Read Diospa Simin Qelqa GÉNESIS 39 Bible Online

GÉNESIS 39 - Diospa Simin Qelqa bible

GÉNESIS 39

¹Egiptomanmi Josetaqa aparqanku. Chayman apaq Ismael runakunamantan Egipto runa Potifarqa rantikurqan, payqa Faronpa oficialnin guardia umallin karqan.

²Señor Diosqa Josewanmi kasharqan, chaymi Joseqa patronnin Egipto runaq wasinpi tukuy imapipas allillanpuni kasharqan.

³Chaymi patronninqa repararqan, Señor Dios paywan kashasqanta, paypa tukuy ima ruwasqantapas Señor Diospa allinyachishasqantawan.

⁴Ahinatan Joseqa Potifarwan munachikurqan, paypa yanapaqnintaq karqan. Josetaqa wasin mayordomotan churarqan, hinaspa lliw kaqninkunata payman hap'ichirqan.

⁵Wasintapas lliw kaqnintapas payman hap'ichisqanmantapachataq Señor Diosqa Joserayku Egipto runaq tukuy kaqninkunata samincharqan, wasinpi kaqtapas campopi kaqtapas.

⁶Chaymi Joseman hap'ichirqan tukuy kaqninta, pay kaqtinqa manan imatapas yuyarqanñachu aswanpas mikhunallanpiña. Joseqa karqan sumaq rikch'ayniyoq munay siklla.

⁷Chaykuna qhepatataq patronninpa warminqa Joseta qhawapayarqan, hinaspan nirqan: — Ñoqawan puñuy, nispa.

⁸Josetaq mana munarqanchu, aswanpas patronninpa warminta nirqan: — Qhawariy, patronniyqa manan wasinpi tukuy kaqninkunamanta ñoqata hark'awanchu, aswanmi lliw imaymananta hap'iykachiwan.

⁹Manan kay wasipi ñoqamanta aswan atiyniyoq kanchu, manataq imatapas hark'awanchu, aswanpas qanllatan, warmin kasqaykirayku. ¿Imaynan kay sinchi mana allinta ruwaspa Dios contra huchallikuyman? nispa.

¹⁰Sapa p'unchayña patronninpa warmin ladonpi puñunanpaq Joseta rimapayashaqtinpas, Joseqa manan paywan puñuyta munarqanchu.

¹¹Huk p'unchaymi Joseqa wasiman llank'aq haykurqan, manataq wasipi kaqkuna pipas chaypi karqanchu.

¹²Hinan warmiqa p'achanmanta hap'ispa nirqan: — Ñoqawan puñuy, nispa. Hinaqtinmi payqa warmiq makinpi p'achanta saqerparispa phawaylla ayqerikurqan.

¹³Warmitaq makinpi p'achanta saqerparispa hawaman ayqesqanta rikuspa

¹⁴waqyakurqan wasipi kaqkunata, hinaspan paykunata nirqan: — Qhawariychis, Hebreo runatan pusamuwanchis burlakuwananchispaq. Paymi hamuwan ñoqawan puñunanpaq, ñoqataq kunkayoqta qaparirqani,

¹⁵chaymi waqyakuqtiy qapariqtiy p'achanta qayllaypi saqerparispa phawaylla ayqerikun, nispa.

¹⁶Hinaspan payqa Josepa p'achanta qayllanpi churarayachirqan qosan wasiman hamunankama.

¹⁷Qosan chayamuqtintaq payqa willarqan chay kikin simikunallatataq: Pusamuwasqaykiku chay kamachi Hebreo runan hamuwan burlakuwaqniy.

¹⁸Ñoqa waqyakuspa qapariqtiymi payqa qayllaypi p'achanta saqerparispa hawaman ayqerikun.

¹⁹Chay hinatan kamachiyki ruwawan, nispa. Chaymi willasqan simita uyarispa patronninqa sinchita phiñakurqan.

²⁰Hinaspan patronninqa Joseta hap'ispa carcelman churarqan, reypa presonkunaq kasqanman.

²¹Señor Diosmi ichaqa Josewan kasharqan, hinaspan payta khuyapayarqan, carcelpi guardia umalliwanpas sumaqta qhawarichirqan.

²²Chay umallin Joseta churarqan carcelpi llapa presokunata qhawananpaq, chaypi ima ruwanatapas pay ruwananpaq.

²³Cárcel guardia umalliqa manañan imatapas qhawarqanchu Josepa makinpi kaqkunataqa, Señor Diospa Josewan kasqanrayku. Paypa imapas ruwasqantaqa Señor Diosmi allinyachirqan.