Read Diospa Simin Qelqa GÉNESIS 27 Bible Online

GÉNESIS 27 - Diospa Simin Qelqa bible

GÉNESIS 27

¹Isaacmi yuyaqña kashaspa, ñawinpas ayphayaykapushaqtin, kurakkaq churin Esauta waqyaspa: — Wawáy, nirqan. Paytaq kutichirqan: — ¿Ima ninkin taytáy? nispa.

²Hinan nirqan: — Yuyaqñan kapuni, qonqaychá wañukapushasaq.

³Kunanqa wach'ina apanaykita p'eqtaykitawan[18] aparikuspa campota riy, hinaspa hap'isqayki animalta apamuway.

⁴Hinaspa gustawasqanman hina q'apashaq aycha mikhunata apamuway, chayta mikhusaq, hinaspa manaraq wañurqoshaspa qanta saminchasqayki, nispa.

⁵Rebecataq uyarisharqan Isaacpa churin Esauta rimapayashasqanta. Esauqa campotan pasarqan animalta hap'imuspa apamunanpaq,

⁶hinan Rebecaqa churin Jacobta nirqan: — Ñoqan uyarimuni taytaykiq Esaú wawqeykiwan rimashasqanta:

⁷Animalta hap'impuway hinaspa wayk'umpuway mikhunaypaq, chaymantataq Señor Diospa qayllanpi qanta saminchasqayki manaraq wañurqoshaspa, nispa nishaqta.

⁸Chhaynaqa, wawáy, simiyta hap'iy imatachus qanta kamachisqayta.

⁹Phaway uywaman, hinaspa chaymanta apamuway iskay allinkaq cabrachakunata. Chaykunata taytaykipaq wayk'urqosaq paypa gustasqanman hina,

¹⁰qantaq taytaykiman apanki. Hinan mikhunqa, manaraq wañurqoshaspa qanta saminchanasuykipaq, nispa.

¹¹Chaymi Jacobqa maman Rebecata nirqan: — Wawqey Esauqa suphu runan riki, ñoqataq mana hinachu kani.

¹²Llamiykuwanqapaschá taytayqa, hinaspa burlakuqpaq hap'iwanqa, hinaspachá ñakawanqa manataq saminchawanqachu, nispa.

¹³Hinan mamanqa kutichirqan: — Wawáy, ñoqaman chayawachun ñakasqa-kayniykiqa, simillayta kasuway, phaway rispa apamuway, nispa.

¹⁴Chaymi payqa rispa cabrachakunata hap'ispa mamanman apamurqan, mamantaq wayk'urqan taytanpa gustasqanman hina.

¹⁵Rebecan kurak churin Esaupa sumaq p'achankunata, wasipi waqaychasqanta, horqomuspa sullk'a churin Jacobta p'achachirqan.

¹⁶Chaymantataq makintapas mana suphuyoq kunkantapas cabrachakunaq qaranwan p'istuykurqan,

¹⁷hinaspa wayk'usqan aychatapas t'antatapas churinman haywarqan.

¹⁸Hinaqtinmi payqa taytanman rispa: — Taytáy, nirqan. Isaactaq kutichirqan: — Hay, ¿mayqenkaq churiytaq kashanki? nispa.

¹⁹Jacobtaq taytanta nirqan: — Ñoqaqa Esaú phiwi churiykin kani, niwasqaykita hinan ruwamuniña. Kunanqa tiyarimuy, hinaspa hap'imusqayta mikhuykuy, saminchaykuwanaykipaq, nispa.

²⁰Hinaqtinmi Isaacqa churinta: — ¿Imaynataq usqhayllari tarirqamunki, wawáy? nirqan. Paytaq kutichirqan: — Diosniyki Señor Dios yanapawaqtinmi, nispa.

²¹Chaymi Isaacqa Jacobta nirqan: — Asuykamuy, llamiykusqayki wawáy, Esaú wawaychus kanki icha manachus chayta yachanaypaq, nispa.

²²Hinan Jacobqa taytanman asuykurqan, Isaactaq payta llamiykuspa, nirqan: — Rimasqan kunkaqa Jacobpa kunkanmi, makinkunataq ichaqa Esaupa makin, nispa.

²³Manataq payta reqsirqanchu, makinkuna Esaupa makin hina suphu kasqanrayku.

²⁴Saminchananpaq kashaspataq, huktawan tapuykurqan: — ¿Esaú churiypunichu qanqa kashanki? nispa. Jacobtaq kutichirqan: — Arí, paymi kashani, nispa.

²⁵Nillarqantaq: — Asuykachimuway, hap'imusqaykita mikhusaq, hinaspa saminchaykusqayki, nispa. Chaymi Jacobqa qayllaykachirqan, hinan Isaacqa mikhurqan, apamusqan vinotapas ukyallarqantaq.

²⁶Chaymantataq taytan Isaacqa payta nirqan: — Kunanqa asuykamuway, hinaspa much'aykuway wawáy, nispa.

²⁷Chaymi Jacobqa asuykuspa much'aykurqan, Isaactaq p'achankunaq q'apayninta muskhiykurqan. Hinaspan payta samincharqan: — Kayqa churiypa q'apayninmi, Señor Diospa saminchasqan campo q'apay hinan.

²⁸Diosña hanaq pachamanta parachimpusunki, chakratapas allinta ruruchipusunki, askhatataq trigotapas vinotapas qosunki.

²⁹Llaqtakuna kamachiykita ruwachunku, suyukuna qanman k'umuykuchunku. Wawqeykikunaq patronnin kay, mamaykiq wawankuna qanman k'umuykuchunku. Ñakasqa kachun ñakaqniykikuna, saminchasqa kachun saminchaqniykikuna, nispa.

³⁰Jacobta Isaac saminchayta tukuqtintaq, taytan Isaacpa qayllanmanta Jacob lloqsiqtin hina, wawqen Esauqa kutimurqan animal hap'imusqanmanta.

³¹Paypas q'apashaq mikhunata wayk'umullarqantaq, hinaspa taytanman apamuspa nirqan: — Taytáy, tiyarimuy, hinaspa hap'imusqayta mikhuykuy, saminchaykuwanaykipaq, nispa.

³²Hinaqtinmi taytan Isaacqa payta nirqan: — ¿Pitaq qanri kanki? nispa. Paytaq nirqan: — Ñoqaqa phiwi churiyki Esaumi kani, nispa.

³³Chaymi Isaacqa mayta khatatataspa nirqan: — Chayri, ¿pitaq kayman hamurqan, hap'isqa animalta apamuwaspa qowarqan? Manaraq qan hamushaqtiykin lliwta mikhurqani. Ñoqan payta saminchaniña, saminchasqapunitaqmi kanqa, nispa.

³⁴Esautaq taytanpa rimasqanta uyarispa, sinchita qaparispa waqaykurqan: — ¡Taytáy, ñoqatapas saminchallawaytaq! nispa.

³⁵Hinan payta nirqan: — Wawqeykin hamuspa q'oturqowan, hinaspanmi saminchaykita hap'ikapun, nispa.

³⁶Chaymi Esauqa kutichirqan: — ¡Kusatan Jacobta[19] suticharqanku! Iskay kutitañan q'oturqowan: phiwi-kayniytan hap'ikapun, kunanqa saminchayniytañataq chaskikapun. ¿Manachu saminchata ñoqapaq waqaychapuwarqanki? nispa.

³⁷Isaactaq kutichirqan: — Qhawariy, ñoqan Jacobta patronniykita churani, hinallataq llapa wawqenkunatapas kamachinkuna kananpaq payman qoni, hinallataq trigotapas vinotapas qoni. ¡Wawáy, manañan imatapas qoyta atiykiñachu! nispa.

³⁸Hinan Esauqa taytanta niykullarqantaq: — Taytáy, ¿manachu huk saminchayniykipiwan kan? ¡Taytáy, ñoqatapas saminchallawaytaq! nispa. Hinaspan Esauqa kunkayoqta qaparispa waqarqan.

³⁹Hinaqtinmi taytan Isaacqa payta nirqan: — Manan allinkaq hallp'apichu tiyanki, mana paraq kasqanpin tiyanki.

⁴⁰Espadaykiwantaq kawsanki, wawqeykitataq servinki. Kallpachakuspaykitaqmi kamachisqasuykimanta kacharichikunki, nispa.

⁴¹Esauqa wawqen Jacobtan cheqnikurqan taytan saminchasqan hawa, chaymi sonqonpi nirqan: Chayamushanñan taytaypa wañupunan p'unchay, chay qhepatan ñoqaqa Jacob wawqeyta wañurqachisaq, nispa.

⁴²Hinan Rebecaman willarqanku kurakkaq churin Esaupa nisqankunata. Chaymi payqa waqyachimurqan sullk'akaq churin Jacobta, hinaspan payta nirqan: — Wawáy, Esaú wawqeykin yuyaykushan qanta wañuchiyta.

⁴³Kunanqa, wawáy, uyariy nisqayta, hinaspa ayqekuy Haranpi tiyaq Labán turaypa wasinman,

⁴⁴chaypi paywan tiyamuy pisi tiempollata, wawqeykiq sonqon tiyaykunankama,

⁴⁵qan contra k'arak phiñakuynin thaninankama, pay contra ruwasqaykitapas qonqapunankama. Hinamantañan ñoqa willachimusqayki kutimpunaykipaq. ¿Imanaqtintaq huk p'unchayllapi iskayniykichista chinkaykachisqaykichis? nispa.

⁴⁶Chaymantataq Rebecaqa Isaacta nirqan: — Umaytan wasapawan Het warmikuna. Jacobchus casarakunqa kay suyu mayqen Het warmikunawanpas chayqa, ¿imapaqñataq kawsasaq? nispa.