Read Diospa Simin Qelqa GÉNESIS 40 Bible Online

GÉNESIS 40 - Diospa Simin Qelqa bible

GÉNESIS 40

¹Chaykuna qhepatan Egipto reypa copan haywaqpiwan t'anta ruwaqninpiwan reyninku contra huchallikurqanku.

²Chaymi rey Faraonqa phiñakurqan chay iskay oficialninkunapaq, copa haywaqkunata kamachiqpaq, t'anta ruwaqkunata kamachiqpaqwan.

³Hinaspan guardia umalliq wasinman paykunata presota apachirqan, Josepa preso kasqan carcelman.

⁴Guardia umallitaq Joseman paykunata entregarqan, hinan Joseqa paykunata servirqan, unayñataq carcelpi kasharqanku.

⁵Copa haywaqmi t'anta ruwaqpiwan kaq tutapikama carcelpi mosqokurqanku, sapankanku sut'inchanayoqtakama.

⁶Tutamanta José paykunaman hamuspa qhawariqtintaq, llakisqa kasharqanku.

⁷Hinan payqa patronninpa wasinpi preso-masinkunata tapurqan: — ¿Imanaqtintaq kunanri llakisqa kashankichis? nispa.

⁸Paykunataq kutichirqanku: — Mosqokusqaykutan mana pipas sut'inchayta atiwankuchu, nispa. Hinan Joseqa paykunata nirqan: — Diosmi chaykunataqa sut'inchayta atin. Chay hinaqa, chay mosqokusqaykichista willawaychis, nispa.

⁹Hinaqtinmi copa haywaqkunata kamachiqqa Joseman willarqan mosqokusqanta: — Ñoqan mosqokuspa rikurqani uvas yurata ñawpaqeypi kashaqta,

¹⁰chay uvas yurapitaq kinsa k'allmata. Chay yurataq mukmuspa t'ikasqa, hinaspan k'allmankunaqa uvasta ruruspa poqochisqa.

¹¹Faraonpa copantan hap'ishasqani, hinaspa uvasta hap'ispa copaman ch'arwashasqani, hinaspa Faraonman copata haywashasqani, nispa.

¹²Chaymi Joseqa payta nirqan: — Kaymi mosqokusqaykiq sut'inchayninqa: Kinsa k'allmaqa kinsa p'unchaymi.

¹³Kinsa p'unchaymantan Faraonqa horqochisunki, hinaspa llank'anaykiman kutichipusunki, chaymi copanta haywanki, imaynan copa haywaqnin kashaspayki haywallaqpuni kanki hinata.

¹⁴Yuyarikuwankiyá chay hina allinpi kaspayki, khuyapayaykuwaspaykitaq Faraonman ñoqamanta willarinki, hinaspa kay wasimanta horqowanki.

¹⁵Hebreo runakunaq llaqtanmantan suwamuwarqanku, ichaqa manan kaypi ima mana allintapas ruwarqanichu carcelman churawanankupaq, nispa.

¹⁶Allinpaq sut'inchasqanta uyarispataq t'anta ruwaqkunata kamachiqqa Joseta nirqan: — Ñoqapas mosqokullarqanitaqmi, yuraq t'antantin kinsa canastachakunatan umay patapi rikushasqani.

¹⁷Patakaq canastachapitaq kashasqa imaymana rikch'aq pastel mikhunakuna Faraonpaq, hinan phalaq animalkunaqa mikhurashasqaku umay patapi canastachamanta, nispa.

¹⁸Hinan Joseqa kutichirqan: — Kaymi mosqokusqaykiq sut'inchayninqa: Kinsa canastachakunaqa kinsa p'unchaymi.

¹⁹Kinsa p'unchaymantan Faraonqa horqochisunki, hinaspa seq'onapi warkusunki, phalaq animalkunataq aychaykita mikhunqa, nispa.

²⁰Kinsa p'unchaymantataq Faraonpa wata hunt'ay p'unchaynin karqan, chaymi reyqa llapan oficialninkunaman hatun mikhunata haywarqan. Hinaspan copa haywaqkuna kamachiqta, t'anta ruwaqkuna kamachiqtapas oficialninkunaq qayllanman pusachimurqan.

²¹Hinaspan copa haywaqkuna kamachiqta llank'ananman churachipurqan, chaymi payqa Faraonman copata haywapurqan.

²²T'anta ruwaqkuna kamachiqtataq ichaqa seq'ochirqan, Josepa sut'inchasqanman hina.

²³Copa haywaqkuna kamachiqtaq Joseta mana yuyaripurqanchu, aswanpas qonqapurqanmi.