Read Diospa Simin Qelqa GÉNESIS 35 Bible Online

GÉNESIS 35 - Diospa Simin Qelqa bible

GÉNESIS 35

¹Diosmi Jacobta nirqan: — Wichallayña Betelta, hinaspa chaypi tiyamuy. Chaypitaq altarta perqampuway wawqeyki Esaumanta ayqeshaqtiyki rikhurisuqniyki Diospaq, nispa.

²Hinaqtinmi Jacobqa ayllunta lliw paywan kaqkunatapas nirqan: — Hap'isqaykichis wak dioskunata wikch'uychis, hinaspa ch'uyanchakuychis, huk p'achawan ima churakuychis.

³Wichallasunña Betelta, chaypin altarta Diospaq perqasaq, payqa llakikusqay p'unchaymi rimapayawarqan, hinallataq maypiña kaqtiypas puriysiwarqan, nispa.

⁴Ahinapin Jacobman qorqanku hap'isqanku llapan wak dioskunata, ninrinkupi kaq aretekunatapas. Hinan Jacobqa chaykunata pakarqan Shehem qayllapi kaq encina sach'a chakipi.

⁵Lloqsiqtinkutaq, Diosqa manchachirqan muyuriqninkupi kaq llaqtakunata, chaymi Jacobpa churinkunataqa mana qatiykacharqankuchu.

⁶Jacobmi puriysimuqnin llapa runakunapiwan chayarqan Canaanpi kaq Luz llaqtaman, chaymi Betel nisqallataq.

⁷Hinaspanmi altarta chaypi perqarqan, chay cheqastataq suticharqan “El-Betel”[40] nisqata, wawqenmanta ayqekushaqtin chaypi Diosqa payman rikhurisqanrayku.

⁸Rebecaq uywaqen Deborataq wañukapurqan, p'ampasqataq karqan Betel urapi encina sach'a chakipi. Chaymi chay sach'aqa “Waqay Encina” nispa sutichasqa karqan.

⁹Huktawanmi Diosqa rikhurirqan Jacobman Padan-arammanta kutimpuqtin, hinaspan payta samincharqan.

¹⁰Nirqantaq: — Sutiykiqa Jacobmi, ichaqa manan Jacobñachu sutiyki kanqa, aswanpas Israelmi sutiykiqa kapunqa, nispa. Ahinatan Israelta sutichapurqan,

¹¹hinaspan nirqan: — Ñoqan kani Tukuy-atiyniyoq Dios, askhata miray, huk suyun, askha llaqtakunan qanmanta paqarinqa, hinallataq reykunapas qanmanta paqarinqa.

¹²Abrahamman Isaacman qosqay hallp'atan qanman qosqayki, hinallataq mirayniykimanpas qosaq chay hallp'ata, nispa.

¹³Hinaspan Diosqa paywan rimasqan cheqasmanta ripurqan.

¹⁴Chaymi Jacobqa huk rumi saywata chaypi sayarichirqan, chay patamantaq vinowan aceitewan hich'aykurqan.

¹⁵Hinaspan Jacobqa paywan Diospa rimasqan cheqasta “Betel” nispa suticharqan.

¹⁶Chaymantataq Betelmanta puririrqanku, Efrataman chayanapaq purinaraq kashaqtintaq Raquelqa wachakurqan, ichaqa sinchita ñak'arispan wachakurqan.

¹⁷Wachakushaspa sinchita ñak'ariqtintaq parteraqa payta nirqan: — Ama manchakuychu, kay wawaykipas qharillataqmi, nispa.

¹⁸Wañunan patapi kashaspataq Benoni[41] sutiwan suticharqan, taytantaq ichaqa Benjamín[42] sutiwan suticharqan.

¹⁹Chhaynatan Raquelqa wañukapurqan, Efrata ñanpitaq p'ampapurqanku, chaymi Belén nisqallataq.

²⁰Sepulturan patapitaq Jacobqa rumita sayarichirqan, chaymi chay p'unchaymanta Raquelpa sepulturan saywa kapurqan.

²¹Israelmi puririllarqantaq, hinaspan karpakurqan Ederpa torren aswan haqayneqninpi.

²²Chay hallp'api Israel tiyashaqtintaq, Rubenqa rispa taytanpa tiyaqmasin Bilhawan puñurqan. Chayta yachaspan Israelqa sinchita phiñakurqan. Israelpa churinkunaqa chunka iskayniyoqmi karqan.

²³Leaq wawankuna: Jacobpa phiwin Rubén, Simeón, Leví, Judá, Isacar, Zabulonpiwan.

²⁴Raquelpa wawankuna: Josepiwan Benjaminpiwan.

²⁵Raquelpa warmi kamachin Bilhaq wawankuna: Danpiwan Neftalipiwan.

²⁶Leaq warmi kamachin Zilpaq wawankunataq: Gadpiwan Aserpiwan. Chaykunan Jacobpa churinkuna, Padan-arampi paypaq naceqkuna karqan.

²⁷Chaymantataq, Jacobqa taytan Isaacpata rirqan Mamre llaqta Arbaman, chaymi Hebrón nisqallataq, chaypin Abrahampas Isaacpas tiyarqan.

²⁸Isaactaq kawsarqan pachak pusaq chunka watakama,

²⁹hinaspanmi sinchi yuyaqña wañukapurqan, ñawpa taytankunaman huñukapurqan, churin Esauwan Jacobwantaq p'ampapurqanku.