Read Diospa Simin Qelqa GÉNESIS 32 Bible Online

GÉNESIS 32 - Diospa Simin Qelqa bible

GÉNESIS 32

¹Jacobpas yapamantan puririrqan, hinan Diospa angelninkuna paywan tupaq hamurqanku.

²Paykunata rikuspataq Jacobqa nirqan: — ¡Diospa ejercitonmi kayqa! nispa. Chay cheqastataq suticharqan Mahanaimta.[36]

³Hinamantataq Jacobqa willaqkunata ñawpachirqan wawqen Esauman, Edom suyu Seir hallp'aman.

⁴Kay hinata nimunankupaq, kamachiyki Jacobmi nin: “Labanwanmi tiyamurqani, kunankamataq qhepakamurqani.

⁵Kapuwanmi wakaykuna, asnoykuna, ovejaykuna, qhari kamachiykunapas, warmi kamachiykunapas. Wiraqochayman willaykachimunaypaqtaq kachamuni sumaqta qhawariwanaykipaq”, nispa.

⁶Kachasqakunataq Jacobman kutimurqanku: Tupamuykun wawqeyki Esauwan, paypas chaskinasuykipaqmi hamushan, tawa pachak runakuna pusaykusqa, nispa.

⁷Hinan Jacobqa sinchita mancharikuspa llakikurqan, hinaspan runankunata iskayman t'aqarqan, hinallataq ovejakunatapas, wakakunatapas, camellokunatapas t'aqarqan.

⁸Nirqanmi: Huk t'aqa contra Esaú hamunqa hinaspa phawaykunqa chayqa, huknin t'aqa ayqenqa, nispa.

⁹Hinaspanmi Jacobqa mañakurqan: Abraham abueloypa Diosnin, Isaac taytaypa Diosnin, Señor Diosníy, qanmi niwarqanki: Kutipuy hallp'aykiman, aylluykiman, ñoqataq allinyachisqayki, nispa.

¹⁰Qanmi kamachiykita lliwpi khuyapayawarqanki, lliwpitaq ñoqapaq hunt'arqanki, manaña chaypaq hinachu kashaqtiypas. Tawnallayoqmi kay Jordán mayuta chimparqani, kunantaq kay iskay t'aqayoq kapuni.

¹¹Kunan qespichiway wawqey Esaumanta, paytan manchakuni, paqtan hamuspa wañuchiwanman wawaykunatawan warmiykunatawan.

¹²Qanmi niwarqanki: Ñoqan allinyachisqayki, mirayniykitaq lamar-qocha pata aqo hina kanqa, mana yupay atiy askha kasqanrayku, nispa.

¹³Chay tutataq chaypi samakurqan, hinaspan kaqninmanta t'aqarqan wawqen Esaupaq sumaq sonqota:

¹⁴iskay pachak china cabrata, iskay chunka orqo cabratawan, iskay pachak ovejata, iskay chunka borregotawan,

¹⁵kinsa chunka china camellokunata qholla uñankunantinta, tawa chunka wakata, chunka torillotawan, iskay chunka china asnota, chunka malta orqo asnotawan.

¹⁶Hinaspan kamachinkunawan qatichirqan sapanka tropata t'aqa-t'aqata. Nirqantaq: — Ñawpaychis, hinaspa sapanka t'aqata qatiychis karu-karu qhepata, nispa.

¹⁷Ñawpaqkaqtataq kamachirqan: — Wawqey Esauwanchus tupanki, hinaspa tapusunki: — ¿Piqpan kanki? ¿Maytan rishanki? ¿Pipaqmi kayta qatishanki? nispa chayqa,

¹⁸ninkin: — Kamachiyki Jacobpa sumaq sonqonmi, wiraqocháy Esaumanmi apachishawan, payqa qhepaykutan hamushan, nispa.

¹⁹Kachallarqantaq iskaykaqtapas, kinsakaqtapas, chay t'aqakunaq qhepanta hayk'an riqtapas. Kamachirqantaq kaqtakama Esauwan tupaspa ninankupaq.

²⁰Kamachillarqantaq: — Kamachiyki Jacobqa qhepaykutan hamushan, nispa ninankupaq. Jacobqa sonqonpin nirqan: Sumaq sonqota ñawpachispaymi Esaupa sonqonta llamp'uyachisaq, hinaspañan paywan tupasaq, ichapaschá payqa chaskiwanqa, nispa.

²¹Chaymi sumaq sonqota ñawpachirqan. Paytaq chay tuta karpakusqanpi puñurqan, kaqninkunantin.

²²Chay tutapachan sayarispa pusarikurqan iskaynin warminkunata, iskaynin kamachin warmikunata, chunka hukniyoq wawankunatawan, hinaspanmi Jaboc mayuta chimpachirqan

²³paykunata chimpachispataq lliw kaqninkunata chimpachirqan.

²⁴Jacobtaq sapallan qhepakurqan. Hinan paywan pacha paqariykama huk qhari hap'inakurqan.

²⁵Qhariqa payta mana atipayta atispataq tupaykurqan teqni muyuna tullu cheqaspi, hinan Jacobpa teqni tullunqa phawarqorqan paywan hap'inakushaqtin.

²⁶Hinan chay qhariqa nirqan: — Kachariway, pachan paqarimushanña, nispa. Jacobtaq payta nirqan: — Manan kacharisqaykichu manachus saminchawanki chayqa, nispa.

²⁷Chay qharitaq payta nirqan: — ¿Iman sutiyki? nispa. Paytaq kutichirqan: — Jacobmi, nispa.

²⁸Chay qharitaq payta nirqan: — Manan Jacobñachu sutiyki kanqa, aswanpas Israelmi[37] kapunqa, Dioswanmi hap'inakurqanki, hinallataq runakunawanpas, atiparqankitaq, nispa.

²⁹Hinan Jacobqa payta tapurqan: — Willaway sutiykita, nispa. Chay qharitaq kutichirqan: — ¿Imapaqtaq sutiytaqa tapuwanki? nispa. Hinaspan chaypi samincharqan.

³⁰Chaymi Jacobqa chay cheqasta suticharqan “Penielta”,[38] nirqanmi: Uya puran Dioswan tupani, kawsashaniraqtaq, nispa.

³¹Penielta pasaqtinñan intiqa lloqsimurqan, wist'uspa-wist'uspataq purirqan.

³²Chaymi Israel runakunaqa chay p'unchaymanta mana mikhunkuchu q'estisqa hank'uta, Jacobta chay q'estisqa hank'unpi tupaykusqanrayku. Chay hank'un teqni tulluq muyunanpi kashan.