk'akaqta servinqa, nispa.

²⁴Wachakunan killa hunt'akuqtintaq wiksanpi mellizo kapushasqa.

²⁵Ñawpaqkaqmi lloqsimurqan pukaniray p'aqo, llapa cuerpontaqmi suphuyoq karqan, chaymi suticharqanku Esauta.[15]

²⁶Chaymantataq wawqen lloqsimurqan Esaupa talonninta hap'iykusqa, sutintaq karqan Jacob.[16] Isaacqa soqta chunka watayoqmi karqan Rebeca paykunata wachakushaqtin.

²⁷Wawakunan wiñarqan, Esauqa allin chakuqmi kapurqan, campollapi puriq runa, Jacobtaq samp'a runa karqan, karpallapi tiyakuq.

²⁸Isaacmi Esauta munakurqan chakumusqanta mikhusqanrayku, Rebecataq Jacobta munakurqan.

²⁹Huk kutinmi Jacobqa mikhunata wayk'urqan. Esautaq campomanta sayk'usqallaña kutimuspa

³⁰Jacobta nirqan: — Chay puka mikhunaykita qaraykullawayña, sinchi yarqasqan kashani, nispa. Chayraykun sutinqa Edom[17] nisqa.

³¹Chaymi Jacobqa kutichirqan: — Kunanpacha phiwi-kayniykita venderqapuway, nispa.

³²Hinan Esauqa nirqan: — Kayqa wañukapushaniña, ¿ima allinniypaqtaq phiwi-kayniyqa kanqa? nispa.

³³Chaymi Jacobqa kutichirqan: — Jurapuway kunanpacha, nispa. Hinan payqa jurapurqan, ahinapin phiwi-kayninta Jacobman vendepurqan.

³⁴Hinaqtinmi Jacobqa Esauman qorqan t'antata lentejas wayk'usqantapas. Hinan payqa mikhurqan ukyarqan, sayarispataq ripurqan. Chay hinatan Esauqa phiwi-kayninta pisicharqan.