Read Diospa Simin Qelqa GÉNESIS 4 Bible Online

GÉNESIS 4 - Diospa Simin Qelqa bible

GÉNESIS 4

¹Adanmi warmin Evawan puñurqan, hinan warmiqa wiksallikuspa Cainta wachakurqan, hinaspan nirqan: — Señor Dios qowaqtinmi qhari wawayoq kani, nispa.

²Chaymantataq wawqen Abelta wachakurqan. Abelqa oveja michiqmi karqan, Caintaq chakra llank'aq karqan.

³Watakuna pasaqtintaq, Cainqa chakra ruru ofrendata Señor Diosman haywarqan.

⁴Abelpas haywallarqantaq ñawpaq wachay ovejankunamanta allin wiranta. Señor Diostaq chaskirqan Abelta ofrendantapas,

⁵ichaqa Caintan ofrendantapas mana chaskirqanchu. Chaymi Cainqa sinchita phiñakurqan, uyanpas millaymanraq tukurqan.

⁶Hinaqtinmi Señor Diosqa Cainta nirqan: — ¿Imamantataq phiñakunki? ¿Imanaqtintaq uyaykipas millaymanraq tukun?

⁷Allinkaqta ruwaqtiykiqa, chaskisqan kanki, manachus allinkaqta ruwanki chayqa, huchan suyapashasunki hap'irqonasuykipaq, chaypas qanmi huchataqa atipanayki, nispa.

⁸Cainmi wawqen Abelta nirqan: — Haku campota,[4] nispa. Chaypin paykuna kasharqanku, hinan Cainqa wawqen Abel contra sayarispa, payta wañuchirqan.

⁹Hinan Señor Diosqa Cainta nirqan: — ¿Maypin wawqeyki Abel? nispa. Paytaq kutichirqan: — Manan yachanichu, ¿ñoqari wawqeyta qhawaqchu kani? nispa.

¹⁰Diosmi Cainta nirqan: — ¿Imatan ruwarqonki? Wawqeykiq yawarninmi pampamantapacha qaparispa mañakamuwan chaninchanaypaq.

¹¹Kunanqa ñakasqan kanki, wañuchisqayki wawqeykiq yawarninta ch'onqaq hallp'amantapas wikch'usqan kanki.

¹²Chakrata llank'aqtiykipas manañan rurupusunkichu, puriylla-puriqtaq tumaqayataq kay pachapi kanki, nispa.

¹³Hinan Cainqa Señor Diosta nirqan: — ¡Ay! Sinchi hatunmi muchunayqa, manan muchuyta atiymanchu.

¹⁴Kunanqa kay hallp'amantan wikch'upuwanki, qayllaykimantataq karunchakapusaq, puriylla-puriqtaq tumaqayataq kay pachapi kasaq, pipas tariwaqniymi wañuchiwanqa, nispa.

¹⁵Hinan Señor Diosqa payta nirqan: — ¡Manan! Pipas wañuchisunki chayqa, qanchis kutitan qanmanta ayni-kutichisqa kanqa, nispa. Hinaspan Señor Diosqa Cainman señalta churarqan, pipas payta tariqqa ama wañuchinanpaq.

¹⁶Caintaq Señor Diospa qayllanmanta lloqsirqan, hinaspan Nod hallp'api tiyarqan, Edenpa inti lloqsimuy ladonpi.

¹⁷Cainmi warminwan puñurqan, hinan warmiqa wiksallikuspa Enocta wachakurqan. Huk llaqtatataq sayarichirqan, hinaspan chay llaqtata suticharqan Enoc churinpa sutinwan.

¹⁸Enoctaq churiyarqan Iradta, Iradtaq churiyarqan Mehujaelta, Mehujaeltaq churiyarqan Metusaelta, Metusaeltaq churiyarqan Lamecta.

¹⁹Lamecqa iskay warmiwanmi casarakurqan, hukninpa sutinmi karqan Ada, hukkaqpa sutintaq Zila.

²⁰Adaqa wachakurqan Jabalta. Jabalqa karpapi tiyaqkunaq, uywa michiqkunaq taytanmi karqan.

²¹Wawqenpa sutintaq karqan Jubal, paymi karqan llapa arpata pinkuylluta tocaqkunaq taytan.

²²Zilapas Tubal-Cainta wachakullarqantaq, paymi karqan llapa broncemanta fierromanta herramientakunata ruwaq. Tubal-Cainpa panantaq Naama karqan.

²³Lamecmi warminkunata nirqan: — Ada, Zila, kunkayta uyariychis, Lamecpa warminkuna, simiyta uyariychis, huk qharitan wañuchini k'iriwasqanmanta, huk waynatataq wañuchini maqawasqanmanta.

²⁴Cainmanta qanchis kutita ayni-kutichina kanan chayqa, Lamecmantaqa qanchis chunka qanchis kutitan kanqa, nispa.

²⁵Adanqa wakmantan warminwan puñurqan, hinan warmiqa huk qhari wawata wachakurqan, suticharqantaq Set-ta,[5] nirqanmi: — Diosmi huk wawata qowan Cainpa wañuchisqan Abelpa rantinpi, nispa.

²⁶Setpaqpas huk qhari wawa nacellarqantaq, suticharqantaq Enosta. Chaymantapachan runakunaqa Señor Diospa sutinpi mañakuyta qallarirqanku.