Read Diospa Simin Qelqa GÉNESIS 34 Bible Online

GÉNESIS 34 - Diospa Simin Qelqa bible

GÉNESIS 34

¹Leaq ususin Dinan lloqsirqan chay llaqta sipaskunawan tupaq, paytan Leaqa wachakurqan Jacobpaq.

²Hinan chay suyupi kamachikuq Hev runa Hamorpa churin Shehemqa Dinata rikurqan, hinaspan payta hap'ispa violarqan.

³Dinawanmi sonqollirukurqan, hinaspan sipasta munakurqan, sumaqtataq rimapayarqanpas.

⁴Chaymi Shehemqa taytan Hamorta nirqan: — Chay sipasta casarakunaypaq horqompuway, nispa.

⁵Jacobqa yacharqanmi ususin Dinata Shehempa violasqanta, ichaqa ch'inllan karqan churinkuna uywawan campopi kasqankumanta hamunankukama.

⁶Shehempa taytan Hamortaq Jacobpata rirqan payta rimaykukuq.

⁷Jacobpa churinkunataq chayta yachaspa campomanta hamurqanku, hinan paykunaqa llakikuspa mayta phiñakurqanku, Jacobpa ususinwan puñuykuspa Shehem p'enqayta Israelpaq ruwasqanmanta. Manan chaytaqa ruwanachu karqan.

⁸Hamorqa paykunata rimaykukuspan nirqan: — Shehem churiymi ususiykichiswan sonqollikun, valekuykichis, paywan casarachipusunchis.

⁹Hinaspa ñoqaykuwan aylluchakuychis, ususiykichiswan casarachiwayku, ñoqaykuq ususiykuwanpas casarakullaychistaq.

¹⁰Ñoqaykuwan tiyaychis, may munasqaykichispi purikuychis, chaypi tiyaychis qhatuychis, hallp'atapas hap'ikuychis, nispa.

¹¹Shehempas nillarqantaq Dinaq taytanta turankunatawan: — Ama hinachu, ñoqata chaskiykuwaychis, qosqaykichismi imatachus niwasqaykichistapas.

¹²Imachus qonatapas askha sumaq sonqotapas mañawaychis, ñoqataq qosqaykichis hayk'an niwasqaykichista, sipasllata qoykuwaychis casarakunaypaq, nispa.

¹³Jacobpa churinkunataq ichaqa pananku Dinata violasqanmanta llullallawan Shehemta taytan Hamortawan nirqanku:

¹⁴— Manan kaytaqa ruwaykumanchu, manan panaykutaqa qoykikumanchu qhari-kaynin mana señalasqa runamanqa, ñoqayku ukhupiqa p'enqaymi chayqa.

¹⁵Chaywanpas kaykuna hawaqa atikunmanmi: — Ñoqayku hinachus kankichis, llapa qharipas señalachikunkichistaq chayqa.

¹⁶Ahina kaqtinqa ususiykuta qosqaykikun, ñoqaykupas ususiykichiswan casarakusaqkun, hinaspa qankunawan tiyasaqku, huk llaqtallataq kasunchis.

¹⁷Manataq uyakuwankikuchu señalachikunaykichispaq chayqa, ususiykuta pusakapusaqku hinaspa ripusaqku, nispa.

¹⁸Hinan Hamorpas churin Shehempas, “nisqaykichisqa allinmi” nirqanku.

¹⁹Hinaspanmi waynaqa usqhaylla señalakurqan, Jacobpa ususinta munakusqanrayku. Payqa aswan reqsisqan karqan taytanpa lliw wasi ayllunpi.

²⁰Hinaspan Hamorpas churin Shehempas llaqtanku punkuman rispa llaqtamasinku qharikunata rimapayarqanku:

²¹Kay qharikunaqa sumaqmi ñoqanchispaq, kay suyupi tiyakuchunku qhatukuchunku, kay hallp'aqa paykunapaqpas hatunraqmi. Ñoqanchis casarakusunchis ususinkuwan, paykunapas casarakunqaku ususinchiswan.

²²Ichaqa, paykuna ñoqanchiswan tiyanankupaq ch'ulla llaqtalla kanankupaqqa kayllatan ruwananchista munanku, llapa qhari señalakunanchista imaynan paykunapas señalasqa kanku hinata.

²³Llapa kaqninkupas llapa uywankupas, ¿manachu kaqnillanchistaq kanqa? Ñoqanchisqa uyakullasunchis paykunaman, hinan ñoqanchiswan tiyanqaku, nispa.

²⁴Hinaqtinmi llaqta punkuman llapa lloqsiqkuna Hamorta churin Shehemtawan kasurqanku, hinaspan señalarqanku llapa qharikunata.

²⁵Kinsakaq p'unchaypitaq ichaqa paykuna sinchi nanaywan kashaqtinku, Jacobpa iskay churinkuna Dinaq turankuna Simeonwan Leviwan sapanka espadata hap'ispanku, mana reparachikuq hinalla llaqtata phawaykurqanku, hinaspa llapa qharita wañuchirqanku.

²⁶Hamortapas churin Shehemtapas espadawan wañuchirqanku, hinaspan Shehempa wasinmanta Dinata pusarikuspa ripurqanku.

²⁷Hinaspataq Jacobpa wakin churinkunaqa wañusqakunaq llaqtanta haykuspa llat'anarqanku pananku violasqa kasqanmanta.

²⁸Qatirikurqankun ovejankuta, wakankuta, asnonkuta, llaqtapi kaqtapas campopi kaqtapas,

²⁹lliw kaqninkutawan. Presota aparqanku llapa wawankuta hinallataq warmikunatapas, wasipi ima hayk'akaqtapas llat'anarqanku.

³⁰Chaymi Jacobqa Simeontawan Levitawan nirqan: — Sinchi sasachaymanmi churawankichis, kay Canaán suyu runakunawan Ferez runakunawan cheqnichiwaspaykichis. Pisi runallayoqtaq kashani chayqa, contraypichá huñukunqaku hinaspa maqawanqaku, hinan ñoqaqa aylluypiwan wañuchisqa kasaq, nispa.

³¹Paykunataq ichaqa kutichirqanku: — ¿Payri panaykuta qhelli huchapi puriq warmita hinachu ruwanman karqan? nispa.