Read Diospa Simin Qelqa GÉNESIS 38 Bible Online

GÉNESIS 38 - Diospa Simin Qelqa bible

GÉNESIS 38

¹Chay tiempopin Judaqa wawqenkunamanta t'aqakurqan, hinaspa Hira sutiyoq Adulam qhariqta tiyaq rirqan:

²Chaypin Judaqa Shúa sutiyoq Canaán runaq ususinwan tuparqan, chay warmiwantaq casarakurqan. Hinaspan chay warmiwan puñurqan,

³paytaq wiksallikuspa huk qhari wawata wachakurqan, suticharqantaq Erta.

⁴Wiksallikullarqantaq yapamanta, hinaspan huk qhari wawata wachakurqan, suticharqantaq Onanta.

⁵Wiksallikullarqantaq huktawan, hinaspan huk qhari wawata wachakurqan, suticharqantaq Selata. Wachakushaqtintaq Judaqa Quezibpi kasharqan.

⁶Chay qhepatataq Judaqa casarachirqan phiwi churin Erta Tamar sutiyoq warmiwan.

⁷Judapa phiwi churin Ertaq ichaqa mana Señor Diospa sonqonpaq hinachu kawsarqan, chaymi Señor Diosqa payta wañuchipurqan.

⁸Hinan Judaqa Onanta nirqan: — Wawqeykiq viudanwan casarakuy, paywan cuñado-kayniykita hunt'ay, hinaspa wawqeykipaq churiyapuy, nispa.

⁹Onantaq mana paypaqchu wawaqa kananta yachaspa, wawqenpa viudanwan sapa kuti puñuspa, mana wiksallikunanta munaspa pampaman muhunta phawachiq, wawqenpaq mana churiyapunanrayku.

¹⁰Chay ruwasqanmi ichaqa Señor Diospaq mana chaninchu karqan, chaymi Señor Diosqa paytapas wañuchipullarqantaq.

¹¹Judaqa qhachunin Tamartan nirqan: — Taytaykiq wasinpi viuda qhepakamuy, churiy Sela wiñanankama, nispa. Judaqa yuyaykurqanmi: Paqtan Selapas wawqenkuna hinallataq wañunman, nispa. Chaymi Tamarqa ripuspa taytanpa wasinpi tiyamurqan.

¹²Unayñan kapurqan, wañukapurqantaq Shuaq ususin Judapa warminpas. Chay qhepatan Judaqa lutokuyta hunt'aspaña, amigon Adulam runa Hirawan Timnat-ta rirqan ovejan rutuqkunaman.

¹³Tamarmantaq willarqanku: Suegroykin Timnat-ta rishan ovejankuna rutuq, nispa.

¹⁴Hinaqtinmi payqa viuda-kaynin p'achata ch'utikuspa uma qatanawan uyanta pakaykukurqan, hinaspa p'istuykukuspa tiyaykurqan Enaimman haykuna Timnat ñan patapi. Yacharqanmi Selaq waynaña kasqanta, hinallataq payqa Selawan manaraq casarachisqa kasqantapas.

¹⁵Chaymi Judaqa payta rikuspa rabona warmi kananpaq yuyarqan, Tamarqa uyanta pakaykukuspan kasharqan.

¹⁶Hinaspan ñanmanta lloqsispa payman asuykuspa nirqan: — ¿Ñoqawan puñuwaqchu? nispa. (Manan yacharqanchu qhachunin kasqanta). Tamartaq nirqan: — ¿Imatataq qowanki ñoqawan puñusqaykimanta? nispa.

¹⁷Judataq kutichirqan: — Ñoqa apachimusqayki uywaymanta huk cabrachata, nispa. Paytaq nirqan: — Prendata saqeway chayta apachimunaykikama, nispa.

¹⁸Chaymi Judaqa nirqan: — ¿Ima prendatataq qosqayki? nispa. Paytaq kutichirqan: — Walqanayoq selloykita, hap'isqayki tawnaykitawan, nispa. Judataq chaykunata qorqan, hinaspan Tamarwan puñurqan, chaymi Tamarqa Judapaq wiksallikurqan.

¹⁹Hinamantataq hatarispa ripurqan, uya qatanantapas horqokurqan, chaymantataq viuda p'achanwan p'achakurqan.

²⁰Chay qhepatataq Judaqa cabrachata apachipurqan Adulam runa amigonwan, chay warmimanta prendata chaskimpunanpaqwan, ichaqa manan payta tarirqanchu.

²¹Hinan chayneqpi tiyaq runakunata tapukurqan: — ¿Maypitaq kashan Enaim ñan patapi rabona warmi? nispa. Paykunataq nirqanku: — Manan kaypiqa ima rabona warmipas kanchu, nispa.

²²Chaymi payqa Judaman kutipuspa, nirqan: — Manan payta tarimunichu, chaypi tiyaq runakunapas ninkun: Manan kaypiqa rabona warmiqa kanchu, nispa.

²³Hinan Judaqa nirqan: — Prendakunata hap'ikapuchun, ama asipayawananchispaq, ñoqan kay cabrachata apachirqayki, qantaq mana payta tarimurqankichu, nispa.

²⁴Kinsa killa qhepata hinataq Judaman willarqanku: Qhachuniyki Tamarmi qhelli huchapi purin, chay hawataq onqoq rikhurin, nispa. Chaymi Judaqa kamachikurqan: — Horqoychis, kanaykuychis, nispa.

²⁵Warmitaq ichaqa horqomushaqtinku, suegronman willachimurqan: Piqpachus kay prendakuna chay qharipaqmi wiksallikuni. Qhawariy piqpachus kasqanta, walqanayoq sellopas tawnapas, nispa.

²⁶Hinaqtinmi Judaqa chaykunata reqsispa nirqan: Ñoqamanta aswan chaninmi payqa, manan churiy Selawan payta casarachirqanichu, nispa. Manañataq hayk'aqpas Tamarwan puñurqanchu.

²⁷Wachakunan p'unchay chayamuqtintaq wiksanpi mellizo karqan.

²⁸Wachakushaqtintaq hukninqa makinta haywarqamurqan, hinan parteraqa hap'ispa makinta puka q'aytuwan wataykurqan: Kaymi ñawpaqta lloqsimun, nispa.

²⁹Makinta pay kutiykachiqtintaq wawqen lloqsimurqan. Hinan parteraqa nirqan: — ¡Imaynatan kichamunki lloqsimunaykipaq! nispa, hinaspa suticharqan Faresta.[43]

³⁰Chay qhepatataq wawqen lloqsimurqan, makinpi puka q'aytuyoq, suticharqantaq Zarata.