Read Diospa Simin Qelqa GÉNESIS 31 Bible Online

GÉNESIS 31 - Diospa Simin Qelqa bible

GÉNESIS 31

¹Jacobqa uyarirqanmi Labanpa wawankunaq rimasqanta, paykunan nirqanku: — Jacobmi hap'in taytanchispa lliw kaqninta, taytanchispa kaqninwantaq kay hinata qhapaqyaykun, nispa.

²Jacobqa repararqanmi Labanta, hinan rikurqan manaña ñawpaq hinañachu paypaq kapusqanta.

³Chaymi Señor Diosqa Jacobta nirqan: — Kutipuy tayta-mamaykiq hallp'anta, aylluykiqta, ñoqataq qanwan kasaq, nispa.

⁴Hinan Jacobqa Raquelta Leatawan waqyachimurqan ovejankunaq kasqan campoman,

⁵hinaspanmi paykunata nirqan: — Taytaykichistan manaña ñawpa hinachu ñoqapaq kasqanta rikuni, taytaypa Diosninmi ichaqa ñoqawan kashallanqapuni.

⁶Qankunan yachankichis tukuy kallpaywan taytaykichista servisqayta,

⁷paytaq ichaqa q'otuwarqan, hinaspa sapa kutilla pagoytapas cambiarqan, Diosmi ichaqa payta hark'arqan mana allinta ruwawananmanta.

⁸Paymi kay hinata niwarqan: Alqakunan pagoyki kanqa, nispa, chaymi llapa cabra alqata wacharqan. Nillarqantaq kay hinata: Wachu-wachu colorniyoqkunan pagoyki kanqa, nispa, chaymi llapa cabra wachu-wachu colorniyoqkunata wacharqan.

⁹Ahinatan Diosqa taytaykichispa uywankunata qechurqan, hinaspa ñoqaman qowarqan.

¹⁰Uywakuna urwakusqan tiempon mosqoypi rikurqani, chinakunata urwaq orqokunan kasqa wachu-wachu colorniyoq, alqakuna ch'eqchikuna ima.

¹¹Diospa angelnintaq mosqoypi niwarqan: Jacob, nispa. Ñoqataq nirqani: ¿Kaypin kashani? nispa.

¹²Paytaq niwarqan: Qhawariy, hinaspa rikunki chinakunata urwaq llapa orqokuna wachu-wachu colorniyoqkuna, alqakuna, ch'eqchikuna kasqanta, ñoqan rikuni Labanpa imaymanata qanta ruwasqanta.

¹³Ñoqan Betelpi rikhuriqniyki Dios kani, chaypin rumita aceitewan hich'aykurqanki, chaypin prometekuwarqankipas. Kunanqa puririy, hinaspa kay hallp'amanta lloqsipullayña, nacesqayki hallp'amantaq kutipuy, nispa.

¹⁴Raquelwan Leawantaq kutichirqanku: — Taytaykuq wasinpiqa manan ima herenciaykupas kanñachu.

¹⁵Wak warmikunata hinañan rikuwankupas. Ñoqaykumanta chaskikusqan precioykutapas llapantañan tukurqapun.

¹⁶Taytaykumanta Diospa qechusqan lliw qhapaq kayqa ñoqanchispan wawanchiskunaqpiwan. Chay hinaqa, ruway imatachus Diospa nisqasuykita, nispa.

¹⁷Hinan Jacobqa wakichikuspa churinkunata warminkunata camellokunaman sillaykachirqan,

¹⁸Canaán suyupi tiyaq taytan Isaacpaman kutipunanpaq, hinaspataq ñanta puririrqanku llapan uywantin Padan-arampi tukuy tarisqankunantin.

¹⁹Labanqa ovejankunata rutuqmi rirqan, Raqueltaq chaykama taytanpa idolonkunata suwakamurqan.

²⁰Chay hinatan Jacobqa q'oturqan Aram runa Labanta, ripunanta mana willakuspa.

²¹Lliw imaymanakunantinmi ayqerqan. Puririspataq Eufrates mayuta chimparqan, hinaspan Galaad orqo-orqo cheqasman rirqan.

²²Kinsakaq p'unchaypitaq Labanqa yacharqan Jacobpa ayqekusqanta.

²³Hinaqtinmi Labanqa ayllunkunata pusarikuspa Jacobpa qhepanta rirqan qanchis p'unchay puriytaña, hinaspan Galaad orqo-orqoman ayparqan.

²⁴Diostaq ichaqa mosqoypi chay tuta Aram runa Labanman rikhurispa nirqan: — Paqtataq Jacobta k'arak simiwan rimapayawaq, nispa.

²⁵Labanqa Galaad orqo-orqomanmi Jacobman ayparqan, chaypin Jacobqa karpakurqan, chayllapitaqmi Labanpas ayllunkunawan karpakurqan.

²⁶Hinan Labanqa Jacobta nirqan: — ¿Imatan kayta ruwanki? ¿Imaraykutaq q'otuwarqanki? Ususiykunatapas awqa-tinkuypi hap'isqata hina apamuspayki.

²⁷¿Imaraykutaq ayqekunaykipaq pakakurqanki, hinaspa q'otuwarqanki, manataq willawarqankichu? Ñoqaqa qanta kusisqa, takiwan, tinyawan, arpawan kacharparimuykiman karqan.

²⁸Manan nietoykunallatapas ususiykunallatapas much'aykachiwarqankichu. Chaytaqa mana yuyayniyoq hinan ruwanki.

²⁹Makiypin kashan qankunata mana allinta ruwarqonaypaq, ichaqa taytaykiq Diosninmi tuta niwan: Paqtataq Jacobta k'arak simiwan rimapayawaq, nispa.

³⁰Taytaykiq wasinman sonqoyki aysakuqtin ripunki chayqa, ¿imapaqtaq diosniykunata suwakamuwarqanki? nispa.

³¹Jacobtaq Labanta nirqan: — Manchakurqanin, ususiykikunata qechuwanaykipaqmi yuyarqani.

³²Mayqenpichus diosniykikunata tarinki chayqa, ama kawsachunchu. Wawqenchiskuna rikushaqtin reqsikapuy kaqniyki hap'isqayta, hinaspa apakapuy, nispa. Jacobqa manan yacharqanchu Raquelpa chaykunata suwakamusqanta.

³³Labanmi haykurqan Jacobpa karpanta, Leaq karpanta, iskaynin warmi kamachiq karpankunatawan, manataq idolokunata tarirqanchu. Leaq karpanmanta lloqsispataq Raquelpa karpanta haykurqan.

³⁴Raquelqa idolokunata hap'ispa churaykurqan camelloq monturan ukhuman, hinaspan chaykuna patapi tiyaykurqan. Labantaq karpata lliwta maskharqan, manataq idolokunata tarirqanchu.

³⁵Raqueltaq taytanta nirqan: — Taytáy, ama phiñarqokunkichu qayllaykipi mana sayarisqayrayku, killaywanmi kashani, nispa. Labanqa maskhaykurqanmi idolokunata, manataq tarirqanchu.

³⁶Hinan Jacobqa phiñasqa Labanta phiñarirqan: — ¿Iman huchay? ¿Imapin huchallikuni sinchi phiñasqa qatipamuwanaykipaq?

³⁷Tukuy imaymanaytan maskhanki, ¿imatataq tarinki qanpa kaqniykikunata? Wawqeykunaq wawqeykikunaq ñawpaqenpi churaykuy, hinaspa mayqenninchistapas huchachawasun.

³⁸Kay iskay chunka watan qanwan karqani, ovejaykikunapas cabraykikunapas manan hayk'aqpas sullurqanchu, manan ñoqapas huk borregollaykitapas mikhurqanichu.

³⁹Phiña animalkunaq hap'isqantapas manan hayk'aqpas apamurqaykichu, ñoqan sayachipurqayki, p'unchayña tutaña suwaq apasqanmantapas pagachikuwarqankin.

⁴⁰P'unchaymi ruphay kankawarqan, tutataq chiri atiwarqan, manan puñuypas chayawarqanchu.

⁴¹Chay hinan iskay chunka watantin wasiykipi karqani. Chunka tawayoq watan servirqayki iskaynin ususiykirayku, soqta watataq uywaykirayku, pagoytapas sapa kutillan cambiarqanki.

⁴²Taytaypa Diosninchus, Abrahampa Diosnin, Isaacpa Manchakunan mana ñoqawanchu kanman karqan chayqa, lliwta qechuspan mana imayoqta kacharpariwankiman karqan, ichaqa Diosmi rikurqan muchusqayta llank'asqaytapas, chaymi ch'isi tuta k'amirqasunki, nispa.

⁴³Labantaq Jacobta nirqan: — Ususiykikunaqa ususiykunan, churiykikunapas churiykunan, ovejaykikunapas ovejaykunan, lliw ima hayk'a rikusqaykipas ñoqaqmi. Manan imanaymanpaschu kay ususiykunata, wawakunatapas.

⁴⁴Chay hinaqa, kunan qanwan ñoqawan rimanakusun, chaytaq iskayninchismanta willakuq kachun, nispa.

⁴⁵Hinaqtinmi Jacobqa rumita hoqarispa saywata sayachirqan.

⁴⁶Hinaspan wawqenkunata nirqan: — Rumita pallamuychis, nispa. Hinan rumita pallaspa soqyata tawqarqanku, hinaspan chaypi mikhurqanku chay soqya tawqa qayllapi.

⁴⁷Labanmi suticharqan Jegar Sahadutata,[33] Jacobtaq suticharqan Galaadta.[34]

⁴⁸Labanmi nirqan: — Kay soqya tawqaqa kunan iskayninchismanta willakuqmi, nispa. Chaymi Galaad sutichasqa karqan.

⁴⁹Hinallataq Mizpa[35] sutichasqa karqan, nirqanmi: — Qantawan ñoqatawan Señor Diosqa qhawawasun, t'aqarinakuqtinchis.

⁵⁰Ususiykunata ñak'arichinki, otaq ususiykuna patamanta huk warmikunayoq kanki chayqa, manaña pipas qhawaqninchis kanchu chaypas, Diosmi iskayninchismanta rimariqqa kashan, nispa.

⁵¹Labanqa nillarqantaq Jacobta: — Kayqa kay soqya tawqa, kayqa kay saywa rumi qanwan ñoqawan churasqanchis.

⁵²Kaykuna willakuq kachun: Qanpas ñoqapas aman kay rumi soqyata, rumi saywata pasasunchu mana allinta ruwanakunanchispaq.

⁵³Mana chayqa abueloyki Abrahampa Diosnin, abueloy Nacorpa Diosnin, mayqenninchistapas huchachawasun, nispa. Jacobtaq jurarqan Isaac taytanpa Manchakunan sutipi.

⁵⁴Hinaspanmi Jacobqa sacrificiokunata Diosman orqopi haywarqan, hinaspataq wawqenkunata waqyarqan chayta mikhunankupaq. Chaymi mikhurqanku, chay tutataq orqopi puñurqanku.

⁵⁵Tutamantataq Labanqa sayarirqan, hinaspan nietonkunata ususinkunata much'aykuspa samincharqan. Hinamantataq puririspa tiyananman kutipurqan.