Read Diospa Simin Qelqa GÉNESIS 29 Bible Online

GÉNESIS 29 - Diospa Simin Qelqa bible

GÉNESIS 29

¹Chaymantataq Jacobqa puririspa rirqan inti lloqsimuy cheqaspi tiyaqkunaman.

²Hinan pampapi huk p'uytuta rikurqan, chay qayllapitaq kinsa t'aqa ovejakuna puñurasharqan, chay p'uytumantan uywakuna ukyaqku. P'uytu punkupin kaq huk hatun rumi,

³chaypi llapa uywa huñukuqtintaq, rumita p'uktiqaqku, hinaspan ovejakunata unuchiqku, chaymantataq maypichus kasqanman rumita p'uktiykapuqku.

⁴Hinan Jacobqa michiqkunata nirqan: — Wawqeykuna, ¿maymantan kankichis? nispa. Paykunataq kutichirqanku: — Haranmantan kayku, nispa.

⁵Hinan Jacobqa paykunata tapurqan: — ¿Reqsinkichischu Nacorpa churin Labanta? nispa. Paykunataq: — Arí, reqsiykun, nirqanku.

⁶Chaymi Jacobqa paykunata nirqan: — ¿Allillanchu kashan? nispa. Paykunataq nirqanku: — Allillanmi, haqayqá ususin Raquel hamushan ovejakunantin, nispa.

⁷Jacobtaq nirqan: — P'unchayraqmi kashan, manaraqmi uywa huñuna horasraqchu, ovejakunataqa unuchispachá michimuwaqchisraq, nispa.

⁸Chaymi paykunaqa kutichirqanku: — Manan unuchiykumanchu llapa uywa huñukunankama, p'uytu punkumantapas rumita p'uktiqanankukama, nispa.

⁹Jacob paykunawan rimashanankamataq, Raquelqa chayamurqan taytanpa ovejan t'aqawan. Raquelqa oveja michiqmi karqan.

¹⁰Jacobtaq priman Raquelta tion Labanpa ovejankunatawan rikuspa qayllaykurqan, hinaspan rumita p'uktiqarqan p'uytu punkumanta, hinaspataq unuchirqan tion Labanpa oveja t'aqanta.

¹¹Jacobqa Raqueltan much'aykurqan, hinaspan waqarqan.

¹²Raquelmanmi willarqan: — Ñoqaqa taytaykiq ayllunmi kani, Rebecaq churin, nispa. Hinan payqa phawarispa taytanman willamurqan.

¹³Ahinaqa Labanmi pananpa churin Jacobmanta uyarispa chaskiykuq phawarirqan, hinan oqllaykuspa much'aykurqan, hinaspa wasinman pusamurqan. Paytaq Labanman willarqan imaymanata.

¹⁴Labantaq payta nirqan: — Tulluypunin aychaypunin kanki, nispa. Labanwantaq killantinña tiyarqan.

¹⁵Chaymi Labanqa Jacobta nirqan: — ¿Familia kaspaykichu yanqalla serviwankiman? Niway, ¿hayk'atan pagasqayki? nispa.

¹⁶Labanmi iskay ususiyoq karqan, kurakkaqpa sutinmi Lea, sullk'akaqpa sutintaq Raquel.

¹⁷Lean karqan ch'aska ñawi, Raqueltaq munay siklla karqan.

¹⁸Jacobqa Raqueltan munakurqan, chaymi Labanta nirqan: — Ñoqan qanchis watata servisqayki sullk'akaq ususiyki Raquelrayku, nispa.

¹⁹Hinan Labanqa kutichirqan: — Allinmi, qanman qopusqayki, ama wak qharimanqa qosaqchu, ñoqawan qhepakuy, nispa.

²⁰Chhaynatan Jacobqa Raquelrayku qanchis watata servirqan, pisi p'unchaykuna hinallataq paypaqqa karqan, Raquelta munakusqanrayku.

²¹Chaymantataq Jacobqa Labanta nirqan: — Warmiyta qopuway paywan tiyakapunaypaq, ñan tiempoy hunt'akunña, nispa.

²²Hinaqtinmi Labanqa huñuykurqan chay llaqtamasin llapa runakunata, hinaspan casarakuy mikhunata haywakurqan.

²³Tutataq ichaqa ususin Leata pusamurqan, chaymi Jacobqa Leawan puñurqan.

²⁴Labantaq kamachin Zilpata qorqan ususin Leaman kamachin kananpaq.

²⁵Tutamantataq rikurqan Lea kasqanta, hinan Jacobqa Labanta nirqan: — ¿Imatataq kaytari ruwawanki? ¿Manachu Raquelrayku servirqayki? ¿Imanaqtintaq q'otuwanki? nispa.

²⁶Labantaq kutichirqan: — Manan kay llaqtaykupiqa hayk'aqpas sullk'akaqtaqa ñawpaqta qoykuchu, aswanpas kurakkaqtaraqmi.

²⁷Kay semanata hunt'ay, chaymi hukkaqtawan qosqayki, ichaqa qanchis watatawanmi serviwanki, nispa.

²⁸Ahinatan Jacobqa ruwarqan, chay semanatawan hunt'arqan, hinan Labanqa payman qorqan ususin Raquelta warmin kananpaq.

²⁹Bilha kamachintataq qorqan ususin Raquelman kamachinpaq.

³⁰Jacobqa Raquelwanpas puñullarqantaq, hinaspan Leamanta astawan payta munakurqan, Labantataq servirqan qanchis watatawanraq.

³¹Señor Diosmi rikurqan Leaq pisichasqa kasqanta, chaymi payman wawakunata qorqan, Raqueltaq ichaqa mana wachakuq karqan.

³²Lean wiksallikurqan, hinaspan huk wawata wachakurqan, suticharqantaq Rubenta,[22] nirqanmi: Señor Diosmi llakikusqayta qhawariwan, kunanqa qosaymi munakuwanqa, nispa.

³³Huktawan wiksallikullarqantaq, hinaspan huk qhari wawata wachakurqan, nirqantaq: Señor Diosqa pisichasqa kasqayta uyariwaspanmi kaytapas qollawantaq, nispa, suticharqantaq Simeonta.[23]

³⁴Huktawan wiksallikullarqantaq, hinaspan huk qhari wawata wachakurqan, nirqantaq: Kay kutipiqa qosaymi ñoqawan kuska kapunqa, kinsa wawataña paypaq wachakusqayrayku, nispa. Chaymi suticharqan Leví[24] nisqata.

³⁵Huktawanmi wiksallikullarqantaq, hinaspan huk qhari wawata wachakurqan, nirqantaq: Kay kutiqa Señor Diosta hatunchasaq, nispa. Chaymi suticharqan Judata.[25] Chaymantataq mana wachakapurqanchu.