Read Diospa Simin Qelqa GÉNESIS 30 Bible Online

GÉNESIS 30 - Diospa Simin Qelqa bible

GÉNESIS 30

¹Raquelmi mana wachakuq kaspa Jacobpaq mana wachakurqanchu, chaymi ñañanta envidiakuspa, Jacobta nirqan: — Wawata wiksallichiway, mana chayqa wañukapusaqmi, nispa.

²Chaymi Jacobqa Raquelta phiñarikuspa nirqan: — ¿Ñoqari Dioschu kani? Paypa munayninmi mana wawayoq kanaykiqa, nispa.

³Raqueltaq nirqan: — Kayqa kamachiy Bilha, paywan puñuy. Paypa wachakusqantaq wawaykuna kanqa, nispa.

⁴Ahinatan Raquelqa kamachin Bilhata qorqan warmin kananpaq, chaymi Jacobqa paywan puñurqan.

⁵Bilhan wiksallikurqan, hinaspanmi Jacobpaq huk qhari wawata wachakurqan.

⁶Hinan Raquelqa nirqan: Diosmi chaninchaykapuwan, waqyakusqaytapas uyarillantaq, hinaspanmi huk wawata qowan, nispa. Chaymi suticharqan Danta.[26]

⁷Huk kutitawanmi Bilhaqa wiksallikurqan, hinaspan Jacobpaq iskaykaq wawata wachakurqan.

⁸Raqueltaq nirqan: Sinchitan ñañaywan qhawaykunakuni, hinaspan atipani, nispa. Suticharqantaq Neftalita.[27]

⁹Leataq mana wachakapuspa, kamachin Zilpata Jacobman pusarqan warmin kananpaq.

¹⁰Zilpataq huk qhari wawata Jacobpaq wachakurqan.

¹¹Hinan Leaqa nirqan: ¡Ima sumaq samin! nispa. Suticharqantaq Gadta.[28]

¹²Hinallataq Zilpaqa huk wawatawan Jacobpaq wachakurqan.

¹³Hinan Leaqa nirqan: ¡Kusikuymi ñoqapaq! Warmikunan: “¡Kusisamiyoqmi!” niwanqaku, nispa. Suticharqantaq Aserta.[29]

¹⁴Rubenmi trigo ichhuy tiempopi campota rirqan, mandragorata tarimuspataq maman Leaman apamurqan. Hinan Raquelqa Leata nirqan: — Ama hinachu kay, wawaykiq mandragoranta qoriway, nispa.

¹⁵Paytaq kutichirqan: — Qanqa qosaytan hap'iykukunki, ¿kunanqa wawaypa mandragorantañataqchu aparqoyta munashanki? nispa. Hinaqtinmi Raquelqa nirqan: — Kay tutan Jacobqa qanwan puñunqa wawaykiq mandragoranmanta, nispa.

¹⁶Tardenta campomanta Jacob kutimpushaqtintaq Leaqa paywan tupaq lloqsispa nirqan: — Ñoqawanmi kunanqa puñunki, wawaypa mandragoranwanmi mink'akuyki, nispa. Hinan chay tuta paywan puñurqan.

¹⁷Diostaq Leata uyarirqan, chaymi wiksallikuspa phisqakaq qhari wawata Jacobpaq wachakurqan.

¹⁸Hinaspan Leaqa nirqan: Diosmi qoykapuwan, warmi kamachiyta qosayman qosqayrayku, nispa. Chaymi suticharqan Isacarta.[30]

¹⁹Chay qhepatataq Leaqa huktawan wiksallikuspa Jacobpaq soqtakaq wawata wachakurqan.

²⁰Hinaspanmi Leaqa nirqan: Diosmi allin regalota qowan, kunanqa qosaymi sumaqta rikuwanqa, paypaq soqta wawataña wachakusqayrayku, nispa. Suticharqantaq Zabulonta.[31]

²¹Chay qhepatataq Leaqa huk warmi wawata wachakurqan, suticharqantaq Dinata.

²²Chaymantataq Diosqa Raquelta yuyarispa uyarirqan, hinaspan payman wawakunata qorqan.

²³Wiksallikuspan huk qhari wawata wachakurqan, nirqantaq: Diosmi p'enqakuyniyta chinkachin.

²⁴Huk wawatawan Señor Diosqa yapaykuwachun, nispa. Chaymi Joseta[32] suticharqan.

²⁵Joseta Raquel wachakusqan qhepatataq Jacobqa Labanta nirqan: — Kachapuway, hinaspa ripusaq tiyanay hallp'aman.

²⁶Qopuway warmiykunata wawaykunatawan, paykunaraykun servirqayki, hinaspa kachapuway. Qanqa yachankiñan imaynatachus servirqayki chayta, nispa.

²⁷Labantaq payta nirqan: — Ama hinachu kay, uyariykuway, watuspan yachani Señor Diosqa qan kaqtiyki saminchashawasqanta.

²⁸Yuyaykuy, hinaspa willaway hayk'atachus gananaykita, ñoqataq chayman hina pagapusqayki, nispa.

²⁹Paytaq kutichirqan: — Yachankin imaynatachus qan servisqayta, imaynatachus uywaykitapas rikusqayta.

³⁰Manaraq hamushaqtiyqa pisillan ovejayki kasqa, kunantaq askhata miraykapun, Señor Diosmi saminchasunki chayamusqaywan. Kunanqa, familiaypaqñataqmi llank'ayta munani, nispa.

³¹Labantaq nirqan: — ¿Hayk'atataq pagapusqayki? nispa. Jacobtaq kutichirqan: — Ama imatapas pagawaychu. Huktawanmi ovejaykikunata michisaq ñoqawan kaykunata rimanakuqtiykiqa:

³²Ñoqan kunan p'unchay uywayki ukhunta pasasaq, llapa yana malta ovejakunata t'aqaspa, hinallataq malta cabrakunamantapas alqakunata ch'eqchikunata t'aqaspa. Chaymi pagoy kanqa.

³³Paqarin pagoyta qhawaq hamuspaykin chanin kasqayta yachanki: mana mayqen cabrapas ch'eqchichu otaq alqachu kanqa, manallataq mayqen ovejapas yanachu kanqa chayqa, suwakusqaymi kanqa, nispa.

³⁴Hinaqtinmi Labanqa nirqan: — Allinmi, nisqayki hina kachun, nispa.

³⁵Chay p'unchaypachan Labanqa t'aqarqan alqa orqo cabrakunata wachu-wachu colorniyoqkunatawan, hinallataq llapa alqa ch'eqchi cabrakunatapas, llapa huk chhikan yuraq alqakunata, hinallataq ovejakunamantapas llapa yanakunata, hinaspanmi wawankunawan qatichirqan.

³⁶Hinaspataq chay t'aqantin Labanqa kinsa p'unchay puriyman Jacobmanta karunchakapurqan. Jacobtaq michishallarqan Labanpa wakin ovejankunata.

³⁷Jacobqa hap'irqan q'omer kiswar, almendro, castaño k'aspikunata, hinaspan chaykunaq qaranta horqorqan yuraq wachu-wachuta, chay hinapi k'aspikunaq yuraqninta rikhurichirqan.

³⁸Qaran horqosqa k'aspikunatataq churarqan uywakunaq ñawpaqenman, unu ukyana yarqhakunapi, chaypin orqowan urwakuqku.

³⁹Chay hinapin cabrakunaqa k'aspiq ñawpaqenpi chichuyakuqku, hinaspanmi wachaqku wachu-wachu colorniyoq orqo cabrakunata, ch'eqchikunata, alqakunata ima.

⁴⁰Jacobtaq cabrakunamanta borregokunata t'aqarqan, hinaspan Labanpa t'aqan chimpapi huñurqan, wachu-wachu colorniyoqkunaman yanakunaman rikch'aqkunata. Chay hinatan paypa t'aqantaqa askhayachisharqan, manataq Labanpa ovejankunamanqa huñurqanchu.

⁴¹Sapa kuti wirakaq uywakuna urwakuqtintaq, Jacobqa uywakunaq ñawpaqenman k'aspikunata churarqan uywa ukyanakunapi, k'aspiq ñawpaqenpi chichuyanankupaq.

⁴²Tullu uywakuna hamuqtintaq ichaqa mana chay k'aspikunata churarqanchu. Ahinapin Labanpaq karqan tullukuna, Jacobpaqtaq wirakuna.

⁴³Chay hinapin Jacobqa anchata qhapaqyarqan, karqantaq askha ovejankuna, camellonkuna, asnonkuna ima, hinallataq warmi kamachinkuna qhari kamachinkunapas.